ԵՐԵՎԱՆ, 20 օգոստոսի — Sputnik. Օգոստոսի 10–ին տեղի ունեցած ավտովթարից զոհվածները մայր ու որդի են։
Ինչպես հայտնում է Shamshyan.com–ը, Հայաստանի քննչական կոմիտեի Գեղարքունիքի մարզային քննչական վարչությունում ՀՀ քր. օր.-ի 242 հոդվածի 3-րդ մասի (ճանապարհատրանսպորտային պատահար, որն անզգուշությամբ առաջացրել է 2 և ավելի մարդու մահ) հատկանիշներով քրեական գործի շրջանակում պարզվել է օգոստոսի 10-ին Գեղարքունիքի մարզում խոշոր ավտովթարի հետևանքով մահացածների, վարորդների և վիրավորների ինքնությունը:
ВАЗ 2107-ը վարել է Արարատի մարզի Նորաշեն գյուղի բնակիչ, 24-ամյա Վահան Մինայսանը, ВАЗ 2121-ը վարել է Արցախի Հանրապետության Մարտակերտի շրջանի Կոճողոտ գյուղի բնակիչ, 35-ամյա Մարատ Թադևոսյանը:
Վթարի հետևանքով Մ. Թադևոսյանը տեղում մահացել էր, իսկ 07-ի վարորդ Վ. Մինասյանը և ВАЗ 2121-ի ուղևորներ, Ռուսաստանի Դաշնության Կեմերովոյի մարզի Նովոկուզնեցկ քաղաքի բնակիչներ, 26-ամյա Սիրանույշ Ջալալյանը, 1-ամյա Նելլի Թադևոսյանը, 2-ամյա Գորիկ Թադևոսյանը և Արցախի Հանրապետության Մարտակերտի շրջանի Կոճողոտ գյուղի բնակիչ, 60-ամյա Մանյա Միրզոյանը մարմնական վնասվածքներով տեղափոխվել էին Մարտունու բժշկական կենտրոն: Մ. Միրզոյանը նշված բժշկական կենտրոնից Երևանի հիվանդանոցներից մեկը տեղափոխելու ճանապարհին՝ Գավառի վարչական տարածքում՝ մահացել է: Գ. Շամշյանի տեղեկություններով՝ Մ. Թադևոսյանն ու Մ.Միրզոյանը մայր ու որդի էին, իսկ վիրավորները նրանց ընտանիքից են:
