ԵՐԵՎԱՆ, 13 օգոստոսի — Sputnik. 2017-18թթ.–ին ՀԴՄ–ների ձեռքբերման գործընթացում տեղի են ունեցել չարաշահումներ։ Այսօր լրագրողների հետ հանդիպմանը, պատասխանելով հարուցված քրեական գործի մասին հարցերին, ասաց ՀՀ ՊԵԿ նախագահի տեղակալ Էդվարդ Հովհաննիսյանը։
««Հսկիչ-դրամարկղային մեքենաների ներդրման գրասենյակ» պետական ոչառևտրային կազմակերպության չարաշահումների մասով հարուցված քրեական գործով իրականացված ուսումնասիրությունների արդյունքում ձեռք են բերվել բավարար տեղեկություններ, որ տվյալ գործարքը տեղի է ունեցել չարաշահման արդյունքում»,– ասաց Հովհաննիսյանը` հավելելով, որ չարաշահումը դրսևորվել է ՀԴՄ–ներն ավելի ցածր գնով ձեռք բերելուն ու ավելի բարձր գնով ներկայացնելուն։
Իսկ դա անփութության հետևանք է, թե կոռուպցիայի, ՊԵԿ պաշտոնյան այս պահին վաղաժամ համարեց նման եզրակացություն անելը` լրագրողներին հորդորելով սպասել քրեական գործի նախաքննության ավարտին։
Էդուարդ Հովհաննիսյանը նաև հիշեցրեց. 2017-2018 թվականների ընթացքում ՀԴՄ–ների ձեռքբերման գործընթացի վերաբերյալ քրեական գործը հարուցվել է դրանում հնարավոր չարաշահումների հիմքով։
Հիշեցնենք` օգոստոսի 6-ին քրեական գործ հարուցելու մասին հայտարարության մեջ ՊԵԿ–ը հայտնել էր, որ «Հսկիչ-դրամարկղային մեքենաների ներդրման գրասենյակ» ՊՈԱԿ-ի և Չինաստանի Ժողովրդա-Դեմոկրատական Հանրապետությունում գրանցված «Փաքս Թեքնոլոջի Լիմիթեդ» ընկերության միջև կնքված պայմանագրով ՊՈԱԿ-ին մատակարարված 25 000 հատ «Pax S 900» մոդելի հսկիչ-դրամարկղային մեքենաների պայմանագրային արժեքը ձևակերպվել է իրականից ավելի բարձր գնով: Հետևաբար, դրանց ձեռքբերման համար ՀՀ կառավարությունն ավելի շատ գումար է հատկացրել, ինչն, ըստ ՊԵԿ–ի «եղել է ակնհայտ անշահավետ գործարք Հայաստանի Հանրապետության համար»։
Նշենք, որ քրեական գործը հարուցվել է ՊԵԿ նախկին բարձրաստիճան պաշտոնատար անձանց կողմից շահադիտական նպատակներով իրենց պաշտոնեական դիրքը ծառայության շահերին հակառակ օգտագործելու արդյունքում պետության օրինական շահերին էական վնաս պատճառելու վերաբերյալ Քրեական օրենսգրքի համապատասխան հոդվածով:
