ԵՐԵՎԱՆ, 27 մարտի –Sputnik. Արտակարգ դրության պայմաններում պարետի որոշմամբ փակված ավտոմեքենաների տեխնիկական սպասարկման ու նորոգման կետերը, ավտոմեքենաների մասերի և պարագաների մանրածախ առևտրի խանութներն այսօրվանից կարող են դարձյալ բացել իրենց դռները: Ինչպես լրագրողների հետ հանդիպմանը հայտնեց ՀՀ Էկոնոմիկայի նախարարի տեղակալ Վարոս Սիմոնյանը, այս իրավունքը նշված տնտեսվարողներին տրվել է պարետի վերջին որոշմամբ, որով մի շարք փոփոխություններ են արվել նախկին որոշման մեջ:
Նախկինում արգելված կենդանիների կերերի ու բույսերի մասնագիտացված խանութների աշխատանքն այս որոշմամբ ևս այսօրվանից թույլատրված է:
«Տպագրության մասով առաջին որոշման մեջ բաց էր մնացել նաև տպագրական գործունեության որոշ տեսակներ, բայց հիմա այս կետը որոշման փոփոխության մեջ ավելացվել է և դեղերի ծանուցումների, չեկերի և այլ արժեթղթերի, ինտելեկտուալ քարտերի տպագրությունը ևս թույլատրվել է իրականացնել»,- հայտնեց Սիմոնյանը:
Փոխնախարարը տեղեկացրեց, որ վերանայվել են նաև սննդի շղթայի աշխատանքն անխափան ապահովող մի շարք գործունեության տեսակներ, մասնավորապես՝ թույլատրվել է հոսքագծերի սպասարկման ծառայությունների, լաբորատորիաների աշխատանքը:
Կարո՞ղ եմ շուկա գնալ, կամ վզներիս խփեց կորոնավիրուսը. մարդիկ անկեղծացան Փաշինյանի հետ
Հիշեցնենք, որ կորոնավիրուսի կանխարգելման նպատակով Հայաստանում մարտի 16–ից ապրիլի 14–ն արտակարգ դրություն է հայտարարվել։ Ավելի վաղ Ավինյանը որոշում էր կայացրել, որ պետք է գործեն միայն դեղատները, պարենային խանութներն ու գյուղատնտեսական շուկաները։
