Նաիրա Զոհրաբյան

Նաիրա Զոհրաբյան. հեղաշրջման կոչերով ժողովրդավարություն չի հաստատվի

37
Հայաստանում խնդիրները շատ են, բայց ռազմական հեղաշրջման կոչը դրանք լուծելու ճանապարհը չէ, կարծում է ՀՀ ԱԺ պատգամավոր, ԲՀԿ խմբակցության ղեկավար Նաիրա Զոհրաբյանը։

ԵՐԵՎԱՆ, 17 հուլիսի — Sputnik. Մեկ բան հստակ է. այն խնդիրները, որ հռչակում է նշյալ շարժումը, և այն ճանապարհը, որը իրենք ընտրել են երկրում, իրենց գնահատմամբ, ժողովրդավարություն հաստատելու, երկրի առջև ծառացած համակարգային խնդիրները լուծելու համար, այդ ճանապարհով չեն լուծվում, ասաց Զոհրաբյանը։

«Ռազմական հեղաշրջման կոչերով, պատանդներ վերցնելով, ապստամբության կոչեր անելով հնարավոր չէ ժողովրդավարության և ժողովրդավարացման հետ կապված խնդիրներ լուծել։ Ոչ մի նպատակ չարժե, որ դրա համար մեր մեկ հայրենակցի արյուն թափվի»,- նշեց Զոհրաբյանը։

Նա գտնում է, որ իսկապես Հայաստանում բազմաթիվ չլուծված խնդիրներ կան, խնդիրներ, որոնք օր առաջ հրատապ լուծում են պահանջում, «մեր երկրում կան պաշտոնյաներ, որոնց տեղը այսօր բանտում է, և միշտ ասել ենք, որ ժամանակն է օպերատիվ լուծելու այդ լրջագույն խնդիրները, շատ դեպքերում դանակը հասել է ոսկորին», բայց նրա կարծիքով չի կարող ժողովրդավարական համակարգային լրջագույն խնդիրները լուծելու այլընտրանքը լինել ռազմական հեղաշրջման կոչը, պատանդներ վերցնելը։ Այս ճանապարհը, նրա խոսքով, տանելու է իրավիճակի էլ ավելի սրման։

«Ես` որպես Հայաստանի Հանրապետության քաղաքացի, որպես մայր, կոչ եմ անում, նախ հորդորում եմ ոստիկանությանը` պահպանել զգոնություն և սառնասրտություն, որովհետև մեր հայրենակիցներն են, կոչ եմ անում Սեֆիլյանի կողմնակիցներին` սթափվե՛ք, կա՛նգ առեք, ցանկացած խնդիր կարելի է և պետք է լուծել միայն երկխոսության, միայն փոխադարձ տեսակետը լսելու ճանապարհով»,- հորդորեց Զոհրաբյանը։

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։

Ազգային անվտանգության աշխատակիցները փորձում է բանակցություններ վարել ոստիկանության շենքը գրավողների հետ։ Դեպքի վայրում են ՀՀ ոստիկանության և ԱԱԾ բարձրաստիճան պաշտոնյաները։ Մեկ ոստիկան զոհվել է, ևս երկուսը՝ վիրավորվել:

37