Բենզին

Հայաստանի բենզինն աշխարհի նավթի հետ կապ չունի՞. ինչու գնանկումն այստեղ չի հասնում

467
(Թարմացված է 19:01 22.04.2020)
Համաշխարհային շուկայում նավթի գինը հասել է պատմական մինիմումի, Հայաստանում բենզինի գինն այս փոփոխությանն առայժմ չի արձագանքում: Էներգետիկ անվտանգության ինստիտուտի տնօրեն Վահե Դավթյանը Sputnik Արմենիայի հետ զրույցում պարզաբանել է՝ ինչու:

ԵՐԵՎԱՆ, 21 ապրիլի — Sputnik, Նելլի Դանիելյան. Նավթի համաշխարհային գներն ապրիլի 20-ին համաշխարհային շուկայում հասան պատմական նվազագույնի: Ամերիկյան արտադրողները նյույորքյան շուկայում անգամ պատրաստ  էին իրենք վճարել իրենց նավթը գնել ցանկացողներին, միայն թե կարողանան ազատվել ավելցուկային ծավալից: Հայաստանում համաշխարհային շուկայի վայրիվերումները որևէ կերպ առայժմ նկատելի չեն: Բենզինի գինն այսօր գրեթե նույնն է, ինչ մարտի վերջին էր:

Այսպես՝ բենզինի տարբեր տեսակներն այսօր՝ ապրիլի 21-ին, երևանյան բենզալցակայաններում վաճառվում են 1 լիտրը 310-ից (ռեգուլյար) 440 (սուպեր) ՀՀ դրամի սահմաններում:

Համեմատության համար նշենք, որ համաձայն ՀՀ ՏՄՊՊՀ դիտարկումների, մարտի 30-ին բենզինը Հայաստանում վաճառվում էր 310-500 դրամով:

Թե ինչն է պատճառը, որ համաշխարհային նավթամթերքի շուկայում տեղի ունեցող փոփոխությունները Հայաստանի շուկայի վրա չեն ազդում, Sputnik Արմենիայի հետ զրույցում պարզաբանեց Էներգետիկ անվտանգության ինստիտուտի տնօրեն Վահե Դավթյանը:

Նա նախ հիշեցրեց, որ Հայաստանը նավթամթերք ներկրող պետություն է, հետևաբար նաև բենզինն ու այլ նավթամթերքները ևս Հայաստան են գալիս դրսից, հիմնականում՝ Ռուսաստանից:

«Այ եթե մենք ունենայինք նավթավերամշակման հզորություններ, ապա էժան նավթ ներկրելով` մենք կկարողանայինք վերամշակելով, ստանալ ավելի էժան բենզին ու առհասարակ նավթամթերք»,- ասաց նա:

Նավթային համերաշխություն․ ի՞նչ է լինելու հետո

Բայց քանի որ նման գործարան Հայաստանում չկա, 2013թ-ին ռուսական «Ռոսնեֆտ»-ի հետ կնքված պայմանագրով Հայաստան մտնող բենզինի առյուծի բաժինը ներկրվում է Ռուսաստանից: Ուստի բոլոր այն տատանումները, որ առկա են Հայաստանի շուկայում, Դավթյանը խորհուրդ է տալիս գնահատել ռուսաստանյան շուկայում առկա իրողությունների ֆոնին:

«Ռուսաստանի կառավարությունը վերջին տարիներին ձևավորել է մեխանիզմներ, որոնք թույլ են տալիս անգամ նավթամթերքի միջազգային շուկայում կտրուկ անկման պարագայում պահպանել նավթամթերքի գնի կայունությունը»,- ասում է Դավթյանը:

Բացի այդ, նրա խոսքով, բենզինի վերջնական գնի հաշվարկում նավթի գիննն ընդամենը 12-13% է կազմում: Հետևաբար, նավթի գնի անգամ կտրուկ անկումը բենզինի գնի վրա էական ազդեցություն, ըստ էության, չի ունենում:

Դե, իսկ երրորդ ու թերևս ամենակարևոր գործոնը, որը պայմանավորում է Հայաստանում բենզինի մանրածախ գինը, Դավթյանի դիտարկմամբ, Հայաստանի ներքին շուկայի առանձնահատկությունն է:

«Հայաստանի բենզինի շուկան մի միավոր է, որ գործում է առավելապես կարտելային համաձայնությունների սկզբունքների վրա: Այսինքն՝ առկա են մի քանի կազմակերպություններ, որոնք գործում են պայմանավորված գներով: Շուկան մեծ հաշվով մոնոպոլիզացված է, չկա մրցակցություն, որպեսզի միջազգային շուկայի ինչ-ինչ տատանումներն արտացոլվեն նաև ներքին շուկայի վրա»,- ասում է մասնագետը:

Հիշեցնենք, մարտ-ապրիլ ամիսներին բենզինի շուկայով հետաքրքրվել էր նաև ՀՀ ՏՄՊՊՀ-ն: Հանձնաժողովի նախագահ Գեղամ Գևորգյանը Sputnik Արմենիայի հետ հարցազրույցում հայտնել էր, որ բենզինի ու դիզվառելիքի շուկայում իրականացված ուսումնասիրությունների արդյունքում հակամրցակցային գործողությունների կասկածներ էին ի հայտ եկել, որոնք վարույթի ավարտին առաջիկայում կներկայացվեն նաև հանրությանը:

Կտրուկ անկումից հետո WTI տեսակի նավթի գինը նորից բարձրացել է

Դե, իսկ մինչ այդ մնում է հետևել համաշխարհային շուկայի իրողություններին ու սպասել դրանց արձագանքներին Հայաստանում:

Հիշեցնենք՝ մարտի 20-ին պատմության մեջ առաջին անգամ ամերիկյան WTI տեսակի նավթի գինը 0-ից ցածր էր իջել՝ հասնելով -37.63 դոլարի՝ 1 բարելի դիմաց:

Այս գինն ի դեպ, սահմանվել էր մայիսյան ֆյուչերսների համար, մինչդեռ հունիսի համար գինը դարձյալ բարձրացել էր՝ հասնելով մարտ-ապրիլի մակարդակին՝ 20- 25 դոլար մեկ բարելի դիմաց: Վահե Դավթյանի համոզմամբ, նման անկման պատճառը համաշխարհային տնտեսության մեջ նավթի պահանջարկի կտրուկ անկումն էր: Ըստ նրա, մարտին, երբ նավթի գինն աննախադեպ էժանացել էր, որոշ խոշոր ընկերություններ, օգտվելով այդ իրավիճակից, ձեռք էին բերել մեծ քանակությամբ էժան նավթ ու դրանով լցրել իրենց պահուսատարանները: Այս պահի դրությամբ, նրա խոսքով, աշխարհի նավթի պահուստարանների մեծ մասը լիքն է, և առկա է ավելցուկ, ինչն էլ ազդել է գների վրա:

«ՌԴ–ն անուղղակիորեն ստիպեց ԱՄՆ–ին միանալ նավթի կարտելային համաձայնությանը». Դավթյան

Բայց հունիսյան գներն արդեն ձևավորվում են այն կանխատեսումներով, որ ամռանը համաշխարհային տնտեսությունն աստիճանաբար կսկսի վերականգնվել: Ըստ կանխատեսումների` ամռանը ևս նավթի գինը չի գերազանցի 1 բարելի դիմաց 35 դոլարը:

467
թեգերը:
Տնտեսական մրցակցության պաշտպանության պետական հանձնաժողով (ՏՄՊՊՀ), գին, Հայաստան, բենզին, նավթ
Ըստ թեմայի
Վլադիմիր Պուտինը պարզեցրել է Ռուսաստանից Հայաստան նավթամթերքի արտահանման ձևակերպումը
Պուտինն ասել է, որ նավթի հարցով պատրաստ են պայմանավորվել ԱՄՆ–ի և Սաուդյան Արաբիայի հետ
Նավթի գինը կբարձրանա՞.  ՌԴ, ԱՄՆ և Սաուդյան Արաբիայի ղեկավարները բանակցել են
Հայկական ատոմային էլեկտրակայան. արխիվային լուսանկար

ԱԷԿ-ի սեյսմիկ անվտանգության հայկական համակարգը ցանկանում են տեղադրել Լատինական Ամերիկայում

62
(Թարմացված է 14:32 01.06.2020)
Համակարգը գրանցում է թույլ երկրաշարժերը և վերլուծում, թե դրանք ինչպես կարող էին ազդել ԱԷԿ-ի աշխատանքի վրա։ Իսկ 6 բալ և ավելի ուժգնության ցնցումների դեպքում այն ավտոմատ կերպով անջատում է ռեակտորը։

ԵՐԵՎԱՆ, 1 հունիսի – Sputnik. Լատինական Ամերիկայում գտնվող ռեակտորներից մեկի վրա ցանկանում են տեղադրել ատոմակայանների սեյսմիկ անվտանգության համակարգը, որը պատրաստվել է Հայաստանում։ Sputnik Արմենիայի հետ զրույցում տեղեկությունը հայտնեց «Հայատոմ» գիտահետազոտական ինստիտուտի տնօրեն Վահրամ Պետրոսյանը։

ՍԻԱԶ-3 համակարգը (երրորդ սերնդի հակասեյսմիկ պաշտպանության արդյունաբերական համակարգ) արդեն իսկ տեղադրվել է ՀԱԷԿ-ում՝ դրա հիմնանորոգման շրջանակում, որն իրականացնում է «Ռուսատոմ Սերվիս» ընկերությունը («Ռոսատոմ» կորպորացիայի կազմում)։

Համակարգի տվիչները մեծ եռանկյունու տեսքով տեղադրվում են երեք կետերում և ծածկում կայանի ամբողջ տարածքը: 6 բալից ուժգին ստորգետնյա ցնցման դեպքում սկսում է գործել ռեակտորի կառավարման և պաշտպանության համակարգի անջատիչը․ ռեակտորն ավտոմատ կերպով անջատվում է, ապա ռեակտորի մեջ անմիջապես իջեցվում են պաշտպանիչ մետաղական թիթեղներ, որոնք փակում են վառելիքային սռնիները և դադարեցնում միջուկային ռեակցիան։

Ատոմակայանի անվտանգության հայկական համակարգերով հետաքրքրված են արտասահմանում

ԱԷԿ-ի հերթական նման անջատումը տեղի ունեցավ վերջերս` մայիսի լույս 23-ի գիշերը՝ ուժեղ ամպրոպի պատճառով։ Ռեակտորի վիճակը ստուգելուց հետո կայանը վերագործարկվեց։ Դրա համար ընդամենը 24 ժամից մի փոքր ավելի ժամանակ պահանջվեց։

6 բալի դեպքում համակարգն ավտոմատ կերպով անջատում է ռեակտորը։ Բայց այն արձագանքում է նաև 3-6 բալ ցնցումներին։ Տվիչները տեղեկությունը փոխանցում են հատուկ գերհզոր համակարգչին, որը վերլուծում է, թե ինչպես կարող են թույլ ցնցումներն ազդել ռեակտորի, գեներատորների և կայանի մյուս սարքավորումների վրա։ 

Անցած տարի հայկական տեխնոլոգիան ներկայացվել էր Վիեննայում՝ ԱՏԷՄԻԳ-ի կենտրոնակայանում կայացած գիտաժողովի ժամանակ։ Փորձագետներն այն բարձր էին գնահատել։

Գիտաժողովի ավարտից հետո «Հայատոմ» ինստիտուտը նամակ է ստացել «Ռոսատոմի» ձեռնարկություններից մեկից: Այս ընկերության ինժեներները զբաղվում են Լատինական Ամերիկայի հետազոտական ռեակտորներից մեկի հագեցմամբ։ Գնահատելով հայկական տեխնոլոգիան ՝ նրանք գնային առաջարկ են ներկայացրել։

Այս համակարգը միայն ատոմակայանների վթարային պաշտպանության համար չէ, որ կարելի է օգտագործել։ Այն կարելի է հարմարեցնել թե՛ ՋԷԿ-ի համար, որտեղ այն կանջատի կաթսան, թե՛ գազատարների (խողովակի վթարային ճեղքվածքի դեպքում), թե՛ ՀԷԿ-երի և ջրամբարների համար (ջրարգելակի վթարային բացման կամ փակման համար):

Անվտանգության բարձր մակարդակ և ոչ միայն. միջազգային փորձագետները գնահատել են ատոմակայանը

ՋԷԿ-ի համար այս համակարգն արդեն մշակված է և գործում է «Գազպրոմ Արմենիայի» «Հրազդան-5» ջերմակայանում։ Տեսնելով, որ Հայաստանում որակյալ տեխնոլոգիաներ կան, կայանը կառուցող ռուս ինժեներները հենց դա են ընտրել։

Բացի այդ, ԱՏԷՄԻԳ-ում հայ ինժեներներին խորհուրդ են տվել մտածել գործածման ևս մի տարբերակի շուրջ՝ միջուկային պայթյուններից տատանումների մոնիթորինգի համար։ 

«Տեսականորեն դա հնարավոր է։ Պարզապես մենք մեր համակարգը սարքել ենք սեյսմիկ տատանումների համար, իսկ դրանց հաճախականությունն ավելի ցածր է, քան պայթյունների դեպքում։ Բայց անհրաժեշտության դեպքում մենք կարող ենք համակարգը կարգավորել պետք եղած հաճախականության տվիչների համար»,-պարզաբանել է Պետրոսյանը։

Ի դեպ, համակարգի նախորդ տարբերակը ՝ ՍԻԱԶ-2-ը, արդեն գործարկվել է Պետերբուրգի Միջուկային ֆիզիկայի ինստիտուտի հետազոտական ռեակտորում։ Խորհրդային տարիներին «Հայատոմ» ինստիտուտը ատոմակայանների համար նման համակարգեր էր արտադրում ամբողջ ԽՍՀՄ-ում, ինչպես նաև Արևելյան Եվրոպայի սոցիալիստական երկրներում։

Նոր՝ ՍԻԱԶ-3 համակարգում արդեն ազդակների փոխանցման ոչ թե անալոգային, այլ թվային սկզբունքն է գործում։

Հայկական ատոմակայանը կարող է աշխատել մինչև 2036 թվականը. նախարար

Նշենք, որ Լատինական Ամերիկայում գոյություն ունի մեկ տասնյակից ավելի հետազոտական ռեակտոր․ ատոմային ֆիզիկոսների կրթության և պատրաստման համար, ինչպես նաև կիրառական նպատակներով՝ բժշկական (քաղցկեղի բուժման ժամանակ նեյտրոնային կարդիոգրաֆիայի և նեյտրոն-գրավման թերապիայի համար), նյութերի ընկալման ուսումնասիրության, ինչպես նաև հողի, օդի և սննդի ռադիոնուկլիդային աղտոտման ուսումնասիրության համար։

62
թեգերը:
Լատինական Ամերիկա, Հայաստան, Հայաստանի Ատոմային էլեկտրակայան (ԱԷԿ)
Ըստ թեմայի
Էլեկտրականությունը 2020թ–ին. հայկական ԱԷԿ–ի առաջ ծառացած խնդիրներն ու գազի գործոնը
Արտակարգ ռեժիմն ԱԷԿ-ի վերանորոգմանը չի խանգարում. ինչ աշխատանքներ են ընթանում
Համավարակի պատճառով հետաձգվել է ԱԷԿ-ի ու Երևանի ՋԷԿ-ի վերանորոգումը. հոսանքը կթանկանա՞
«Նաիրիտ»

«Նաիրիտի» վտանգավոր քիմիական նյութերն անտերության են մատնված. գործարանը լրիվ կործանո՞ւմ են

253
(Թարմացված է 22:01 29.05.2020)
Հայաստանի երբեմնի ամենախոշոր քիմիական գործարանը՝ «Նաիրիտը», պահպանման ծախսերի կարիք ունի։ Բայց ուզում են գումար ստանալ ոչ թե արտադրության վերականգնումից, այլ պարզապես գործարանի գույքի վաճառքից։

ԵՐԵՎԱՆ, 30 մայիսի – Sputnik, Արամ Գարեգինյան․ «Նաիրիտում» գտնվող վտանգավոր քիմիական նյութերը մնացել են առանց ԱԻՆ-ի ստորաբաժանումների վերահսկողության։ Այս տեղեկությունները Sputnik Արմենիայի հետ զրույցում հաստատեց ԱԻՆ մամուլի ծառայության ղեկավար Էդմոն Զարգարյանը։

2010թ․-ից ի վեր չգործող գործարանում քիմիական ռեակտիվներ և նյութեր են մնացել, որոնք մշտական վերահսկողության կարիք ունեն՝ արտահոսքը, հրդեհը կամ այլ վտանգները չեզոքացնելու համար։ Նախկինում այդ վերահսկողությունը պայմանագրային հիմքով իրականացնում էին համապատասխան կառույցները՝ ԱԻՆ-ի ղեկավարությամբ։ Երբ գործարանը սնանկ ճանաչվեց, վերահսկողության համար վճարում էր սնանկության կառավարիչը։

«Հիմա պայմանագիրը չի երկարաձգվել, և մեր կազմակերպությունն այլևս գործարանում չի աշխատում»,-տեղեկացրեց Զարգարյանը։

Նշենք, որ ավելի վաղ գործարանի սնանկության գծով կառավարիչ Կարեն Ասատրյանը Sputnik Արմենիայի հետ զրույցում մի քանի անգամ զգուշացրել էր, որ շուտով ի վիճակի չեն լինի նաև ԱԻՆ փրկարարներին և գործարանի պահակներին վճարելու։

Գործարանի նախկին տնօրեն Կարեն Իսրայելյանն իր հերթին ասում է, որ ներդրողներին, որոնք կարող են վերականգնել արտադրությունը, թույլ չեն տալիս ծանոթանալ գործարանի վիճակին։ Դրա փոխարեն տարբեր պատճառաբանություններով վաճառում են գործարանի ունեցվածքը։

«Հիմա շատ հարմար առիթ է՝ կհայտարարեն, որ գործարանը վտանգավոր է դարձել, այդ պատճառով մենք պետք է ամեն ինչ վաճառենք ու վերջնականապես լուծենք այդ հարցը»,-ավելացրեց Իսրայելյանը։

Նա հիշեցրեց, որ ավելի վաղ սնանկության գործով կառավարիչը հայտարարել էր, որ գործարանը լրիվ չի վճարել աշխատակիցներին։ Նրանց աշխատավարձերը վճարել են, բայց չեն վճարել ուշացման տույժերն ու տուգանքները։ Դրա համար միջոցներ էր պետք հայթայթել։

Խաչատրյան. «Հիմա «Նաիրիտում» արտադրություն կազմակերպելու խոսակցությունն իրատեսական չէ»

 «Ուզում են ցույց տալ, թե լուծում են մարդկանց խնդիրները։ Դե թող ասեն` որտեղից են ճարելու այդ գումարը։ Ուզում են վաճառել գործարանը, բայց այդ դեպքում շատերը  երբեք աշխատանքի չեն վերադառնա։ Ուրեմն թող մինչև վերջ ազնիվ լինեն և ասեն այն, ինչ իրականում ծրագրում են»,-նշել է Իսրայելյանը։

Նշենք, որ գործարանի պարտատերերն այդ հարցով որևէ դիրքորոշում չեն հայտնում և սնանկության կառավարչին գործողությունների լիակատար ազատություն են տալիս։ Ընդ որում, գրեթե բոլոր պարտատերերը պետական կազմակերպություններ են(Պետեկամուտների կոմիտեն, Երևանի ՋԷԿ-ը, Տարածքային կառավարման նախարարությունը), իսկ գործարանը պետք է պահպանել հենց պետության շահերից ելնելով։

Իսրայելյանը կարծում է, որ եթե որևէ մեկը գործարանի հանդեպ հետաքրքրություն է ցուցաբերում, պետք է հնարավորինս աջակցել նրան։

Նշենք, որ ԽՍՀՄ-ի տարիներին «Նաիրիտը» Խորհրդային Հայաստանի ամենախոշոր գործարաններից մեկն էր։ 90-ականներին դրա աշխատանքը դադարեցվեց, բայց անգամ 2000-ականներին այնտեղ արտադրվող սինթետիկ կաուչուկը Հայաստանից ամենաշատ արտահանվող ապրանքների թվում էր։

«Պետք չէ մեզ խղճալ». ի՞նչ են ուզում ջահելությունն ու ուժը «Նաիրիտին» նվիրած մասնագետները

2006թ․-ին գործարանը սեփականաշնորհվեց շինծու կազմակերպության, դրա անունով վարկ ձևակերպվեց, որը չմուծվեց և գործարանը սնանկ ճանաչվեց։ Այնուհետև գործարանը կրկին դարձավ պետության սեփականությունը, բայց արտադրությունը չվերականգնեցին։

253
թեգերը:
աշխատանք, աշխատող, գործարան, գործարք, Նաիրիտ
Ըստ թեմայի
«Դուք մեզ արդեն մոռացել եք». «Նաիրիտի» աշխատողները կառավարության շենքի մոտ են
Մարտի վերջին կպատասխանեն. իրանցի ներդրողներն ուզում են աշխատել «Նաիրիտում»
«Նաիրիտը» կարող է վաճառվել Իրանին. կառավարությունը քննարկում է առաջարկը
Ռուբեն Հայրապետյան

«Հարսնաքարի» նախկին տնօրենն ինքն է գույք հափշտակել. Ռուբեն Հայրապետյանի փաստաբան

0
(Թարմացված է 00:16 02.06.2020)
Ռուբեն Հայրապետյանի փաստաբանը հույս ունի, որ այս քրեական գործով բոլոր հնարավոր միջոցները կձեռնարկվեն արտերկրում գտնվող Հայկ Շահնազարյանին ՀՀ վերադարձնելու ուղղությամբ։

ԵՐԵՎԱՆ, 2 հունիսի – Sputnik. Հայաստանի ֆուտբոլի ֆեդերացիայի նախկին ղեկավար Ռուբեն Հայրապետյանի ընտանիքին պատկանող «Հարսնաքար» համալիրի նախկին տնօրեն Հայկ Շահնազարյանի կողմից Ընկերության առանձնապես խոշոր չափերով գույքը խարդախությամբ հափշտակելու փաստի առթիվ ՀՀ քննչական կոմիտեի հատկապես կարևոր գործերի քննության գլխավոր վարչությունում հարուցվել է քրեական գործ: Տեղեկությունը հայտնում է Հայրապետյանի փաստաբան Ամրամ մակինյանը։

«Հույս ունենք, որ այս քրեական գործով նույնպես կձեռնարկվեն բոլոր հնարավոր միջոցները արտերկրում գտնվող Հայկ Շահնազարյանին ՀՀ վերադարձնելու ուղղությամբ…»,– Facebook–ի իր էջում գրել է նա։

Մակինյանը հիշեցրել է` Հայկ Շահնազարյանն այն նույն անձն է, որին իբրև թե խոշտանգել ու ապօրինի ազատությունից զրկել են Ռուբեն Հայրապետյանի կազմակերպմամբ։

«Սակայն Հայրապետյանի առնչությունը նշվածին դատարանը չհաստատեց, փոխարենը օրեր անց քրեական գործ հարուցվեց Հայկ Շահնազարյանի կողմից առերևույթ առանձնապես խոշոր չափերի խարդախություն կատարելու փաստի առթիվ։ Ափսոսում եմ, որ քննչական կոմիտեի մամուլի ծառայությունը մոռացել է հանրությանը հայտնել նաև այս մասին, ինչպես արվեց Ռուբեն Հայրապետյանին առերևույթ մեղադրելու դեպքում…»,– եզրափակել է փաստաբանը:

Ավելի վաղ հայտնել էինք, որ Երևանի ընդհանուր իրավասության դատարանը բավարարել է ՀՖՖ նախկին նախագահ Ռուբեն Հայրապետյանին և ևս 4 անձի կալանավորելու միջնորդությունները։ Հայրապետյանը որպես մեղադրյալ է ներգրավել ՀՀ քրեական օրենսգրքի 119-րդ հոդվածի 2-րդ մասի 3-րդ, 5-րդ կետով (ֆիզիկական ուժեղ ցավ կամ հոգեկան տառապանք պատճառելը), 133-րդ հոդվածի 2-րդ մասի 1-ին, 2-րդ, 7-րդ կետերով (մի խումբ անձանց կողմից շահադիտական դրդումներով մարդուն առևանգելը) և 322-րդ հոդվածի 2-րդ մասով  (ինքնիրավչություն): Նա գտնվում է հետախուզման մեջ:

Ռուբեն Հայրապետյանին կանչել են հարցաքննության, իսկ նա Հայաստանում չէ

0
թեգերը:
Ամրամ Մակինյան, Ռուբեն Հայրապետյան, Հայաստան
Ըստ թեմայի
«Հորդորում էր, որ ես փախնեմ Հայաստանից». Ռուբեն Հայրապետյանը` Անդրանիկ Քոչարյանի մասին
Ռուբեն Հայրապետյանի որդին կամավոր ներկայացել է. դատարանը մերժել է կալանքի միջնորդությունը
Ռուբեն Հայրապետյանն իր ասածի պատասխանը կզգա ոչ միայն շորերի, այլև մարմնի վրա. Գրիգորյան