Տիրան Հովհաննիսյան

Տիրանին Չինաստանում միանգամից 3-րդ կուրս են տեղափոխել. նա Փաշինյանի օգնության կարիքն ունի

15177
(Թարմացված է 19:31 01.08.2019)
Հայ երիտասարդը, որը նամակ է գրել Նիկոլ Փաշինյանին, շատ է ուզում Չինաստանում Հայաստանի դեսպան դառնալ, բայց մինչ այդ նա դեռ պիտի լուծի բանակ գնալ–չգնալու հարցը։

Տաղանդավոր երիտասարդ Տիրան Հովհաննիսյանը 17 տարեկան է: Մինչ հասակակիցները սովորում են դպրոցում, Տիրանն արդեն համալսարան է հաճախում. նա Չինաստանի համալսարանի ուսանող է և իր գիտելիքների շնորհիվ հասցրել է միանգամից 3-րդ կուրս տեղափոխվել: Խելացի երիտասարդը, սակայն, աջակցության կարիք ունի. շուտով լրանում է տղայի 18–ամյակը, և նա պետք է պարտադիր զինծառայության անցնի։ Երիտասարդը, իհարկե, չի խուսափում հայրենիքի հանդեպ ունեցած պարտքը տալու պարտավորությունից, սակայն եթե բանակ զորակոչվի, ստիպված կլինի զրկվել Չինաստանում անվճար ուսում ստանալու հնարավորությունից: Sputnik Արմենիայի հետ զրույցում Տիրանը պատմել է իր նպատակների և Չինաստանում Հայաստանի դեսպան դառնալու երազանքի մասին: Զրուցել է Աստղիկ Սուքիասյանը:

Тиран Ованнисян
© Sputnik / Aram Nersesyan
Տիրան Հովհաննիսյան

- Սովորել եմ Արարատի մարզի Նոր Խարբերդ համայնքի թիվ 1 միջնակարգ դպրոցում: 9-րդ դասարանն ավարտել եմ գերազանցության վկայականով։ 15 տարեկան էի, երբ սեփական միջոցներով մեկնեցի Չինաստանի Ժողովրդական Հանրապետություն` ուսումս շարունակելու: Սկզբում հաճախեցի Շաանսիի գիտության և տեխնոլոգիայի համալսարան, որտեղ չինարեն սովորեցի ու ծանոթացա չինական մշակույթին: Համալսարանում ուսումնական կուրսը 2 տարի է, բայց ես այն յուրացրի 1 տարում և արժանացա մի շարք պարգևների: Հետո ընդունվեցի Շաանսիի մանկավարժական համալսարանի` չինարեն գրականության և բիզնեսի ֆակուլտետ ու, քանի որ գերազանց էի սովորում, համալսարանի գիտական ղեկավարությունը որոշեց ինձ միանգամից 3-րդ կուրս փոխադրել: Եթե հաջողվի, համալսարանը կավարտեմ 19 տարեկանում: Չինարենի իմացության ամենաբարձր աստիճանը HSK6-ն է, որին ես պատրաստվում եմ ամենայն պատասխանատվությամբ, HSK5-ը հանձնել եմ գերազանց:

Сертификат Тирана
© Photo : provided by Tiran Hovhannisyan
Տիրանի ստացած հավաստագրերից մեկը

- Ինչո՞ւ որոշեցիր ուսումդ շարունակել Չինաստանում:

- Նախ ասեմ, որ 5 տարի հաճախել եմ ֆուտբոլի պարապմունքների: Եղբայրս կարծում էր, որ ֆուտբոլում ոչ մի լուրջ հաջողության չեմ հասնի, ուստի խորհուրդ տվեց լեզուներ սովորել. նախ ռուսերեն և անգլերեն սովորեցի, հետո դարձյալ եղբորս խորհրդով որոշեցի սովորել մի լեզու, որին Հայաստանում քչերն են տիրապետում։ Ընտրեցի չինարենը։ Մեր ընտանիքի մտերիմներից մեկը, որը Չինաստանում է բնակվում, հավաստիացրեց, որ սեփական ուժերով կարող եմ Չինաստանում կրթություն ստանալ: Այդպես երկու տարի առաջ մեկնեցի Չինաստան:

Тиран Ованнисян
© Sputnik / Aram Nersesyan
Տիրան Հովհաննիսյան

- Ի՞նչ նպատակներ ունես:

  - Եթե հնարավորություն ունենամ համալսարանն ավարտել, ապա ուսումս կշարունակեմ մագիստրատուրայի Միջազգային հարաբերություններ բաժնում։ Հետագայում նպատակ ունեմ Չինաստանում Հայաստանի դեսպան դառնալ: 22 տարեկանում կավարտեմ մագիստրատուրան, իսկ համալսարանի գիտական հանձնաժողովը որոշել է ինձ համալսարանում պահել այնքան, մինչև դոկտորի աստիճան ստանամ: Իմ ուսանած համալսարաններում ես ամենաերիտասարդ ուսանողն եմ և սովորում եմ մինչև 50 տարեկանների հետ:

Հայ դպրոցականը բրոնզ է նվաճել Փարիզում

- Facebook սոցիալական ցանցի օգտատերերը վերջին օրերին տարածում են քո բաց նամակը` ուղղված ՀՀ վարչապետ Նիկոլ Փաշինյանին: Գիտեմ, որ ՀՀ Զինված ուժերում ծառայության անցնելու հետ կապված խնդիր ունես, կմանրամասնե՞ս:

– 2020 թվականի հունիսի 15-ին դառնում եմ 18 տարեկան։ Նշանակում է, որ պետք է բանակ զորակոչվեմ: Զինծառայության անցնելու դեպքում ստիպված կլինեմ թողնել ուսումս։ Դեռ 3 ամիս առաջ նամակ էի ուղարկել ՀՀ վարչապետ Նիկոլ Փաշինյանին և խնդրել էի աջակցել տարկետում ստանալու և ուսումս շարունակելու հարցում: Վարչապետի աշխատակազմից պատասխան նամակ ստացա, որում նշված էր, որ ես 2020 թվականի հունիսի 15-ին վերադառնամ Հայաստան, այդ ժամանակ կորոշեն` շարունակեմ ուսումս, թե զորակոչվեմ: Այստեղ երկու խնդիր կա. նախ` նամակում չի նշվում` եթե ես վերադառնամ Հայաստան, հետագայում պետությունը ինձ հնարավորություն կտա՞ վերադառնալ Չինաստան, երկրորդ` այժմ ես անվճար եմ սովորում, և եթե նույնիսկ Հայաստանում ինձ թույլ տան շարունակել ուսումս Չինաստանում, միևնույն է` ես այլևս չեմ կարող անվճար սովորել, քանի որ քննություններս բաց կթողնեմ: Չինաստանում ուսումնական կիսամյակը սկսվում է սեպտեմբերին և ավարտվում հունվարի կեսին, իսկ երկրորդ կիսամյակը սկսվում է մարտին և ավարտվում հուլիսին: Այսինքն` եթե ես հունիսի 15-ին վերադառնամ Հայաստան, չեմ հասցնի հանձնել քննություններս:

Հայ բժիշկը բուժել է 4–ամյա երեխային, որին հրաժարվել էին վիրահատել արտասահմանցիները

- Ի՞նչ ես պատրաստվում անել:

- Երեկ նորից նամակ եմ գրել ՀՀ վարչապետ Նիկոլ Փաշինյանին, ՀՀ նախագահ Արմեն Սարգսյանին, ՀՀ ԱԺ փոխնախագահ Վահե Էնֆիաջյանին ու ՀՀ կրթության, գիտության, մշակույթի և սպորտի նախարար Արայիկ Հարությունյանին: Ակնկալում եմ հանդիպել երկրի բարձրաստիճան պաշտոնյաների հետ, քննարկել իմ հետագա անելիքները և մի շարք ուսումնամեթոդական, ուսումնակազմակերպչական հարցեր: Ես ցանկանում եմ օգտակար լինել իմ երկրին, աշխատել և արարել Հայաստանում:

Тиран Ованнисян
© Sputnik / Aram Nersesyan
Տիրան Հովհաննիսյան

- Հայաստանը Չինաստանում ներկայացնելու առիթ ունեցե՞լ ես:

- Չինաստանի համալսարանում տարվա մեջ մեկ անգամ սպորտային միջոցառում է անցկացվում, որին մասնակցում են համալսարանի բոլոր ուսանողները. Միջոցառման ժամանակ ուսանողներից յուրաքանչյուրը ներկայացնում է իր երկիրը։ Ես ներկայացրել եմ իմ ժողովրդին, մեր կյանքն ու կենցաղը, հայկական մշակույթը, մեր երկրի տեսարժան վայրերը: Այդպես մենք կարող ենք նպաստել զբոսաշրջության զարգացմանը: Համալսարանները, որտեղ սովորել և սովորում եմ, ընդհանուր առմամբ 46.000 ուսանող է սովորում։ Ի դեպ, նկատել եմ, որ չինացիների 99 տոկոսը չգիտեն Հայաստանի մասին, մինչդեռ եթե այդ ուղղությամբ ճիշտ աշխատանք տարվի, մենք զբոսաշրջիկների աննախադեպ հոսք կունենանք Չինաստանից։

15177
թեգերը:
Նիկոլ Փաշինյան, Ուսանող, Չինաստան, Հայաստան
Ըստ թեմայի
Աշակերտները կազատվե՞ն ծանր պայուսակից ու դրա հետևանքներից. 48 դասագիրք երկհատորանի կլինեն
Սիսիանցի դպրոցականը մեքենա է հավաքել, անունն էլ դրել «Хищник». տեսանյութ և լուսանկարներ
Գյումրիից Սուդան. մանկաբարձ–գինեկոլոգ Արմեն Մկրտչյանը փոխարինելու է Թոմ Քաթինային
Հայ դպրոցականների համար նոր խաղը կխաղա նույնիսկ ՀՀ նախագահի կինը
Նիկոլայ Պատրուշևն ու Արթուր Բաղդասարյանը, արխիվային լուսանկար

Ինչ են քննարկել Նիկոլայ Պատրուշևն ու Արթուր Բաղդասարյանը․ մանրամասներ՝ հանդիպումից

2122
(Թարմացված է 12:01 30.11.2020)
Մոսկվայում նոյեմբերի 27-ին ՌԴ Անվտանգության խորհրդի քարտուղար Նիկոլայ Պատրուշևն ընդունել էր Հայաստանում ԱԽ նախկին քարտուղար Արթուր Բաղդասարյանին։ Արթուր Բաղդասարյանը Sputnik Արմենիայի հետ զրույցում մանրամասներ է պատմել հանդիպումից։

-Նոյեմբերի 27-ին հանդիպում եք ունեցել Ռուսաստանի Անվտանգության խորհրդի քարտուղար Նիկոլայ Պատրուշևի հետ: Ի՞նչ առիթով ու ո՞ւմ նախաձեռնությամբ է այն տեղի ունեցել, և արդյո՞ք այն առաջինն էր ՀՀ ԱԽ քարտուղարի պաշտոնը թողնելուց հետո: 

- Նիկոլայ Պատրուշևը իմ վաղեմի ընկերն է և բարեկամը, ում հետ շփվելու, հանդիպելու և խնդիրներ քննարկելու որևէ դժվարություն չունեմ և չեմ ունեցել։ Պատրուշևը նաև մեր երկրի և ժողովրդի լավագույն բարեկամներից է։ Մենք միասին, առանց թմբկահարելու, մեծ աշխատանք ենք կատարել հայ-ռուսական երկկողմ դաշնակցային հարաբերությունների զարգացման գործում, ընդ որում ինչպես երկկողմ, այնպես էլ բազմակողմ՝ ՀԱՊԿ, ԵԱՏՄ, ԱՊՀ ֆորմատներով։

Նախաձեռնողն ենք եղել անվտանգային միջավայրի զարգացմանն առնչվող բազմաթիվ նախաձեռնությունների, հիմնադիրն ենք եղել ռազմաքաղաքական և անվտանգային ոլորտին առնչվող իրավական ակտերի, երկկողմ և բազմակողմ որոշումների, ամրապնդել ենք հայ ռուսական ռազմավարական գործակցության իրավապայմանագրային բազան՝ այդ թվում նաև ՀԱՊԿ շրջանակներում։ Այն առնչվել է նաև մեր անվտանգությանը, զինված ուժերին, 102-րդ ռազմաբազայի արդիականացմանը, հայկական ռազմարդյունաբերությանը և բազմաթիվ այլ հարցերի։

Թե ինչի մասին ենք խոսել՝ գրված է պաշտոնական հաղորդագրության մեջ։ Երկու խոսքով եթե նշեմ՝ խոսել ենք իրավիճակից, հնարավոր զարգացումներից, սահմանների դեմարկացիայից, գերիների վերադարձ, անհետ կորածների որոնում, մշակութային՝ ներառյալ եկեղեցական ժառանգության, պաշտպանություն՝ ակտիվ ռուսական օժանդակությամբ և այլն։

-Ինչպե՞ս եք գնահատում ՀՀ և ՌԴ Անվտանգության խորհուրդների համագործակցության ներկա մակարդակը՝ պայմանավորված տարածաշրջանում ստեղծված նոր իրավիճակով:

- Իմ ղեկավարման տարիներին Անվտանգության խորհուրդն ազդեցիկ կառույց էր՝ լուրջ լիազորություններով, ազդեցիկ միջազգային կապերով, այն բազմաթիվ խնդիրների համակարգման կարևորագույն մեխանիզմ էր։ Ձևավորված գործընկերային կապերի շնորհիվ մենք կարողանում էինք մեր անվտանգության հարցերը լսելի, քննարկելի և լուծելի դարձնել մեր շատ ազդեցիկ գործընկերների հետ։ Թե՛ երկրի ներսում, թե՛ նրա սահմաններց դուրս մեծ աշխատանք էր կատարվում։

Անվտանգության խորհրդի քարտուղարը մասնակցում է ՀԱՊԿ անդամ երկրների նիստին

Իմ հեռանալուց հետո՝ անցնող այս 6 տարիներին, ցավոք, կարևորագույն այս կառույցը կորցրեց իր շատ գործառույթներ։ Ինչպիսին են հիմա ՌԴ և ՀՀ ԱԽ-ների հարաբերությունները՝ տեղյակ չեմ խորությամբ, բայց կարծում եմ՝ գործնական և աշխատանքային։ Համենայնդեպս, ճանաչելով Պատրուշևին և իմանալով ՌԴ ԱԽ գործելաոճը՝ համոզված եմ գործընկերային հարաբերությունների մեջ, մանավանդ, որ ՀՀ ԱԽ-ն ևս շահագրգիռ կլինի այս գործակցությունը զարգացնելու առումով, առավել ևս վերջին զարգացումների լույսի ներքո։

-Պատրուշևի հետ Ձեր հանդիպման պաշտոնական տեղեկատվության մեջ նշվում է, որ քննարկվել է նաև գերիների հարցը: Նշվե՞լ են արդյոք այդ գործընթացի իրականացման կոնկրետ ժամկետներ: 

- Մեր հանդիպման ընթացքում քննարկվել է հարցերի լայն շրջանակ, դա վաղեմի բարեկամների և գործընկերների զրույց էր, և ես պետական պաշտոնյա չեմ։ Հարցերը ներառում էին գերիների փոխանակման, սահմանների դեմարկացիայի, անհետ կորած զինվորների վերադարձի, ականազերծման և այլ հարցեր։ Ինչպես ես տեղեկացա Լեռնային Ղարաբաղի հետ կապված հարցերը գտնվում են ՌԴ նախագահ Պուտինի և ՌԴ Անվտանգության խորհրդի անմիջական ուշադրության կենտրոնում։

Ռազմագերիների և անհայտ կորածների խնդիրներն առաջնային են, մարդասիրական բնույթ են կրում և այդ հարցով զբաղվում են ամենօրյա ռեժիմով։ Մենք բոլորս անհամբեր սպասում ենք նրանց վերադարձին և բոլորս պետք է համադրենք մեր ուժերը, որպեսզի դա հնարավորինս արագ տեղի ունենա: Եվ դա գերակա էր դիտարկվում նաև պարոն Պատրուշևի հետ մեր հանդիպման ընթացքում:

-Որպես ԱԽ նախկին քարտուղար և պետական, քաղաքական գործիչ, ինչպե՞ս եք գնահատում Հայաստանում ստեղծված հետպատերազմյան իրավիճակը:

-Իրավիճակը Հայաստանում իսկապես մտահոգիչ է։ Տարերային որոշումների հետևանքով ունեցանք մեծ բացթողումներ, թերացումներ և կորուստներ։ Երբ պետությունը չի կառավարվում ինստիտուցիոնալ մեխանիզմներով, երբ չեն հաշվարկվում անվտանգային միջավայրի ռեալ մարտահրավերնրը, երբ բացակայում են ռազմաքաղաքական իրավիճակի օբյեկտիվ գնահատման, վերլուծության, հակազդման գործողությունները, երբ պատշաճ չեն իրականացվում քաղաքական, դիվանագիտական, ռազմական, հետախուզական, տեղեկատվական և բազմաթիվ այլ ուղղություններով գործողությունները, ունենում ենք այն ինչ ունեցանք։

Ռուսաստանին և Իրանին ձեռնտու չէ Արցախը թուրքոմաններով և վարձկաններով բնակեցնելը

Տեսեք, Նախիջևանում տեղի ունեցած թուրք- ադրբեջանական լայնամասշտաբ զորավարժություններից հետո տեղեկատվության նույնիսկ բաց աղբյուրները թմբկահարում էին վերահաս պատերազմի մասին։ Ցավոք, պատշաճ վերլուծություններ չեղան։ Քիչ չեն նաև սխալները, թերությունները 44-օրյա պատերազմի օրերին։ Ավելին, իրավիճակի ոչ սթափ վերլուծությունը, օպերատիվ մարտավարական որոշումների հախուռնությունը, հաստակ ինսիտուցիոնալ կառավարման համակարգի բացակայությունը, հատկապես պատերազմական իրավիճակում, հանգեցրեց տարերային որոշումների, որի ցավալի արդյունքների ականատեսը եղանք։

-Ո՞րն է ելքը, և արդյոք պատրաստվու՞մ եք միանալ վարչապետի հրաժարականը պահանջող ուժերին և գործընթացներին։

-Ելքը, իմ կարծիքով, արտահերթ ընտրությունների անցկացումն է, որի մասին հրապարակային խոսել եմ դեռևս 20 օր առաջ։ Այսօր մենք ունենք բոլորովին նոր իրավիճակ։ Իշխանությունը հայտարարել և ստանձնել է հայտնի փաստաթղթի ստորագրման պատասխանատվությունը, ինչն էլ առաջին հերթին նշանակում է վստահության քվեի խնդրի լուծում։ Անհնարին է ազգի համար նման շրջադարձային որոշում կայացնելուց հետո չդնել վստահության հարցը։

Դա ընդամենը ժամանակի հարց է։ Ժողովուրդը պետք է ազատ կամարտահայտությամբ որոշում կայացնի։ Եվ ես համոզված կողմնակիցն եմ, որ այն տեղի ունենա իշխանության և ընդդիմության միջև քաղաքակիրթ բանակցությունների արդյունքում, առանց ցնցումների և բախումների, հստակ ճանապարհային քարտեզով, որի մեջ պետք է ներառվեն կառավարման ձևի փոփոխություններով կիսանախագահական համակարգին անցումը և 100% համամասնական համակարգին անցումն առանց ռեյտինգային համակարգի։

Վստահ եմ, որ հենց ընտրություններն են և դրա արդյունքում ձևավորված իշխանությունն է, որ պետք է գա լուծելու մեր ազգի առջև ծառացած լրջագույն մարտահրավերները։ Ես ուշադիր հետևում եմ տեղի ունեցող գործընթացներին, չեմ վերադարձել ակտիվ քաղաքականություն, և ըստ անհրաժեշտության հայտնում եմ իմ հրապարակային դիրքորոշումները:

2122
թեգերը:
Արցախյան պատերազմ, Լեռնային Ղարաբաղ, Անվտանգության խորհրդի քարտուղար, Անվտանգության դաշնային ծառայություն (ԱԴԾ), Արթուր Բաղդասարյան, Ռուսաստան, Նիկոլայ Պատրուշև
Ըստ թեմայի
«Գնում եմ Արցախ, որ հետո տղաս չգնա». բժիշկ Նարեկն Ապրիլյանից վերադարձավ, հիմա չստացվեց
Արցախյան վերանվաճում, կամ Հայաստանում հնարավո՞ր է «գերմանական հրաշքի» կրկնություն
Կկարողանա՞նք արդյոք հաղթահարել արցախյան սինդրոմը, կամ սգո պսակներ՝ դափնեպսակների փոխարեն
Վահան Քերոբյան

Պիտի հասկանանք` ինչ ենք կորցրել, և գտնենք դրանք վերականգնելու մեխանիզմները. Վահան Քերոբյան

998
(Թարմացված է 23:16 28.11.2020)
ՀՀ էկոնոմիկայի նորանշանակ նախարար Վահան Քերոբյանը Sputnik Արմենիայի հետ հարցազրույցում ներկայացրել է իր ծրագրերն ու անելիքներն այդ պաշտոնում: Անդրադարձել է նաև Արցախում անցկացրած 52 օրերին ու բանակում իր արձանագրած խնդիրներին:

- Պարո՛ն Քերոբյան, շնորհավորում ենք պաշտոնը ստանձնելու կապակցությամբ ու նաև խնդրում ենք պատմել՝ ինչպես ստացաք այդ առաջարկն ու ինչպես որոշեցիք ընդունել այն՝ հատկապես այս դժվարին ժամանակահատվածում:

- Առաջարկը ստացել եմ վարչապետի հետ մեր վերջին հանդիպման ժամանակ, կարծեմ՝ երկուշաբթի օրը: Միանգամից չեմ համաձայնել, քանի որ որոշ հարցեր կային ճշտելու աշխատանքի ու պահանջների հետ կապված՝ ինչ է պահանջվում, ինչ խնդիրներ է պետք լուծել, արդյոք դրանք համապատասխանում են իմ պատկերացումներին, թե ոչ: Հիմա, հասկանալով պատկերացումներն ու ինձ հետ կապված նպատակները, համաձայնեցի:

- Իսկ սպասելի՞ էր նման առաջարկ ստանալը:

- Այնպես չէ, որ լրիվ անսպասելի էր, որովհետև վարչապետի հետ հարաբերություն նախկինում ևս ունեինք, ու իմ մտքերը ես կարողանում էի հասցնել վարչապետին ու կառավարությանը, ու կար երկխոսություն, որի արդյունքում վարչապետի համար պարզ դարձավ, որ այս հանգրվանում ես գուցե կկարողանամ օգտակար լինել իմ երկրին:

- Ձեր բիզնեսը՝ Menu.am-ը, փաստորեն թողնո՞ւմ եք: Ի՞նչ եք անելու Ձեր բիզնեսը:

- Դե, այսօրվա դրությամբ Menu.am-ի ամենախոշոր բաժնետերն եմ: Այդ բաժնետոմսերը դեռևս մնում են իմ սեփականությունը, բայց, համաձայն օրենքի, ես պետք է այն հավատարմագրային կառավարման տամ: Ինչ վերաբերում է գործադիր պաշտոններին՝ տնօրենների խորհրդի անդամի և գործադիր տնօրենի պաշտոններին, ապա ես արդեն հրաժարական եմ ներկայացրել վճարովի պաշտոնից, այսինքն՝ գործադիր տնօրենի պաշտոնից, իսկ խորհրդի անդամի պաշտոնից մինչև մեկ ամիս ժամանակ ունեմ, կհասցնեմ բաժնետոմսերս տալ հավատարմագրային կառավարման և զիջել իմ տեղը տնօրենների խորհրդում:

- Արդեն մի քանի օր է, ինչ մամուլում հիշատակվում է Al Jazira-ին տված Ձեր հարցազրույցը, որտեղ ասում եք, թե երկրի ղեկավարությունը մեզնից թաքցնում էր պատերազմում տիրող ռեալ իրավիճակը: Ի՞նչ նկատի ունեիք:

- Ես ասել եմ` «վերջին տասնամյակներում»: Իմիջիայլոց, այդ արտահայտությունը Al Jazira-ն կտրել է: Վերջին տասնամյակներում մեզ միշտ ասել են, որ մեր բանակը հզոր է, որ մեր բանակում ամեն ինչ կա, մեր բանակը տարածաշրջանի ամենամարտունակ բանակն է և այլն, ինչը, կռվի դաշտում պարզվեց, որ չի համապատասխանում իրականությանը: Իմ կարծիքով` մենք ունենք շատ վատ կառավարվող կառույց, ու եթե դա չընդունենք, բնականաբար, չենք կարող զարգացնել այն: Կարծում եմ`հիմա ժամանակն է ճիշտը խոսել բանակի մասին և, բնականաբար, ձեռնամուխ լինել արմատական բարեփոխումներին, ինչն արդեն ընթացքի մեջ է:

50-52 օր ես եղել եմ այնտեղ՝ պատերազմի առաջին օրվանից մինչև նոյեմբերի 18-ը, իսկ իմ եղբայրներն ու մեր ընկերները մինչև օրս էլ դեռ այնտեղ են: Մենք համառորեն պաշտպանեցինք այն դիրքերը, որոնք կմնան Հայաստանի կամ Արցախի տիրապետման տակ: Այդ 52 օրվա մեջ ես ընդամենը 1 անգամ եմ տեսել համակարգիչ և ցանկացած էլեմենտից՝ մեր տեղաշարժի և այլն, պարզ է դարձել, որ մենք թուղթ ու գրիչով ենք կառավարում բանակը: 21-րդ դարում չի կարող նման բան լինել, և տեղեկատվական տեխնոլոգիաները պետք է ամբողջությամբ ներծծվեն այդ կառույցի մեջ:

- Ձեր այս տպավորություններով Դուք արդեն կիսվե՞լ եք կառավարության անդամների, վարչապետի հետ:

- Ոչ ամբողջությամբ։ Բնականաբար, այն, ինչ ես եմ տեսել, բազմաթիվ մարդիկ իրենց հրապարակային ելույթներում ասել են: Միգուցե ես ինչ-որ նոր բաներ կասեմ, բայց հիմնական հետևությունը, որ կարելի է անել, այն է, որ բանակին տրամադրվել են հսկայական ռեսուրսներ, որոնք, կարելի է ասել, արդյունավետ չեն օգտագործվել:

Մեր հրամանատարական կազմի ներկայացուցիչները խոստովանեցին, որ վերջին 25 տարում բանակը չի եղել գրավիչ տեղ խելացի մարդկանց համար: Հետևաբար բանակի պետությունը չի կարողացել ներգրավել բավարար քանակով տաղանդավոր մարդկանց, որոնք կկարողանային կառուցել ապագայի բանակ:

Չեմ ուզում մեղավորներ փնտրել։ Մեղքի բաժին բոլորս ունենք: Ես ինքս որոշ բաների վրա աչք եմ փակել, ինչ-որ բաներ ասել եմ՝ լավ, դե սա իմ գործը չէ, ու արդյունքում ունենք այն, ինչ ունենք: Հիմա պետք է բացարձակապես անհանդուրժելի դառնա հարմարվողականությունը: Մենք պետք է չհամակերպվենք այն վիճակի հետ, որն այսօր կա ու շտկենք, որպեսզի կարողանանք արագ, բեկումնային աճ արձանագրել այդտեղ ու ոչ միայն այդտեղ, այլև ամբողջ տնտեսության մեջ:

- Պարզ է, որ մեր տնտեսությունն այսօր շոկային վիճակում է. առաջին հարվածը ստացել էր կորոնավիրուսի համավարակի պատճառով, իսկ երկրորդն արդեն պատերազմից ստացավ։ Ի՞նչ քայլեր եք ձեռնարկելու, որպեսզի տնտեսությունը դուրս բերեք այդ վիճակից:

-Ես, իհարկե, ունեմ իմ պլանը, բայց քանի որ այն պետք է վերածվի կառավարության որոշումների, ապա ես այս պահին զերծ կմնամ դրանք կետ առ կետ թվարկելուց: Բայց ես արդեն ասել եմ, որ իմ հիմնական դերը տեսնում եմ բոլոր այն խոչընդոտները վերացնելու մեջ, որոնք այսօր կանգնած են բիզնեսի առաջ, որպեսզի գործարար համայնքը կարողանա անկաշկանդ և ստեղծագործ ձևով աշխատել և զարգացնել երկրի տնտեսությունը:

- Ո՞րն եք համարում ամենամեծ խոչընդոտը:

- Միայն ես չէ, որ այդպես եմ համարում: Եթե դուք ուշադրություն դարձնեք Դավոսի համաշխարհային տնտեսական ֆորումի ամենամյա գլոբալ մրցունակության զեկույցում Հայաստանին վերաբերող հատվածին, ապա կտեսնեք, որ տասնամյակներով Հայաստանի գործարարները հարցումներին պատասխանելիս շեշտել են, որ կոռուպցիայից, հարկերից ու բյուրոկրատիայից ավելի շատ մեր տնտեսության զարգացմանը խանգարում է ֆինանսական միջոցներին անհասանելիությունը, անմատչելիությունը: Բնականաբար, դրանից էլ պետք է սկսել, որպեսզի տնտեսության մարմնի մեջ բավարար չափով արյուն լցվի:

- Հայաստանի տնտեսությունը սերտորեն կապակցված է Արցախի հետ: Մենք այսօր ունենք կորցրած տարածքներ, որտեղ ցորեն էր մշակվում: Փորձագետներն ասում են, որ սա խնդիր է լինելու ապագայում մեր տնտեսության համար: Ի՞նչ հակաճգնաժամային ծրագրեր ունեք այս կորուստը կոմպենսացնելու համար:

- Ամենամեծ խնդիրը, որ կար Արցախում, այն էր, որ 30 տարում մենք այդպես էլ չենք կարողացել ընդունելի մակարդակով յուրացնել այդ տարածքները՝ զարգացնել տնտեսությունը, ավելացնել բնակչությունը և այլն: Կարելի է ասել, որ այդ տարածքների մեծ մասն անապատ էր: Հիմա, բնականաբար, այն մարդիկ, որոնք բիզնես են ունեցել Արցախում ու կորցրել են, լինելու են ուշադրության կենտրոնում, քանի որ նրանք կարողացել էին Հայաստանից շատ ավելի ծանր պայմաններում լինել հաջող բիզնեսմեն: Նման մարդկանց պետք է փրկել, և ես պետք է հանդիպեմ այդ մարդկանց հետ ու տեսնեմ, թե ինչով կարող ենք վերակենդանացնել իրենց կորցրած բիզնեսները:

Ինչ վերաբերում է դրա հետ կապված ճգնաժամին, նախ պետք է մանրամասն հաշվառում անել, որովհետև առաջին հայացքից այդ տարածքներում առանձնապես մեծ տնտեսություն չի եղել: Մի խոսքով` պետք է հասկանալ՝ ինչ ենք կորցրել, և արագ գտնենք դրանք վերականգնելու մեխանիզմները:

998
թեգերը:
Նախարար, Վահան Քերոբյան, Հայաստան
Ըստ թեմայի
Ֆանտազիայի ժանրից է, ինչ ասեմ. Մանե Թանդիլյանը մեկնաբանել է իրեն պաշտոն առաջարկելու լուրը
«Իմ քայլը» պահանջում է պատժել Երևանի պատասխանատու պաշտոնյաներին` թվեր նկարելու համար
Արթուր Վանեցյանը նոր փակագծեր բացեց իր` ԱԱԾ տնօրենի պաշտոնից հրաժարվելու վերաբերյալ
Ստեփանավանը քաղաքապետի պաշտոնակատար ունի
Վալերի Ժիսկար դ՛Էսթենը

Մահացել է Ֆրանսիայի նախկին նախագահ Վալերի Ժիսկար դ՛Էսթենը

0
(Թարմացված է 10:37 03.12.2020)
Ավելի վաղ՝ սրտային անբավարարության պատճառով, Վալերի Ժիսկար դ՛Էսթենին հոսպիտալացրել էին Ֆրանսիայի Թուրա քաղաքի հիվանդանոցներից մեկում։

ԵՐԵՎԱՆ, 3 դեկտեմբերի – Sputnik. 94 տարեկանում մահացել է Ֆրանսիայի նախկին նախագահ Վալերի Ժիսկար դ՛Էսթենը։ Մահվան պատճառը դարձել է կորոնավիրուսը։ Տեղեկությունը հայտնում է France-Presse գործակալությունը՝ հղում անելով նախկին նախագահի ընտանիքին։

Նշենք, որ  Վալերի Ժիսկար դ՛Էսթենը Ֆրանսիայի նախագահ է եղել 1974-1981 թվականներին։

«Վալերի Ժիսկար դ՛Էսթենը մահացել է դեկտեմբերի 2-ին՝ իր տանը։ Նրա կամքի համաձայն` հուղարկավորությունը կկատարվի նեղ ընտանեկան շրջանակում»,-նշված է հաղորդագրության մեջ։

Ավելի վաղ՝ սրտային անբավարարության պատճառով Վալերի Ժիսկար դ՛Էսթենին հոսպիտալացրել էին Ֆրանսիայի Թուրա քաղաքի հիվանդանոցներից մեկում։

Ֆրանսիայի Ազգային ժողովը երեկվա նիստում մեկ րոպե լռությամբ հարգել է նախկին նախագահի հիշատակը։

0
թեգերը:
Մահ, Նախագահ, Ֆրանսիա