ԵՐԵՎԱՆ, 22 օգոստոսի — Sputnik. «Ամուլսարի» հանքավայրի չշահագործելու դեպքում բյուջեի մակրոտնտեսական ցուցանիշներից շեղվելու ռիսկ չկա։ Այսօր կառավարության նիստից հետո լրագրողների հետ զրույցում նման կարծիք հայտնեց ՀՀ ֆինանսների նախարար Ատոմ Ջանջուղազյանը։
«Պետական բյուջեի եկամուտների կանխատեսումը չի կատարվում առանձին կազմակերպությունների մասով։ Հետևաբար, առանձին վերցրած որևէ կազմակերպության աշխատել չաշխատելու դեպքում բացակայում է նման կանխատեսումը» ,– ասաց նա։
Այդուհանդերձ, ֆինանսների նախարարը առանց բացառության ողջունում է ցանկացած տնտեսավարում։
«Աշխատելու դեպքում, բնականաբար, ձևավորվում են դրական սպասումներ, չաշխատելու դեպքում` բացասական»,– ասաց նա` հորդորելով «Ամուլսարի» հարցում ապավինել մասնագիտական փորձաքննության արդյունքներին ու առաջնորդվել դրանցով։
Հիշեցնենք` օգոստոսի 19–ին ՀՀ վարչապետ Նիկոլ Փաշինյանը հայտարարությամբ էր հանդես եկել` վստահեցնելով, որ Ամուլսարի հարցով կառավարության վրա որևէ արտաքին ճնշում չի գործադրվել։ Հակառակ դեպքում իշխանությունները փորձագիտության արդյունքներին մեկ տարուց ավել չէին սպասի։
«Ասում եմ ևս մեկ անգամ. եթե սպառնալիք տեսնենք, անմիջապես կփակենք։ Դա մեր ազգային անվտանգության հարցն է և վերջ»,– ասել էր վարչապետը։
Նույն օրը շուրջ 200 ցուցարար հավաքվել էր ՀՀ նախագահի նստավայրի մոտ (նախկինում եղել է ՀՀ վարչապետի նստավայրը)` պահանջելով դադարեցնել Ամուլսարի հանքի շահագործումը, ի հեճուկս մի քանի բնապահպանական փորձաքննությունների արդյունքների, որոնք իրականացրել են հրավիրված անկախ ընկերությունները։
Մինչ այդ ՀՀ Քննչական կոմիտեն նույնպես, Հատկապես կարևոր գործերի քննության գլխավոր վարչության քննիչ Յուրա Իվանյանի շուրթերով հաստատել էր, որ ըստ փորձաքննության արդյունքների՝ Ամուլսարի ոսկու հանքում արդյունահանումը շրջակա միջավայրի համար անկառավարելի ռիսկեր չի պարունակում։
