ՆԻկոլ Փաշինյան

100 փաստ եմ ներկայացնում, որ թիվը կլոր լինի. Փաշինյանի տնտեսական թվերը

84
Վարչապետը նշեց, որ հեղափոխությունից հետո 82 մլն հատ հսկիչ դրամարկղային կտրոն ավելի է տպագրվել, որը շուրջ 35-40 տոկոս աճ է` նախորդ տարվա մայիս ամսվա համեմատ։

ԵՐԵՎԱՆ, 8 մայիսի — Sputnik. ՀՀ վարչապետ Նիկոլ Փաշինյանը, պաշտոնավարման մեկ տարին ամփոփելով, 100 փաստ հրապարակեց նոր Հայաստանի մասին։ Նա նշեց` ներկայացնում է 100 փաստ, որպեսզի թիվը կլոր լինի ու սկսեց թվարկել դրանք։

«Փաստերից մեկն այն է, որ ընթացիկ տարվա բյուջետային եկամուտները կգերակատարվեն ոչ թե 40 մլրդ դրամով` ինչպես հայտարարել էի, այլ 62 մլրդով։ Բացի այդ, 2019–ի առաջին եռամսյակում պետբյուջեի եկամուտները, նախորդ տարվա նույն ժամանակահատվածի համեմատ, ավելացել է 25 տոկոսով` 64.1 մլրդ դրամով, ինչը պայմանավորված է ստվերի կրճատման արդյունքում բյուջետային եկամուտների աճով։ 2018–ին հարկային եկամուտները և պետական տուրքերը կազմել են համախառն ներքին արդյունքի 21.8 տոկոսը, ինչը 2017–ի համեմատ, բարելավվել է 1.3 տոկոսային կետով»,–ասաց վարչապետը։

Նա հայտնեց նաև, որ կառավարության հարկ վճարողների հանդեպ ունեցած 120 մլրդ դրամ անցումային գերավճարի պարտք է մարվել, որը կազմում է ընդհանուր գերավճարի պարտքի 90 տոկոսը։ Խոսքն այն մասին է, որ ՊԵԿ–ն ու հարկային մարմինները գերավճարներ են պահանջել տնտեսվարողներից. 2018թ.–ի հունվարի 1–ի դրությամբ այդ պարտքը եղել է 130 մլրդ։ Այսինքն` բիզնեսը 130 մլրդ ավել փող է վճարած եղել` առանց դրա պարտավորությունն ունենալու։ «Իշխանափոխությունից հետո ՊԵԿ–ն ու հարկայինը հաշվետվություն են ընդունել, բայց դրա դիմաց փող չեն գանձել, ավելին` դեռ 120 մլրդ դրամի պարտավորություն էլ մարել են»,–ասաց նա։

Վարչապետը նշեց, որ հեղափոխությունից հետո 82 մլն հատ հսկիչ դրամարկղային կտրոն ավելի է տպագրվել, որը շուրջ 35-40 տոկոս աճ է` նախորդ տարվա մայիս ամսվա համեմատ։ Նա նշեց նաև, որ նոր սերնդի ՀԴՄ–ները փոքր և միջին ձեռնարկատերերին տրվում է 160 000 դրամի փոխարեն 60 000 դրամով։

Ինչ վերաբերում է աշխատատեղերին, ապա 51 000 աշխատատեղ է դուրս բերվել ստվերից. Փաշինյանի խոսքով` դրանց որոշ մասը, ենթադրաբար, նոր ստեղծված աշխատատեղեր են։

ՀՀ վարչապետը ևս մեկ փաստ նշեց` ասելով, որ այսուհետ հնարավոր է մեքենան մաքսազերծել հանրապետության բոլոր մաքսատներում, որոնք էլ աշխատում են առանց ընդմիջման ժամերի։ Սա, ըստ նրա, նպաստել է մեքենաների ներմուծման աննախադեպ աճին։

84
թեգերը:
«Թավշյա հեղափոխություն», Նիկոլ Փաշինյան, Հայաստան
թեմա:
ՀՀ վարչապետ Նիկոլ Փաշինյան (833)