Գազամուղ

ՀՀ-ն 30 մլն խորանարդ գազ կխնայի հայ-ադրբեջանական սահմանին գազամուղի վերանորոգումից հետո

418
(Թարմացված է 17:36 25.12.2020)
Հունիսից Հայաստանի գազային ցանցի կորուստները կրճատվել են ամսական 2-3 միլիոն խորանարդ մետր գազով, իսկ 2030 թվականն ընդհանուր կորուստները կկրճատվեն գրեթե երկու անգամ՝ 5,7% -ից կհասնեն 3%-ի։

ԵՐԵՎԱՆ, 24 դեկտեմբերի — Sputnik. Հայաստանը 30 միլիոն խորանարդ մետր գազ կխնայի հայ-ադրբեջանական սահմանի գազատարի վերանորոգման շնորհիվ։ Տեղեկությունը Sputnik Արմենիայի հետ զրույցում հայտնեց «Գազպրոմ Արմենիայի» գլխավոր տնօրեն Հրանտ Թադևոսյանը։

Հայաստանի հյուսիս-արևելքում գազատարի գլխավոր ճյուղի հատվածներից մեկը՝ Ադրբեջանի հետ սահմանին, վնասվել է 90-ականների մարտական գործողությունների ժամանակ։ Այնտեղ ավելի քան 20 տարի խոշոր անցքեր կային։ 2020 թվականի գարնան-ամռանը հաջողվեց վերանորոգել գազատարը, ընդ որում՝ և Վրաստանից Հայաստան եկող ճյուղավորումը, և բուն հայկական տարածքի հատվածը։

Նախկինում Հայաստանն այդ անսարքությունների պատճառով կորցնում էր հանրապետություն մտնող գազի 1,5%-ը, դա տարեկան մոտ 30 միլիոն խորանարդ մետր է։ Կոպիտ հաշվարկներով՝ հենց այդքան գազ է սպառում 15-17 հազար ընտանիք մեկ տարում։

«Մենք արդեն հունիսից, երբ ավարտվեցին աշխատանքները, սկսեցինք զգալ վերանորոգման արդյունքը։ Ամսական 2-3 միլիոն խորանարդ մետր ենք տնտեսում, տարեկան մոտ 30 միլիոն է ստացվում», - ավելացրեց Թադևոսյանը։

Նա հիշեցրեց, որ Հայաստանի գլխավոր գազատարներն ընդհանուր առմամբ շատ մաշված են․ գազատրանսպորտային համակարգի մոտ 40%-ը 30 տարուց հին է։ Առաջիկայում վերանորոգումը կշարունակվի նաև այլ ուղղություններով, այդ թվում նաև սահմանամերձ Բերդ քաղաք տանող ճյուղի վրա, որը նույնպես երկրի հյուսիս-արևելքում է,  նաև Գորիսի շրջանում՝ հարավում, ու մի շարք այլ ուղղություններով։

Այժմ գազի կորուստը համակարգում մոտ 5,7% է կազմում։ Ծրագրած աշխատանքի արդյունքում՝ 2025 թվականին, կորստի մակարդակը պետք է նվազի մինչև 3,9%, իսկ 2030 թվականին մինչև 3,0%։

Ինչ վերաբերում է Արցախ տանող գազատարին, Թադևոսյանն ասաց, որ այն մարտական գործողությունների ժամանակ տուժել է, բայց արդեն վերականգնվել է։ Նա ընդգծեց, որ օրերս համացանցում վնասված խողովակի լուսանկարներ էին հայտնվել, բայց դրանք արվել են հոկտեմբերին, ոչ թե այսօր։

 «Արցախի բաշխիչ ցանցի ներկայիս իրավիճակի մասին հստակ չեմ կարող խոսել, քանի որ այն ոչ թե մեր, այլ մեր արցախյան գործընկերների կառավարման տակ է։ Բայց իմ տեղեկություններով՝ բաժանորդների գազամատակարարումը հիմնական վերականգնված է», - ավելացրեց նա։

«Գազպրոմ Արմենիան» «Գազպրոմ» ընկերության դուստր ձեռնարկությունն է, զբաղվում է Հայաստանում բնական գազի մատակարարուրմամբ ու բաշխումով։

418
թեգերը:
«Գազպրոմ Արմենիա» ընկերություն, գազատար, Հայաստան
Ըստ թեմայի
Վրաստանն ադրբեջանական գազի համար հատուկ զեղչ է ստացել
«Հյուսիսային հոսք–2»․ ինչու է ԱՄՆ-ն խանգարում գազամուղի կառուցմանը
Ադրբեջանի բանակը չի պայթեցրել Իրան-Հայաստան գազամուղը․ ՏԿԵ
Հաց ու ձու

ՀՀ–ում հացն ու ձուն դեռ չեն թանկանա, սակայն մի «բայց» կա. ի՞նչ են առաջարկում փորձագետները

52
Առաջին անհրաժեշտության մթերքը՝ հացը, միսն ու ձուն, կարող են թանկանալ առաջին հերթին փոխարժեքի տատանումների պատճառով։ Փորձագետները նախանշվող ճգնաժամից դուրս գալու ուղիներ են առաջարկում։

ԵՐԵՎԱՆ, 25 հունվարի – Sputnik, Լաուրա Սարգսյան. Հայաստանում հացի, հավի մսի և ձվի գները մոտ ապագայում նույնը կմնան և չեն բարձրանա։ Մի կողմից՝ ձեռնարկությունները դեռ անցած տարի հացահատիկի բավարար պաշար են գնել, ինչն էլ հենց թույլ կտա որոշակի կայունություն պահպանել մոտակա մեկուկես ամսում։ Մյուս կողմից՝ Հայաստանը ԵԱՏՄ անդամ է և Ռուսաստանի սահմանած արտահանման քվոտան մեր երկրին չի վերաբերի։

Սակայն արդեն գարնանը իրավիճակը կարող է փոխվել ի վնաս սպառողի, եթե հացահատիկի համաշխարհային գներն աճեն կամ շարունակվի ազգային արժույթի արժեզրկումը։

Ալյուրի արտադրությամբ զբաղվող «Մանանա Գրեյն» ձեռնարկության (խոշորագույններից մեկն է Հայաստանում) ղեկավար Գուրգեն Նիկողոսյանը Sputnik Արմենիայի թղթակցի հետ զրույցում նշեց, որ ալյուրի և համապատասխանաբար հացի վրա ազդեցություն չի ունենա նաև էլեկտրաէներգիայի գնի առաջիկա բարձրացումը։ Ըստ կանխատեսումների՝ էլեկտրաէներգիայի արժեքը 1 կվտ-ի դիմաց կավելանա 3 դրամով, իսկ դա այն գումարը չէ, որ արտադրողներին ստիպի ապրանքների գները բարձրացնել սպառողի համար։

«Հույս են ներշնչում նաև արտաքին գործոնները։ Ինչպես գիտեք, Ռուսաստանը փետրվարից նախատեսում է հացահատիկի արտահանման քվոտա սահմանել, ինչի արդյունքում փետրվարին մեկ տոննա ցորենի համար 25 եվրո մաքսատուրք կսահմանվի, որն այնուհետև ևս այդքանով կավելանա նաև մարտին»,-ասաց Նիկողոսյանը։

Փորձագետը պարզաբանեց, որ սահմանված տուրքը թույլ կտա հացահատիկի գները չբարձրացնել Ռուսաստանի ներքին շուկայի համար։ Այդ դասակարգման մեջ է նաև Հայաստանը՝ որպես ԵԱՏՄ անդամ։

Այս պահին Հայաստանում 1 կիլոգրամ ցորենն արժե 188 դրամ։

Հայաստանի թռչնաբույծների միության նախագահ Սերգեյ Ստեփանյանը Sputnik Արմենիայի հետ զրույցում նշեց, որ առաջիկա մեկուկես ամսում պետք չէ սպասել նաև ձվի և մսամթերքի թանկացման:

«Մենք մեր պաշարներն ունենք, դեռ հոկտեմբերին ենք գնել՝ պատերազմի և համավարակի հետ կապված։ Այդ պատճառով մոտակա մեկուկես ամսում գների փոփոխություն չի կանխատեսվում։ Չեմ կարող ասել, թե հետո ինչ կլինի, ամեն ինչ կախված է համաշխարհային շուկայի գներից և դրամի կայունությունից»,-ասաց նա։

Ստեփանյանի խոսքով` իրավիճակի անկայունության պատճառը նաև այն է, որ ճանապարհները պարբերաբար փակվում են, մեկ այլ պատճառ է նաև արցախյան հողերի կորուստը։ Այս ամենի հետևանքով է, որ մթերքի գներն անկայուն են ու պարբերաբար տատանվում են։

Իրավիճակը կարող է կայունացնել այլընտրանքային ճանապարհը դեպի Ռուսաստան։ Այս կապակցությամբ Հայաստանի իշխանությունները դեռ 2018 թ․-ին ծրագրում էին լաստանավային անցարան ձեռք բերել, որպեսզի գործի դնեն մուլտիմոդալ փոխադրումների տեսակը, երբ ինչ–ինչ պատճառներով Լարսը փակ լինի։ Այն ժամանակ մասնագետները պնդում էին, որ դա շահավետ կլինի, եթե միայն երկաթգծով տեղափոխելու համար զեղչեր արվեն, քանի որ երկաթուղին թեև անխափան երթևեկություն կապահովի, բայց ավելի երկար ու թանկ է, քան ավտոմոբիլային ճանապարհը։

Ռուսաստանից Հայաստան (Վրաստանով) ավտոմոբիլային ճանապարհով մեկ տոննա ցորեն բերելու համար փոխադրողը միջինը 53-56 դոլար է ծախսում։ Մինչդեռ լաստանավային անցարանով ու երկաթուղով տեղափոխումը 104-108 դոլար է գնահատվում։

Բիզնեսը մեկ խնդրի էլ բախվել է պատերազմից հետո։ Արցախը տարեկան հավաքում էր մոտ 100 հազար տոննա ցորեն (Հայաստանի ւ Արցախի ընդհանուր պահանջարկի մոտ 25 տոկոսը): Ցորենի դաշտերը հիմնականում գտնվում էին ցածրադիր շրջաններում, որոնց մեծ մասն անցել է Ադրբեջանի վերահսկողության տակ։ Հիմա այդ հարյուր հազար տոննան ստիպված են լինելու Արցախ մատակարարել Հայաստանից (լինի դա տեղական, թե ներկրված ցորեն)։

Ստեփանյանը համարում է, որ ելքը գյուղատնտեսության զարգացումն է։ Փորձագետը վստահ է, որ Հայաստանում հացահատիկային բույսեր մշակելու համար համապատասխան հողեր կան։ Նրա խոսքով՝ Հայաստանը կարող է այդ 25% բացը լրացնել սեփական արտադրանքով և 100 տոկոսով կախված չլինել արտաքին շուկայից։

Դրա համար անհրաժեշտ է որոշակի քայլեր ձեռնարկել և ժամանակավոր հարկային համաներում հայտարարել այդ մշակաբույսերի աճեցմամբ զբաղվող ֆերմերների համար։

Հայաստանում տարեկան սպառվում է 390-420 հազար տոննա հացահատիկ, որից 320-350 տոննան ներկրվում է։ Ինչ վերաբերում է ձվին, ապա ՀՀ–ում տարեկան ավելի քան 600 միլիոն հատ ձու է սպառվում։

52
թեգերը:
գին, Միս, ձու, Հաց, Հայաստան
Ըստ թեմայի
Որքան են բարձրացել գները Հայաստանում
ՀԷԿ–երի կորստից ֆինանսական վնասը մոտ 200 մլն դոլարի կարող է հասնել. «ՀԺ»
Հայաստանն Իրանի հետ կարող է համագործակցել առնվազն չորս ուղղություններով. Մակարյան
Եվրո

Հայաստանը 10 տարվա եվրապարտատոմսեր կտեղաբաշխի. աղբյուր

56
(Թարմացված է 14:50 25.01.2021)
Հայաստանը մի շարք հեռախոսազանգեր կանցկացնի ներդրողների հետ՝ նվիրված եվրապարտատմսերի տեղաբաշխմանը։

ԵՐԵՎԱՆ, 25 հունվարի – Sputnik. Հայաստանը ծրագրում է 10-ամյա եվրապարտատոմսեր տեղաբաշխել դոլարով։ Տեղեկությունը հայտնում է ՌԻԱ Նովոստին՝ հղում անելով ֆինանսական շրջանակների իր աղբյուրին։

Ըստ այդ աղբյուրի` Հայաստանն այսօրվանից մի շարք հեռախոսազանգեր կանցկացնի ներդրողների հետ՝ նվիրված եվրապարտատմոսերի հնարավոր տեղաբաշխմանը։

Կազմակերպիչներն են Citi-ն, HSBC-ն և J. P. Morgan-ը:

Վերջին անգամ Հայաստանը փոխառությունների միջազգային շուկա է մուտք գործել 2019 թվականի սեպտեմբերին։ Այն ժամանակ հայկական կողմը տեղաբաշխեց 500 մլն դոլարի եվրոպարտատոմսեր ՝ տարեկան 4,2 տոկոս եկամտաբերությամբ։

56
թեգերը:
եվրապարտատոմս, Հայաստան
Ըստ թեմայի
Տնտեսական միջավայրն անորոշության մեջ է. Թադևոսյանը` եկամտահարկի նվազման մասին
Հայաստանն ու Իրանը տնտեսական հուշագիր են ստորագրել
Երկրորդը ԵԱՏՄ-ում. Հայաստանում մանրածախ առևտրի շրջանառության ցուցանիշը նվազել է
Մերկասառույց

10 մեքենաներ արգելափակվել էին ձյան մեջ․ փրկարարներն օգնություն են ցուցաբերել

0
(Թարմացված է 00:04 26.01.2021)
Արգելափակված մեքենաները եղել են Գեղարքունիքի, Արագածոտնի և Կոտայքի մարզերում։

ԵՐԵՎԱՆ, 26 հունվարի – Sputnik. Վերջին մեկ օրվա ընթացքում փրկարարները հանրապետության տարբեր հատվածներում արգելափակումից մեքենաներ են դուրս բերել։ Տեղեկությունը հայտնում է ԱԻՆ մամուլի ծառայությունը։

«Հունվարի 24-ից 25-ն ԱԻՆ ՓԾ ճգնաժամային կառավարման ազգային կենտրոնում 10 ահազանգ է ստացվել հանրապետության տարբեր տարածքներում ձյան մեջ արգելափակված ավտոմեքենաների վերաբերյալ»,- նշված է հաղորդագրության մեջ։

Մասնավորապես, արգելափակված մեքենաները եղել են Գեղարքունիքի մարզի Գավառ, Վարդենիս, Վայոց ձորի մարզի Ջերմուկ, Արագածոտնի մարզի Ապարան քաղաքներում, Ջամշլու գյուղում, Կոտայքի մարզի Գեղարդ գյուղում, Ալագյազ-Վարդաբլուր ավտոճանապարհին։

Դեպքի վայր ժամանած փրկարարներն արգելափակումից դուրս են բերել 10 ավտոմեքենա։ 9 քաղաքացու ցուցաբերվել է համապատասխան օգնություն։

0
թեգերը:
ավտոմեքենա, ձյուն, Ճանապարհ
թեմա:
Վթար, պատահար, սպանություն, գողություն
Ըստ թեմայի
Գորիս-Տաթև ճանապարհը բքի պատճառով փակ է
Մի քանի օր շարունակ ձյուն չի տեղա. եղանակի տեսություն
Առատ ձյուն, ավտոերթ, դատ, հերոս-եղբայրներ. շաբաթվա տպավորիչ լուսանկարները