Ոստիկանություն

Երևանում տեղի ունեցած զարհուրելի սպանությունը բացահայտվեց. կասկածյալը 20–ամյա զինծառայող է

3548
(Թարմացված է 10:59 18.05.2018)
Երիտասարդը հայտնել է, որ կացնով հարվածելուց առաջ նռնակ է նետել խորթ հոր ուղղությամբ։

ԵՐԵՎԱՆ, 18 մայիսի — Sputnik. Ոստիկանները, քննիչներն ու ՀՀ ՊՆ ռազմական ոստիկանության ծառայողները բացահայտել են մայիսի 14-ին Երևանի Կենտրոն վարչական շրջանի Սարալանջի նորակառույց ճանապարհի աջակողմյան հատվածում գտնվող Այգեստան 11 փողոցի 1-ին նրբանցքի տներից մեկի մոտ գտնվող կիսակառույց շինությունում 60-ամյա Գևորգ Մաթոսյանի առանձնակի դաժան սպանությունը։ Նրա դին` նեխած և գլխի շրջանում ջախջախված վիճակում, հայտնաբերել էին նույն օրը։

Ինչպես հայտնում է shamshyan.com-ը, ոստիկանները, քննիչներն ու ռազմական ոստիկանության ծառայողները նշած զարհուրելի սպանությունը կատարելու կասկածանքով ոստիկանության Կենտրոնական բաժին են բերման ենթարկել Երևան քաղաքի բնակիչ՝ 20 տարեկան Անդրեյ Խալիլյանին։

Կայքի տեղեկություններով՝ նա ժամկետային զինծառայող է եղել, ծառայություն է իրականացրել Արցախի Հանրապետության զորամասերից մեկում, սպանությունը կատարելու օրը օրինական կարճաժամկետ արձակուրդում է եղել։ Սպանությունը կատարել է ապրիլին։

Նա այդ օրը նաև նռնակ է նետել նույն հասցեի բնակչի վրա, ինչի մասին ոստիկանության Կենտրոնական բաժնում օպերատիվ տվյալներ են ստացել օրեր անց, քանի որ վիրավորում ստացած քաղաքացին կատարվածի մասին չի հայտնել իրավապահներին։

Խալիլյանը ձերբակալվել է։ Նա հայտնել է, որ սպանությունը կատարել է այդ օրը, երբ նռնակ է նետել խորթ հոր ուղղությամբ և իր զոհին անասնագոմում սպանել է կացնի մի քանի հարվածով։

Իրավապահները ձեռնարկում են անհրաժեշտ օպերատիվ միջոցառումներ՝ հանցագործության գործիք հանդիսացող կացինը հայտնաբերելու ուղղությամբ։

3548
թեմա:
Վթարներ, պատահարներ, սպանություններ (523)