ԵՐԵՎԱՆ, 6 հունիսի — Sputnik. Հայաստանից Ռուսաստան արտահանում իրականացնելու հնարավորությունները շատ լայն են։ Այսօր խորհրդարանական լսումների ժամանակ այս մասին ասաց ՀՀ էկոնոմիկայի նախարար Տիգրան Խաչատրյանը։
«Ռուսաստանում հայկական ապրանքների նկատմամբ վերաբերմունքը շատ բարյացակամ է։ Ռուսական շուկայում հայկական արտահանման հարցում նախկին պես մեծ հեռանկարներ կան։ Դրանց պետք է դրական վերաբերվել», – նշեց Խաչատրյանը։
Այժմ Եվրասիական տնտեսական հանձնաժողովն աշխատում է միասնական ապրանքանիշ ստեղծելու ուղղությամբ։ ԵԱՏՄ ցանկացած երկրի արտադրողները կկարողանան այդ ապրանքանիշն օգտագործել իրենց արտադրանքի համար` այն ավելի ճանաչելի դարձնելու համար։
«Մեր արտադրողները ցանկության դեպքում կարող են օգտվել այդ հնարավորությունից», – ավելացրեց Խաչատրյանը։
Նշենք` Ռուսաստանը Հայաստանի պատրաստի ապրանքների ամենախոշոր գնորդներից է։ 2018 թվականին Հայաստանից Ռուսաստան արտահանումը 653,8 միլիոն դոլարի է հասել։ Մեծ ծավալով արտահանվում է ոչ միայն կոնյակ, այլև պատրաստի հագուստ, միրգ ու բանջարեղեն, դեղորայք ու նաև մշակված ադամանդ (հիմնականում` ռուսական ալմաստից)։
