ԵՐԵՎԱՆ, 14 հունվարի — Sputnik. ՀՀ էկոնոմիկայի նախարարությունը փոքր ընկերությունների համար առևտրային ֆինանսավորման նոր եղանակներ է քննարկում։ Այս մասին 2019 թվականի ամփոփիչ ասուլիսում ասաց ՀՀ էկոնոմիկայի նախարար Տիգրան Խաչատրյանը։
Նա հիշեցրեց, որ պետբյուջեով ամեն տարի գումար է հատկացվում արտահանողներին ապահովագրելու համար, որ եթե ընկերությունն ապրանքն ուղարկի արտերկրի պատվիրատուին, սակայն դրա դիմաց գումար չստանա (այսինքն` ըստ էության, բիզնեսի համար ֆակտորինգ է ֆինանսավորվում – խմբ.). ապահովագրված լինի։ Պայմանագիրը կնքվում է ապահովագրական ընկերության հետ, որը ստանձնում է ապրանքի դիմաց չվճարելու ռիսկն ու գումարի պահանջը։
Աջակցություն ստանալու համար հիմնականում դիմում է փոքր բիզնեսը. նախ, լիմիտ է սահմանված (աջակցությունից կարող է մեկ ձեռնարկություն օգտվել), երկրորդ` խոշոր բիզնեսը կարող է իրեն թույլ տալ շուկայական պայմաններով ֆակտորինգ իրականացնել։
ԵԱՏՄ–ն ու Վիետնամն ազատ առևտուր կանեն. կգնենք հագուստ, կվաճառենք խմիչք
«Նման ապահովագրություն մենք ուզում ենք առաջարկել ոչ միայն արտահանողների համար, այլև նրանց, ովքեր իրենց արտադրանքը վաճառում են երկրի ներսում», – նշեց Խաչատրյանը։
«Այժմ քննարկվում է, թե ինչ սահմաններում է հնարավոր նման աջակցություն ցուցաբերել և ովքեր կկարողանան դրան հավակնել»,- ավելացրեց նախարարը։
Քննարկվում է Հայաստանի ամենամեծ բիզնես կենտրոնը կառուցելու հարցը. Ալեն Սիմոնյան
Նշենք, որ 2019 թվականին արտահանման ապահովագրությունից օգտվել է շուրջ 40 հայկական ընկերություն` 11,5 մլրդ դրամ ընդհանուր գումարի չափով։ Աջակցման ծավալը 2018 թվականի համեմատ աճել է 50%–ով։
