ԵՐԵՎԱՆ, 31 հուլիսի — Sputnik. 2019 առաջին կիսամյակում, նախորդ տարվա նույն ժամանակահատվածի համեմատ, պետական բյուջեի եկամուտներն ավելացել են 25.1%-ով կամ 152 մլրդ դրամով։ Այս մասին տեղեկանում ենք կառավարության Facebook–յան պաշտոնական էջից։
«Պետբյուջեի ավելացման արդյունքում հնարավորություն է ընձեռվել նախաձեռնել խոշոր ծրագրեր, մասնավորապես` հունիսի 1-ից միջինը 10 տոկոսով բարձրացել է զինծառայողների աշխատավարձը, իսկ սեպտեմբերի 1-ից 10 տոկոսով կբարձրանա շուրջ 38 հազար ուսուցիչների աշխատավարձը։ Բացի այդ, 2020թ. հունվարի 1-ից 10 տոկոսով կբարձրանան կենսաթոշակները»,–նշված է հաղորդագրության մեջ։
Նշվում է նաև, որ հավելյալ 7 մլրդ 400 մլնը հատկացվելու է ճանապարհաշինությանը՝ ընդհանուր 303 կմ երկարությամբ ավտոճանապարհների վերանորոգման համար։ Ինչպես նաև 10 միլիարդ դրամ սուբվենցիոն ծրագրերով հատկացվելու է համայնքներին՝ համայնքային ծրագրեր իրականացնելու համար։ Իսկ 1988 թվականի երկրաշարժի հետևանքով բնակարան կորցրած քաղաքացիների բնակարանային խնդիրները լուծելու համար կհատկացվի 3 մլրդ դրամ։
Ինչքանո՞վ են բարձրացել աշխատավարձերն ու կենսաթոշակները Հայաստանում
Հիշեցնենք, որ ՀՀ վարչապետ Նիկոլ Փաշինյանն ընթացիկ տարվա մայիսի 8–ին կայացած մամուլի ասուլիսի ժամանակ, երբ ամփոփում էր պաշտոնավարման մեկ տարին, հայտնել էր, որ 2019թ.–ի բյուջետային եկամուտները կգերակատարվեն ոչ թե 40 մլրդ դրամով, ինչպես հայտարարվել էր, այլ 62 մլրդ դրամով, այսինքն՝ 129 մլն դոլարով ավելի։
