ԵՐԵՎԱՆ, 14 օգոստոսի – Sputnik. Ուշ երեկոյան տուն շտապող Դավթաշենի բնակիչներից մեկն ավտոմեքենան շտապ կանգնեցրեց։ Վճարովի մանկապարտեզներից մեկի մոտ բազմամարդ էր, խուլ աղմուկ էր լսվում։
«Էստեղ դիակ կա, հոշոտված ա, ոնց որ շները հոշոտած լինեն»,– պատմեցին տեղում հավաքվածները։
Մասնագետներն, այնուամենայնիվ, չեն շտապում եզրահանգումներ անել, թե շներն են հոշոտել։ Մի բան պարզ է` մարմնի վրա բռնության հետքեր չկան, բայց թևերն ուսագոտու շրջանից կտրված են, մարմնում արդեն նեխման պրոցես է սկսվել։
Դիակը տեղափոխվել է դատաբժշկական գիտագործնական կենտրոն։ Դեռ դատաբժիշկները չեն կարողանում պարզել անձի ինքնությունը և հստակ տարիքը, նախնական գնահատականներով` անձը մոտավորապես 55–60 տարեկան էր։
Sputnik Արմենիային մոտ կանգնած աղբյուրներից մեկը պատմեց, որ մարմինը որդերի բաժին է դարձել և նախնական հաշվարկով` դին վերոնշյալ վայրում կարող էր լինել մոտավորապես 3 օր։
