ԵՐԵՎԱՆ, 31 օգոստոսի — Sputnik. Մոսկվայի «Արարատ» ակումբի նախագահ Վալերի Հովհաննիսյանի հրաժարականն անակնկալ էր, քանի որ ակումբը որևէ ֆինանսական խնդիր չուներ և բացի այդ էլ, համալրված լինելով բազմաթիվ փորձառու ֆուտբոլիստներով, շատ լավ է հանդես գալիս Ռուսաստանի 2-րդ լիգայի առաջնությունում և գավաթի խաղարկությունում: Այդուհանդերձ Մոսկվայի «Արարատ» թիմի պաշտոնական կայքում նախօրեին հրապարակվեց մի լուրը, ըստ որի` Հովհաննիսյանն առողջական խնդիրներ ունի, ինչ էլ հանդիսացել է հրաժարականի պատճառը:
«Այո, ես ակումբից հեռացել եմ առողջական խնդիրների պատճառով: Կարճ ասած` բուժման կարիք ունեմ, իսկ ակումբի նախագահի պաշտոնը զբաղեցնելով` այդ մասին մտածելու ժամանակ պարզապես չունեմ: Այդ պատճառով ինձ դադար է հարկավոր»,– Sputnik Արմենիային ասաց Վալերի Հովհաննիսյանը։
Նա նաև նշեց, որ իր սիրած գործով կրկին զբաղվելու հույսը չի կորցնում։
«Ես ֆուտբոլից չեմ հեռանում, այլ այս պահին պարզապես բուժվելու կարիք ունեմ: Հուսով եմ` շատ շուտով կկարողանամ նորից զբաղվել իմ սիրած գործով»,- նշեց Հովհաննիսյանը:
Վալերի Հովհաննիսյանը երկար ժամանակ մտածում էր Մոսկվայում հայկական ակումբ ստեղծելու մասին ու կարողացավ գտնել համախոհներ, ու հիմնվեց Մոսկվայի «Արարատը»:
Լինելով նաև փորձված ֆուտբոլային գործակալ` նա կարողացավ «Արարատի» կազմում ընդգրկել Ռուսաստանի հավաքականի նախկին ֆուտբոլիստների, որոնք իրենց փորձով անգնահատելի օգուտ են տալիս «Արարատին»։ Այսօր Մոսկվայի «Արարատը» Ռուսաստանի ֆուտբոլի 2-րդ լիգայի Կենտրոն գոտում առաջատար է, անցկացրած վեց խաղերից հինգում հաղթանակ է տարել ու մեկ հանդիպում էլ ավարտել ոչ-ոքի:
