Հրանտ Բագրատյան

Փաշինյանի կառավարությունը դատապարտված է ունենալ Սարգսյանի «հաջողությունները». Բագրատյան

77
(Թարմացված է 18:14 08.08.2019)
Բագրատյանի խոսքով` բյուջետային եկամուտների աճն, իհարկե, լավ է, բայց երկար պահպանել չի հաջողվի։

ԵՐԵՎԱՆ, 8 օգոստոսի — Sputnik. ՀՀ նախկին վարչապետ Հրանտ Բագրատյանը Facebook-ի իր էջում քննադատել է վարչապետ Նիկոլ Փաշինյանի` բյուջետային եկամուտների աճի մասին օրերս արած հայտարարությունը։ Նա նշել է, որ վարչապետի հիշատակած 25.1%-անոց աճն իրականում շատ ավելի քիչ է, քան ներկայացվում է։

«2018-ի վերջին հաստատված 2019-ի բյուջեի եկամուտները նախատեսված են 1539.5 մլրդ դրամ, ինչը 2018-ի փաստացի կատարողականի նկատմամբ (1340.9 մլրդ դրամ, որն, ի դեպ, թերակատարվել է) ավել է 14.8%-ով։ Եթե 2019-ի բյուջեն կատարվի, ապա հարկեր/ՀՆԱ հարաբերակցությունը (20.95%, առանց տեղականի) պարզապես կկրկնվի։ Առաջընթաց 2019-ի բյուջեով նախատեսված չէ։ 2019-ի առաջին կիսամյակում ստացվել են 758.3 մլրդ դրամի եկամուտներ 2018-ի 606.4-ի փոխարեն։ Այսինքն, բյուջեի 152 մլրդ դրամով առաջընթացի մասին խոսելը սխալ է. 2019-ի 1-ին կիսամյակին, այո, իրականում ավել է հավաքվել` սոսկ 62 մլրդ դրամ կամ ավել է եղել 9%-ով։ Կարծում եմ, ճիշտ է այս մոտեցումը»,- նշել է նա։

Բագրատյանի խոսքով` այդ ցուցանիշը ՀՀ անկախության տարիներին միջին կարգի ցուցանիշ է, որն, իհարկե, լավ է, բայց երկար պահպանել չի հաջողվի ոչ միջնաժամկետ և ոչ էլ երկարաժամկետ ժամանակահատվածում, քանի որ այդ 62 մլրդ դրամի   բյուջետային եկամուտների հավելաճը հիմնականում ստացվել է «տոքսիկ» ճյուղերից (ավտոմեքենաների առուծախ, խաղեր և այլն), իսկ դրանց հիման վրա նոր աճ գեներացնելն հնարավոր չէ։

Ինչ վերաբերում է հարկային ռեֆորմներին, ապա դրանք ևս, ըստ Բագրատյանի, ընթանում են սխալ ճանապարհով։

«Ինչպես նշված է կառավարական փաստաթղթում, ստրատեգիան անուղղակի հարկերի ընդլայնումն է։ Անուղղակի հարկերը սպառման հարկեր են։ Դրանց վճարողը ժողովուրդն է։ Հետևաբար, երկարաժամկետ հատվածում դրանց անընդհատ ընդլայնումը հարաբերականորեն աղքատացնում է ժողովրդին։ Աղքատացնելով ժողովրդին մենք նեղացնում ենք բյուջեի ընդլայնման բազան։ Արդյունքում, անուղղակի հարկերի գերակայության պայմաններում հնարավոր չէ շտկել ամենակարևոր ցուցանիշը՝ հարկեր/ՀՆԱ հարաբերակցությունը»,- գրել է նախկին վարչապետը։

Նրա կարծիքով` Նիկոլ Փաշինյանի կառավարությունը դատապարտված է այս հարցերում ունենալ Սերժ Սարգսյանի «հաջողությունները»,- եզրափակել է Բագրատյանը։

Հիշեցնենք` օգոստոսի 1-ին ՀՀ վարչապետ Նիկոլ Փաշինյանը Facebook-ի իր էջում գրել էր, որ հեղափոխությունից առաջ խոստացել էր, որ մեկ-երկու տարում բյուջեի եկամուտները կավելանան 25-30 տոկոսով,  ահա՝ 2019 առաջին կիսամյակում նախորդ տարվա նույն ժամանակահատվածի համեմատ այդ  եկամուտներն ավելացել են 25.1%-ով կամ 152 մլրդ դրամով։

77
թեգերը:
Հայաստան, Հրանտ Բագրատյան, Նիկոլ Փաշինյան, բյուջե, ՀՀ կառավարություն, Սերժ Սարգսյան
Ըստ թեմայի
99.7- ը հավասար է 103.5 -ի. ՊԵԿ նախագահը պատգամավորներին ներկայացրեց իր թվաբանությունը
Պետությանը պատճառված 110,5 մլրդ դրամի վնասից 30 մլն–ը վերադարձվել է բյուջե. նոր տվյալներ
Տնտեսական աճի «խադավոյին նայեք». ի՞նչն է մտահոգել նախկին վարչապետ Հրանտ Բագրատյանին
ՀԴՄ-ների գնման գործընթացում չարաշահումներ են եղել. ՊԵԿ
Նիկոլ Փաշինյանի նշած 2050 թվականի հետքերով. որքանո՞վ են նպատակներն իրագործելի
Սարգսյանն ու Վուչիչը

Ինչո՞վ ենք պակաս Սարգսյանից ու Վուչիչից, կամ ի՞նչ կարող են ՀՀ–ն ու Սերբիան ստանալ ԵԱՏՄ–ից

245
(Թարմացված է 16:24 29.07.2021)
Երկու երկրներն էլ իհարկե կարող են ալկոհոլային խմիչքներ վաճառել` ռակիա և կոնյակ, սակայն հեռանկարներ կան նաև էլեկտրատեխնիկական արդյունաբերության հարցում։

ԵՐԵՎԱՆ, 31 հուլիսի – Sputnik. Հայաստանի հետ Սերբիայի առևտուրն, իհարկե, ավելի քիչ է, քան Ռուսաստանի կամ Բելառուսի։ Սակայն այն թող որ փոքր, բայց աճ է արձանագրում ԵԱՏՄ–Սերբիա ազատ առևտրի գոտու մասին համաձայնագրի ստորագրումից հետո։ Հայաստանի խորհրդարանն այն վավերացրեց 2021 թվականի ապրիլին (համաձայնագիրը ստորագրվել էր 2019 թվականին), բայց հնարավոր է` բիզնեսը նախապես արդեն սկսել է յուրացնել շուկաները։

Հայաստանը թող որ փոքր ծավալներով (տարեկան տասնյակ հազարավոր դոլարների մակարդակով) Սերբիա կոնյակ, էլեկտրական փոխարկիչներ, կահույք և դրա համար նախատեսված դետալներ է արտահանում (հետաքրքիր զուգադիպությամբ, Սերբիայի փոքրաթիվ հայ համայնքի ներկայացուցիչներից մեկը` Չեդոմիր Արթինովիչը (Արթինյան) մանրատախտակի արտադրության փոքր ձեռնարկության սեփականատերն է)։ Դեպի Հայաստան Սերբիայի արտահանումը տարեկան 2 մլն դոլարից մի փոքր ավել է կազմում, Հայաստանի արտահանումը դեպի Սերբիա` տարեկան շուրջ 120 հազար։

Բացի այդ, տարիներ են եղել` Հայաստանը Սերբիա պղնձի խտանյութ է արտահանել։ Այժմ, ՊԵԿ–ի տվյալներով, նման արտահանում այլևս չի իրականացվում։ Սակայն Սերբիայի վիճակագրական ծառայության տվյալներով` Հայաստանը մի քանի տարի է, ինչ շարունակում է մնալ Սերբիա խտանյութի խոշորագույն մատակարարներից մեկը։ Ամենայն հավանականությամբ, խտանյութը Սերբիա է հասնում հարևան Բուլղարիայից (ուր Հայաստանը մեծ ծավալներով է արտահանում)։

«Ամենագետ» հայ սեփականատերերը, կամ ի՞նչն է խանգարում հայկական արտադրանքին ՌԴ շուկայում

Պատկերավոր համեմատություն. ԽՍՀՄ փլուզումից հետո Հայաստանում փակվեց Ալավերդու պղնձաձուլարանը, որը մաքուր պղինձ էր արտադրում։ Իր հերթին դրա հիմքով էր աշխատում Երևանի կաբելի գործարանը։ 90-ականների կեսերին գործարանը վերագործարկվեց, բայց մաքուր պղինձ այլևս չի արտադրում։

Սերբիայի Բոր քաղաքում պղնձաձուլական գործարանը արտադրությունը պահպանում էր նաև 90-ականների պատերազմի ժամանակ, երբ Սերբիան խիստ պատժամիջոցների և միջազգային շրջափակման մեջ էր։ Այսօր այդ գործարանը ոչ միայն տեղական, այլև մի շարք երկրներից ներկրած հանքաքար է մշակում, որի հիման վրա մաքուր պղինձ են ձուլում ու կաբելի արտադրություն կազմակերպում տարեկան տասնյակ հազարավոր տոննաներով։

Համագործակցության համար մեկ այլ հեռանկարային ուղղություն կարող է դառնալ էլեկտրատեխնիկան։ Այստեղ ևս մեկ շեղում է հասունանում։ Նիշ քաղաքում (որը սոցիալիստական Հարավսլավիայում էլեկտրատեխնիկայի և էլեկտրոնիկայի կենտրոններից մեկն էր) Johnson Electric ընկերությունը մի քանի տարի առաջ նոր գործարան բացեց, որը էլեկտրական շղթաների համար սարքավորումներ է թողարկում` այրման լարեր և նման այլ իրեր։ Այնտեղ ավելի քան 2000 մարդ է աշխատում, իսկ Սերբիայի իշխանություններն իրենց կողմից գործարանում մի քանի մլն եվրոյի ներդրում են իրականացրել։

«Հայթեքի ֆաբրիկան» Հայաստանում նախագծերի հերթական ընտրությունը կանցկացնի

Սերբիայի նախագահ Ալեքսանդր Վուչիչը հատուկ նշել է, որ այդ գումարները քամուն չեն տրվել, այլ գործին են ծառայել։ Իսկ Հայաստանում նման արդյունաբերական կենտրոնները լքվել են (դրանցից միայն փոքր արտադրություններ են մնացել), իսկ այդ գործարանները վերականգնել իշխանությունները կտրականապես հրաժարվում են` այն պատրվակով, թե իբր «չի կարելի ծախսել հարկատուների գումարները»։

Բարեբախտաբար, մեր կողմից էլ ուրախանալու առիթ կա. Հայաստանը, ինչպես նշեցինք, Սերբիա էլեկտրատեխնիկական ապրանքներ է արտահանում, թեև փոքր ծավալներով։ Այստեղ երկու երկրների ինժեներները կարող են ուսումնասիրել միմյանց պահանջմունքները` կապված սարքերի և դետալների հետ, և փոխշահավետ համագործակցություն հաստատել։

Իհարկե, երկու երկրները կարող են ընդլայնել ալկոհոլի առևտուրը։ Թե՛ մեկը, թե՛ մյուսը ներառված չեն ազատ առևտրի ապրանքների ցանկում, և դրանց նկատմամբ տուրքեր են սահմանված։ Սակայն կոնյակն ու ռակիան, միևնույնն է, գտնում են իրենց գնորդին (համենայն դեպս, կոնյակը Բելգրադ է արտահանվում դեռ սոցիալիստական ժամանակաշրջանից)։

Իհարկե, շահութաբերությունը կախված է բեռնափոխադրման արժեքից. երկու երկրները միմյանցից բավական հեռու են գտնվում, բայց լոգիստիկան, հավանաբար, այդքան էլ թանկ չէ, որքան կարող է թվալ։ Որքան արժե Բելգրադից Երևան բեռնված կոնտեյների առաքումը, տեղական լոգիստիկ օպերատորները միանգամից պատասխանել չկարողացան. մեր երկրների առևտրի ծավալները շարունակում են փոքր մնալ։ Սակայն հարևան Բուլղարիայից Հայաստան կոնտեյներ տեղափոխելու (մասնավորապես Բուրգասի նավահանգստից) արժեքը գրեթե այնքան է, որքան Ստամբուլից (կամ մի փոքր ավել)։

Ինչո՞ւ է հայկական դրամի փոխարժեքը նվազել, ու ի՞նչ սպասել ամռանը. պարզաբանում է փորձագետը

Բացի այդ, պետք չէ մոռանալ այն, ինչից սկսեցինք. ազատ առևտրի գոտու մասին համաձայնագրի շրջանակում բազմաթիվ ապրանքատեսակներ ազատվում են տուրքերից, ինչը կարող է կոմպենսացնել մի փոքր ավելի բարձր տրանսպորտային ծախսերը։

Այս ամենը, թող որ ոչ հարյուրտոկոսանոց, սակայն որոշակի նախադրյալներ է ստեղծում նրա համար, որ երկու երկրների բիզնեսները միմյանց նորովի դիտարկեն։ Իսկապես, ինչո՞ւ ռակիայով և կոնյակով միայն Արմեն Սարգսյանն ու Ալեքսանդր Վուչիչը պետք է բաժակ խփեն։

Ինչո՞վ ենք մենք պակաս։

245
թեգերը:
Հայաստան, Սերբիա, Եվրասիական տնտեսական միություն (ԵԱՏՄ)
Ըստ թեմայի
Իրանն ընդլայնում է համագործակցությունը ԵԱՏՄ–ի հետ. ի՞նչ դեր է հատկացված Հայաստանին
Ընդհանուր սնունդ և օդանավեր. ՌԴ փոխվարչապետը նշել է ԵԱՏՄ ինտեգրման առաջնահերթությունները
ԵԱՏՄ-ն ու Իրանը ազատ առևտրի մասին նոր համաձայնագիր կստորագրեն
ԵԱՏՄ–ն աշխատանքի որոնման կայք է գործարկել անդամ երկրների տարածքում
Վահան Քերոբյանը Վրաստանում հանդիպել է Լաշա Խուցիշվիլիի հետ

Վահան Քերոբյանը Վրաստանում հանդիպել է Լաշա Խուցիշվիլիի հետ, ապա հայտնել` ինչ են քննարկել

51
(Թարմացված է 10:16 30.07.2021)
Քերոբյանի հետ Թբիլիսի են մեկնել նաև նախարարի տեղակալ Ավագ Ավանեսյանն ու էկոնոմիկայի նախարարության արտաքին կապերի վարչության պետ Արմեն Այվազյանը։

ԵՐԵՎԱՆ, 30 հուլիսի - Sputnik. ՀՀ Էկոնոմիկայի նախարարի պաշտոնակատար Վահան Քերոբյանը հանդիպել է Վրաստանի ֆինանսների նախարար Լաշա Խուցիշվիլիի հետ։ Տեղեկությունը նա հայտնել է Facebook–ի իր էջում։

«Գործընկերոջս հետ խոսել ենք մեր երկրների միջև տարբեր ոլորտներում համագործակցության հնարավորությունների և տնտեսական կապերի ամրապնդման մասին, անդրադարձել հարկային ու մաքսային ոլորտներում համագործակցության կարևորության հարցերին։
Քննարկել ենք նաև Վրաստանի տարածքով տարանցիկ փոխադրումների հետ կապված խնդիրները»,–գրել է Քերոբյանը։

Նշենք, որ էկոնոմիկայի նախարարի պաշտոնակատարը երկօրյա աշխատանքային այցով (հուլիսի 29-30-ը) գտնվում է Վրաստանի Հանրապետությունում։

Քերոբյանի հետ Թբիլիսի են մեկնել նաև նախարարի տեղակալ Ավագ Ավանեսյանն ու էկոնոմիկայի նախարարության արտաքին կապերի վարչության պետ Արմեն Այվազյանը։ Նպատակն առևտրատնտեսական ոլորտին առնչվող հայ-վրացական երկկողմ համագործակցության ընդլայնման հնարավորությունները քննարկելն է։

Քերոբյանը գործուղումից վերադառնալուց հետո պետք է եռօրյա ժամկետում հաշվետվություն ներկայացնի ՀՀ վարչապետի աշխատակազմ և ԱԳՆ։

Կատակով եմ ասել. Քերոբյանը` խոպանչիներին «բերման ենթարկելու» մասին

51
թեգերը:
Վահան Քերոբյան, Թբիլիսի, Նախարար, Վրաստանի Հանրապետություն
Ըստ թեմայի
Վահան Քերոբյանը մեկնում է Վրաստան
Վահան Քերոբյանը գինեգործների ու կոնյակագործների հետ քննարկել է խաղողի մթերման հարցերը
«Տնտեսվարողների հետ չի քննարկվել». Քերոբյանն ասաց` ինչու են հանքատերերի տուրքը բարձրացնում
Վահան Քերոբյանը կոչ է անում «բերման ենթարկել» «խոպանի» գնացած բարեկամներին
Աղջիկը` հոգեբանի մոտ. արխիվային լուսանկար

8 սեանս` անվճար. ՀՀ–ում առաջին անգամ պետական հոգեբանական աջակցություն են տրամադրում

26
(Թարմացված է 19:22 31.07.2021)
Ծրագրի շահառուներն են անհայտ կորածների և գերիների ընտանիքների անդամները, վերադարձած գերիները, պատերազմի մասնակիցները` հատկապես վիրավորում կամ հաշմանդամություն ստացած զինծառայողները, տեղահանվածները։

ԵՐԵՎԱՆ, 30 հուլիսի – Sputnik, Ժաննա Պողոսյան. Հայաստանում առաջին անգամ գործարկվել է պետական հոգեբանական աջակցության ծրագիր։ Ծրագրի առաջարկը կառավարությունում եղել է 44-օրյա պատերազմից հետո` 2021-ի փետրվարին։ Այն ընդունվել և ներդրվել է մայիսից և տևելու է մինչև դեկտեմբեր ամիսը։

Ծրագրի շրջանակում պրոֆեսիոնալ հոգեբանական աջակցություն է տրվում անհայտ կորածների և գերիների ընտանիքների անդամներին, վերադարձած գերիներին, պատերազմի մասնակիցներին` հատկապես վիրավորում կամ հաշմանդամություն ստացած զինծառայողներին, տեղահանվածներին։

«Մեր ժողովուրդը շատ զգայուն և շատ հայրենասեր է, և ոչ մեկը անմասն չի մնացել պատերազմի ցավից։ Ուսումնասիրելով հանրության անկումային տրամադրությունները` որոշեցինք հոգեկան առողջության կազմակերպման ծրագիր իրականացնել, թույլ տալ մեզ այն շռայլությունը, որ շատ զարգացած երկրներ կարողանում են անել», – լրագրողների ասել է արտակարգ իրավիճակների նախարարի խորհրդական Անդրանիկ Հակոբվյանը։

Ծրագիրն ապրիլին հանձնարարվել է ԱԻՆ–ին, մրցույթ է հայտարարվել, որին մասնակցել է ընդամենը երկու կենտրոն։ Մրցույթը շահել է Սեդա Ղազարյանի անվան «Ինթրա» հոգեկան առողջության կենտրոնը, սակայն սահմանափակ ռեսուրսներ ունենալու հետևանքով այս ծրագրի վրա փոխհամաձայնությամբ աշխատում են նաև այլ կենտրոններ։

«Մինչև այս ծրագիրն էլ ԱԻՆ-ի թեժ գիծն աշխատում էր ու շարունակում է աշխատել, ստանում էինք հազարավոր զանգեր` հոգեբանական անկումնային վիճակների մասին։ Նման ահազանգեր ստանում էին նաև ՊՆ–ն և ոստիկանությունը», – բացատրելով ծրագրի կարևորությունը` ասում է Հակոբյանը։

Ծրագիրն արժե 100 մլն դրամ, դրանում ներառված են 60 հոգեբաններ, շահառուների թիվը 726 է։ Թեև շահառուները հիմնականում պատերազմից ուղիղ տուժածներն են (պատերազմի մասնակիցներ կամ տեղահանվածներ), ցանկացած քաղաքացի կարող է զանգել ծրագրի թեժ գծին։ Պարզապես, ի տարբերություն շահառուների, նման քաղաքացին կարող է անվճար հոգեբանական օգնություն ստանալ հեռախոսով, այլ ոչ թե տետ–ա–տետ։

Ու՞ր են «կորել» Ավանի հոգեբուժարանում բուժում ստացող 27 անձինք. դատախազության բացահայտումը

«Ծրագրի շրջանակում հոգեբանը շահառուի հետ անցկացնում է ութ անվճար սեանս։ Արդեն ունենք 70-ից ավելի ավարտած դեպքեր` 70–ից ավելի մարդու հետ 8 սեանսն արվել է։ Ընդհանուր առմամբ արդեն արվել է 1700 սեանս», – նշում է արտակարգ իրավիճակների նախարարության հոգեբանական աջակցության ծրագրի ղեկավար Արտակ Գրիգորյանը։

Ծրագրի շրջանակում նախատեսվում է, որ հոգեբանները աշխատելու են ոչ միայն անհատական սեանսներով, այլև խմբային։ Բացի այդ, կան հոգեբանների շարժական խմբեր, որոնք աշխատում են հեռավոր բնակավայրերում, մարզերում։ Կա նաև սեանսները հեռախոսով և առցանց կատարելու տարբերակ, սակայն Գրիգորյանը նշում է, որ հիմնականում մարդիկ ձգտում են կենդանի շփման։

Ինչպես բացահայտել երեխաների հոգեբանական տրավմաները. փորձագետները լուծումներ են առաջարկում

Ծրագրի իրականացման մեծ խնդիրն այն է, որ Հայաստանում մարդկանց մոտ չկա հոգեբանին այցելելու մշակույթ։ Դրա համար էլ է լուծում գտնվել` հոգեբանական կենտրոնն ինքն է փնտրում շահառուներին։

«Եթե մենք ունենում ենք փորի ցավ, դիմում ենք բժշկի, ատամի ցավ, գնում ենք ատամնաբույժի մոտ, բայց հոգու ցավի դեպքում մտածում ենք` ինքներս կլուծենք այդ հարցը։ 75-80% դեպքերում այդպես էլ կա, բայց կա 20-25% դեպքեր, երբ առանց մասնագետի դժվար է լուծել հարցը և այն գնալով բարդանում է»,- ասում է Երևանի պետական բժշկական համալսարանի բժշկական հոգեբանության ամբիոնի վարիչ, ինչպես նաև ծրագիրն իրականացնող «Ինթրա» հոգեկան առողջության կենտրոնի գլխավոր հոգեբան Խաչատուր Գասպարյանը։

Заведующий кафедрой медицинской психологии, доцент Хачатур Гаспарян
© Sputnik / Asatur Yesayants
Խաչատուր Գասպարյանը

Գասպարյանն ասում է, որ հոգեբանության մեջ էթիկական սկզբունք կա` անձը ինքը պետք է դիմի հոգեբանի, բայց հաշվի առնելով այն, որ Հայաստանում ընդունված չէ հոգեբանական ծառայություններից օգտվել, «Ինթրա» կենտրոնի սոցիալական աշխատողներն ամեն օր զանգում են պոտենցիալ շահառուներին, տեղեկացնում, որ նման ծառայություն կա։ Համաձայն մեկ օրվա տվյալների` 34 հոգուց 6-ը ցանկացել էին օգտվել ծառայություններից (մոտ 20%–ը)։

Ծրագրի թեժ գիծն է`060 834 777։ Գծին զանգելուց և խնդիրները ներկայացնելուց հետո, քաղաքացուն ուղղորդում են կոնկրետ հոգեբանի հետ աշխատելու։ Հոգեբանական խորհրդատվության խիստ գաղտնիությունը պահպանվում է։ Ծրագրի բոլոր ութ սեանսները անվճար են։ Նշենք, որ Հայաստանում մեկ հոգեբանական սեանսը կարող է արժենալ 5 հազար դրամից 25 հազար դրամ, այսինքն` ութ սեանսի համար ընդհանուր գինը կլիներ 40 հազարից 200 հազար դրամ։

26
թեգերը:
Արցախ, Արցախյան պատերազմ, հոգեբան, օգնություն, գերի, Զոհ, Վիրավոր
Ըստ թեմայի
Պատերազմում տուժած զինծառայողների ընտանիքները հոգեբանական աջակցություն կստանան
Ո՞ր կանանց հետ չեն ամուսնանում. բացատրում են հոգեբանները
Ռուս խաղաղապահները մարդասիրական և հոգեբանական օգնություն են ցուցաբերում Արցախի բնակիչներին