Աննա Վարդանյան, Sputnik.
Հայն իր տեսակով սպառող է. սա երկրի գլխավոր ֆինանսիստի դիտարկումն է: Ֆինանսների նախարար Վարդան Արամյանի գնահատմամբ ավելի խնայող է ասիական տարածաշրջանի ժողովուրդը: Ամերիկացիները՝ համեմատ ամերիկացիների, սպառողական վարքագծի կրող են։ Չինացիներն, օրինակ, չեն վատնի վերջին կոպեկը: Եթե նույն հարյուր դոլարը հայտնվի և՛ ամերիկացու, և՛ չինացու գրպանում, ապա չինացին հարյուրից քառասունը կխնայի, իսկ ամերիկացին այն կծախսի մինչև վերջին կոպեկը:
«Տնտեսական աճի նման տեմպերով շարժվելու դեպքում ՀՆԱ- ի ծավալով 2022 — 25 թթ–ներին Չինաստանը կհասնեն Միացյալ Նահանգներին», —համոզված է Վարդան Արամյանը: Նախարարի խոսքով`այստեղ գործում է ոսկե կանոնը՝ խնայող հասարակությունն ավելի բարձր տնտեսական աճ կունենա:
Սպառող է նաև մեր հասարակությունը: Եվ սա ազգային մենթալիտետ է։ «Հավասարաչափ վաստակող երկու ընտանիքի օրինակ բերենք: Մեկն այցելում է ճոխ ռեստորաններ, վարում է թանկարժեք մեքենա, մյուս էլ նույնն ավելի համեստ է անում, ավելին՝ գումարի մի մասն էլ բիզնեսի մեջ է ներդնում: Երկրորդ ընտանիքն ավելի կբարելավի իր տնտեսական վիճակը: Սա խնայելու շատ պարզ եղանակ է»:
Սպառողից խնայող հասարակությանն անցնելու և ազգային նկարագիրը փոխելու համար, ըստ երկրի գլխավոր ֆինանսիստի, ժամանակ է պետք: Նախարարը գիտակցում է, որ մենթալիտետ փոխելը բարդ է, բայց և համոզված է, որ գործիք կա: Կուտակային կենսաթոշակային համակարգին անցնելը խնայելու լավագույն գործիքներից է:
«Կենսաթոշակային համակարգի թիրախն ապագա թոշակառուն է: Իսկ մեր նպատակն ապագա թոշակառուի վաղվա օրն ապահովելն է: Այսօր կուտակվող միջոցները վաղվա խնայողությունն են», — ասում է նախարարը։
Վարդան Արամյանը համակարծիք է, որ երկրի ոչ կայուն տնտեսական վիճակի ու ԽՍՀՄ–ի օրոք խնայած գումարների տխուր ճակատագրի հետ կապված, համակարգի ներդրման նկատմամբ կա անվստահություն:
«Դա օբյեկտիվ քննադատություն է․այն ինչ տեսանք 2013 — 14 թթ.– երին, խնդիր էր: Մենք, երևի, չկարողացանք մաքսիմալ ճիշտ ձևով կենսաթոշակային համակարգի լավ կողմերը ներկայացնել մեր հանրությանը` հիմնականում երիտասարդությանը, որն էլ այսօրվա խնայողն ու վաղվա օգտվողն է։ Նրանք այս համակարգի ջատագովը լինելու փոխարեն, հակադրվեցին»,- ասում է Արամյանը և ավելացնում, որ այսօրվա միջին և բարձր վաստակողը, որպեսզի վաղը կենսամակարդակի անկում չունենա և չդժգոհի իր ցածր թոշակից, պետք է կուտակի:
Ի դեպ, այսօր արդեն յուրաքանչյուրը կարող է սեփական աչքով տեսնել ու հետևել իր միջոցների կուտակման շարժին՝ անվանական բանկային քարտի օգնությամբ: Դրա համար պարզապես անհրաժեշտ է մուտքագրել գաղտնաբառը և ստուգել կենսաթոշակային հաշիվը: Վաղը, մյուս օրը Վարդան Արամյանը կլինի նախարար, թե մեկ ուրիշը կուտակված միջոցները փոփոխության չեն ենթարկվի:
