Ցորենի բերքահավաք

Բաքուն թույլ չի տալիս Թբիլիսիին. ի՞նչն է խոչընդոտում Ղազախստանից Հայաստան ցորենի առաքմանը

250
Գյուղատնտեսական արտադրանքի մատակարարները տեսականորեն չեն կարող օգտվել Հայաստան ցորեն բերելու մի քանի ուղիներից։

ԵՐԵՎԱՆ, 30 ապրիլի — Sputnik, Լաուրա Սարգսյան. Ղազախստանից Հայաստան ցորեն բերելու հեռանկարը տեսականորեն հնարավոր է երկու ուղիներով։ Առաջինը փակ է Հայաստանի համար, որովհետև անցնում է Ադրբեջանի տարածքով։ Երկրորդը` Ռուսաստանի տարածքով, չափազանց երկար է։ Այդ պատճառով հայ բեռնափոխադրողները սահմանափակվում են ռուսական ցորեն ներկրելով։ Այդ մասին Sputnik Արմենիայի թղթակցի հետ զրույցում ասաց «Մանանա Գրեյն» ալյուր արտադրող ընկերության տնօրեն Գուրգեն Նիկողոսյանը։

Անցած շաբաթ Վրաստանի էկոնոմիկայի և կայուն զարգացման նախարար Նաթիա Տուրնավան պայմանավորվել է Ղազախստանի կառավարության ներկայացուցիչների հետ գյուղատնտեսական արտադրանքի մատակարարումների ծավալներն ավելացնելու մասին։ Եթե կողմերը վերջնական համաձայնության գան, և Ղազախստանը պետբյուջեից սուբսիդավորի իր ցորենի առաքումները վրացական շուկա` փոխհատուցելով մինչև 50 տոկոս տրանսպորտային ծախսերը, ապա Վրաստանում մեկ տոննա ղազախական ցորենն ավելի էժան կլինի, քան ռուսականը։ Հայաստանը տեսականորեն կարող էր օգտվել դրանից` համաձայնագիր կնքելով վրացի գործընկերների հետ։ Բայց ամբողջ հարցը տեղափոխման պայմաններն են։

«Վրաստանն այդ դեպքում Ղազախստանից ցորեն կներմուծի երկաթուղով` Ադրբեջանի տարածքով։ Քանի որ մենք Բաքվի հետ չունենք դիվանագիտական հարաբերություններ, մեզ համար այդ ճանապարհը փակ է», – ասաց Նիկողոսյանը։

Բացի այդ, Վրաստանի և Ադրբեջանի միջև կնքված է պայմանագիր. այն ամենը, ինչ անցնում է Բաքվի վերահսկողության տակ գտնվող տարածքներով, վրացական կողմն իրավունք չունի առաքել Հայաստան կամ վերավաճառել նրան։

Նիկողոսյանը նշեց, որ ղազախական ապրանքները կարող են մտնել հայկական շուկա Ռուսաստանի տարածքով` շրջանցելով Ադրբեջանը, սակայն այդ ուղին ավելի երկար է և թանկ։ Գործնականում դա այսպիսի տեսք կունենար. Ղազախստանից ցորենը պետք է հասնի Վլադիկավկազ, այդտեղից բեռնատարներով՝ «Վերին Լարս» հսկիչ անցակետով «Բագրատաշեն» հսկիչ անցակետ, այնուհետև ցորենը երկաթուղային տրանսպորտով առաքվում է Երևան։ Բեռնափոխադրողներին այդ երթուղին ձեռնտու չէ։ Ստեղծված իրավիճակից միակ ելքը Ռուսաստանում ցորեն գնելն է և այն բեռնատարներով «Վերին Լարսով» Հայաստան հասցնելը։ Այդ ճանապարհն ավելի կարճ է` ընդամենը 700 կմ։

Այսօրվա դրությամբ երրորդ կարգի ամուր տեսակների ցորենի տոննան Ռուսաստանում արժե մոտ 13 հազար ռուբլի (մոտ 200 դոլար), իսկ Ղազախստանում` 49 հազար տենգե (128,64 դոլար)։ Անցած տարի հայ թրեյդերները մեծածախ ռուսական ցորեն են գնել մեկ տոննայի համար 15 հազար ռուբլով։

Վրաստանի տրանսպորտային միջանցքի ուսումնասիրության կենտրոնի տնօրեն Պաատա Ցագարեիշվիլին կասկածում է, որ հայ թրեյդները կարող են օգուտ քաղել Վրաստանի և Ղազախստանի նոր պայմանավորվածություններից, քանի ո ցորենը տեղափոխվելու է Ադրբեջանի տարածքով։

«Ակնհայտ է, որ առանց Ադրբեջանի չի լինի։ Ցորենը Ակտաուից տեղափոխվելու է Բաքվի նավահանգիստ, այնուհետև երկաթուղով այն Ադրբեջանից կհասնի Վրաստան», – ասաց Ցագարեիշվիլին Sputnik Արմենիայի թղթակցի հետ զրույցում։

Նա նշեց, որ Ադրբեջանը շրջանցելու ևս մեկ երթուղի կա` Թուրքմենստանը։ Այդ ճանապարհով արդեն կատարվել է նավթամթերքի տեղափոխություն։ Բայց գյուղատնտեսական արտադրանք առայժմ չի առաքվել։

Ինչ վերաբերում է Վրաստանով ավտոմոբիլային ճանապարհով ցորենը տեղափոխելուն, Ցագարեիշվիլին նշեց, որ վրացական կողմը, ամենայն հավանականությամբ, թույլ կտա ցորենի առաքումները։

Հիշեցնենք, որ Վրաստանը երեք անգամ տեղափոխել է արգելքի ժամկետը։ Առաջին անգամ այն պետք է ուժի մեջ մտներ սեպտեմբերի 15-ին, հետո` հունվարի 1-ին։ Արդյունքում վրացի ներկրողների քառօրյա բողոքից հետո կառավարությունը քննարկումը հետաձգեց մինչև 2019թ-ի հոկտեմբերի 1։

«Ամենայն հավանականությամբ, կոշտ արգելք չի լինի։ Ցանկացած մատակարարող հնարավորություն կունենա ինքնուրույն ընտրել, թե որ ճանապարհով է ցանկանում ներկրել  ցորենը` երկաթուղային, թե ավտոմոբիլային», – կարծում է Ցագարեիշվիլին։

Բայց վրացական իշխանությունները մտադիր են սահմանափակումներ մտցնել ավտոտրանսպորտով ապրանքներ տեղափոխելու վրա, որպեսզի ակտիվացնեն երկաթուղային առաքումները։ Այդ նպատակով 2019թ–ի հուլիսի 1–ից Հայաստանից փոխադրողների համար կսկսեն գործել ավտոմոբիլային փոխադրումների քաշը կարգավորող նոր չափանիշներ։ Մասնավորապես, յուրաքանչյուր բեռնատար կարող է Վրաստանի տարածքով տեղափոխել 40 տոննայից ոչ ավելի բեռ, այդ կանոնին չհետևելու դեպքում յուրաքանչյուր ավել տոննայի համար սահմանվել է 50 լարի (մոտ 20 դոլար) տուգանք։

Ցագարեիշվիլին կարծում է, որ նոր կարգավորումների դեպքում փոխադրողների ֆինանսական շահույթը կնվազի։

Դրա հետ կապված` այժմ բանակցություններ են ընթանում երկաթուղով և լաստանավով փոխադրումների սակագները նվազեցնելու համար։ Առավել ևս, որ Փոթի նավահանգիստը հայտարարել է իր ծառայությունների նոր, ավելի մրցունակ սակագներ սահմանելու մասին։

250
թեգերը:
Հայաստան, Վրաստանի Հանրապետություն, Ադրբեջան
Ըստ թեմայի
Ցորեն ցանեք, փող ստացեք. վարչապետը խոստանում է խրախուսել սահմանամերձ գյուղերի բնակիչներին
Բանակցում են. ի՞նչ կորոշեն Երևանն ու Թբիլիսին հացահատիկի տեղափոխման արգելքի հարցում
ՀԿԵ–ն պատրաստ է աջակցել Հայաստանի համար կարևոր տրանսպորտային երթուղուն. Սերգեյ Վալկո
Ինչպե՞ս ռուսական ցորենը Հայաստան հասցնել. ՌԴ հացահատիկային բույսերի մասնագետի բանաձևը
Ցորենը վերադարձնել ռելսերի վրա, քանի դեռ Բենդեր–Աբասը պատժամիջոցների տակ է
Բուլղարացի Գևորգը ցանկանում է «աչքերով ուտող» եվրոպացիներին ընտելացնել հայկական մրգերին
Վարդան Արամյան

Տնտեսական անկումը երկնիշ թվով կլինի՞. նախկին նախարարը իշխանությանը լավատես է համարում

104
(Թարմացված է 22:21 07.07.2020)
Միջազգային ֆինանսական կառույցները շարունակում են վատթարացնել 2020թ-ի տնտեսական կանխատեսումները: Հայաստանի իշխանությունն այս հաշվարկներից հետ է մնում: Ֆինանսների նախկին նախարարի դիտարկմամբ` այս ուշացման պատճառով դարձյալ տուժելու է ՀՀ շարքային քաղաքացին:

ԵՐԵՎԱՆ, 7 հուլիսի – Sputnik. Կենտրոնական բանկն ու կառավարությունն իրենց տնտեսական կանխատեսումներում չափազանց լավատես են: Sputnik Արմենիայի հետ զրույցում տնտեսական վերջին կանխատեսումներն այսպես որակեց ֆինանսների նախկին նախարար Վարդան Արամյանը՝ վկայակոչելով համաշխարհային ֆինանսական կազմակերպությունների վերջին կանխատեսումները:

«Բոլոր կանխատեսումներում վերջին 5-6 ամիսների ընթացքում շատ արագ ճշգրտումներ կատարվեցին: Օրինակ՝ Արժույթի միջազգային հիմնադրամը (ԱՄՀ) հունվարին ՀՆԱ-ի 3.2% աճ էր կանխատեսում: Այնուհետև ապրիլին, հաշվի առնելով համավարակի շատ արագ տարածումը, այդ աճը փոխվեց 3% անկման: Այսինքն՝ ավելի քան 6 տոկոսային կետով վերանայվեց կանխատեսումը: Դրան հետևեց նաև հունիսի ճշգրտումը, որն էլ ավելի խորացրեց անկման կանխատեսումը: Համաշխարհային այսպիսի արագացող զարգացումների ֆոնին ակնկալել, որ ՀՀ-ն դեռևս ունակ է հաղթահարելու զրոյական աճը կամ ակնկալել, որ գտնվելու է 2.4% անկման շրջանակներում, կարծում եմ` չափից ավելի լավատեսական սպասում է»,- ասաց Արամյանը:

Նշենք, որ 2020 թվականի պետական բյուջեի մասին օրենքում դեռևս ապրիլին կատարված ճշգրտումների համաձայն` կորոնավիրուսի պատճառով ստեղծված իրավիճակում տարեվերջին, ֆինանսների նախարարության հաշվարկով, նախատեսվում է արձանագրել ՀՆԱ-ի 2-2.4 տոկոսի անկում: Մինչդեռ Կենտրոնական բանկի երկրորդ եռամսյակի հաշվետվության համաձայն` տնտեսական աճի սպասումներն արդեն փոխարինվել են 4%-անոց անկմամբ:

Արամյանի կարծիքով` ներկա զարգացումների ու առողջապահական իրավիճակի պահպանման դեպքում շատ ավելի իրատեսական է, որ Հայաստանում այս տարի տնտեսական անկումն արտահայտվի երկնիշ թվով:

«Որովհետև աշխարհում հեռանկարներն ավելի վատանում են: Ընդ որում` ԱՄՀ-ն էլ նշել է, որ հնարավոր է` 2 ամիս հետո վերանայի իր անկման կանխատեսումները ՝ կախված այն բանից, թե ինչպես երկրները կհաղթահարեն առողջապահական ճգնաժամը, իսկ մենք հիմա ունենք փաստ, որ դեռևս դեղամիջոց գտնված չէ»,- ասաց նա:

Մյուս կողմից տնտեսական ճգնաժամի հնարավոր խորությունն, ըստ Արամյանի, հնարավոր է հաշվարկել նաև տվյալ երկրի կառավարության կիրառած հակաճգնաժամային փաթեթների արդյունավետությամբ:

Եթե աշխարհում կան երկրներ, որտեղ այդ փաթեթները հավասար են ՀՆԱ-ի 30-40%-ին, ապա Հայաստանում իրականացված ծրագրերն այս պահին գնահատվում են մեր երկրի ՀՆԱ-ի 2.3- 2.4%-ի չափով:

«Այնուամենայնիվ պետք է փաստենք, որ իրավիճակը գնալով վատթարանում է, և ես պետք է շեշտեմ, որ այս կանխատեսումները ոչ թե նրա համար են, որ մենք մեր տնտեսվարողներին ու քաղաքացիներին վախեցնենք կամ հոռետեսական սպասումներով լցնենք, այլ որպեսզի կարողանանք ճգնաժամային իրավիճակում իրականությունը ճիշտ գնահատել հակազդեցության ճիշտ գործիքակազմ կիրառելու համար»,- ասաց Արամյանը:

Հակառակ պարագայում իշխանությունների սխալ հաշվարկից տուժողը դարձյալ լինելու է ՀՀ շարքային քաղաքացին:

Հիշեցնենք՝ 2020թ-ի բյուջեով ՀՀ-ում նախատեսված էր տարեկան 5.3% տնտեսական աճ: Մարտին ԿԲ-ն առաջին եռամսյակի հաշվետվությամբ այդ ցուցանիշը վերանայել էր՝ նվազեցնելով 0.7%-ի: Հունիսի 30-ին հրապարակված երկրորդ եռամսյակի հաշվետվությամբ ԿԲ-ն տնտեսական աճի փոխարեն 4% տնտեսական անկում է կանխատեսել:

ԿԲ-ն խոստանում է դիմադրել կորոնավիրուսի ոչ միայն երկրորդ, այլև երրորդ, չորրորդ ալիքներին

104
թեգերը:
Վարդան Արամյան, Հայաստան
Ըստ թեմայի
Թանկ և էժան տներ Հայաստանում. ով որքան է վճարելու անշարժ գույքի համար
Հայաստանի վարկային կազմակերպությունները վիրուսի պատճառով նվազեցրել են տոկոսները
ԵԱՏՄ–ում էներգակիրների միասնական շուկան հնարավոր կլինի կուլմինացիայի դեպքում. Լուկյանով
Հրանտ Բագրատյան, արխիվային լուսանկար

Հայաստանը 1 շնչին ընկնող ՀՆԱ ցուցանիշով հետ է Վրաստանից և Ադրբեջանից. Բագրատյան

110
(Թարմացված է 11:16 03.07.2020)
Հրանտ Բագրատյանը նոր տվյալներ է հրապարակել` հայտնելով, որ Նիկոլ Փաշինյանի սպասելիքները չեն արդարացել։

ԵՐԵՎԱՆ, 3 հուլիսի - Sputnik. Հայաստանը բնակչության 1 շնչին ընկնող ՀՆԱ ցուցանիշով հետ է մնացել ինչպես Վրաստանից, այնպես էլ Ադրբեջանից։ Facebook սոցցանցի իր էջում նման գրառում է արել ՀՀ նախկին վարչապետ Հրանտ Բագրատյանը` հիշեցնելով վարչապետ Նիկոլ Փաշինյանի դեռ նախորդ տարեվերջին արած հայտարարությունը։

«Դեկտեմբերին Փաշինյանը հայտարարեց, որ շնորհիվ 2019-ի բարձր տնտեսական աճի` բնակչության 1 շնչին ընկնող ՀՆԱ ցուցանիշով 2019-ին անցել ենք Վրաստանից (վկայակոչում էր ԱՄՀ ինչ-որ հրապարակում) և 2020-ին էլ կանցնենք Ադրբեջանից։ Սահակաշվիլին էլ, լինելով այսօրվա վրացական իշխանությունների ընդդիմախոսը, հայտարարել էր, թե` վույ մե քոռանամ, այս ի՞նչ օրի է Վրաստանը»,–գրել է նա։

Բագրատյանը հիշեցնում է, որ ինքն էլ այդ ժամանակ հայտարարել է, թե ճտերն աշնանն են հաշվում. սպասեք տարին վերջանա, հետո կխոսենք։ Նա նշել է, որ Համաշխարհային բանկն պաշտոնապես հրապարակել է վերը նշված ցուցանիշի մեծությունը բոլոր երկրների համար։ Ըստ այդմ` ՀՀ-ում այն հավասար է 4622.7, Վրաստանում՝ 4769.2 և Ադրբեջանում՝ 4793.6։ Գալով այդ ցուցանիշի գնողունակության պարիտետով նշանակությանը, այստեղ ևս ՀՀ-ն զիջում է և՛ Վրաստանին, և՛ Ադրբեջանին։ Ցուցանիշներն այսպիսին են` Հայաստան՝ 14219.6, Վրաստան՝ 15636.6 և Ադբեջան՝ 15000.8։

Ի՞նչ է սպասում Հայաստանի տնտեսությանը տարեվերջին. կանխատեսում են մասնագետները

Բագրատյանը գրել է նաև, որ Հայաստանի համար անկախության 30 տարիների հաշվով սա վատագույն համեմատական մեծություններից է. 1995-1999թթ Հայաստանը առաջ էր Ադրբեջանից, իսկ 2005-2009թթ.` Վրաստանից։

Հիշեցնենք, որ 2019-ի տարեվերջին Փաշինյանն ԱԺ–ից հայտարարել էր, որ 2019 թվականի արդյունքներով՝ 1 շնչին ընկնող ՀՆԱ-ի ցուցանիշով կանցնենք Վրաստանին, իսկ 2020 թվականի արդյունքներով՝ նաև Ադրբեջանին։
Ավելի ուշ` այս տարվա հունվարին Փաշինյանը Facebook–ի իր էջում գրել էր, որ Արժույթի միջազգային հիմնադրամը պաշտոնապես հաստատել է իր «սպասումը»` 2019 թվականի արդյունքներով անցել ենք Վրաստանին, 2020 թվականին կանցնենք Ադրբեջանին՝ դառնալով Հարավային Կովկասի առաջատար երկիրը։

ՊԵԿ նոր նախագահը մտահոգված է հարկերի հավաքագրման ցուցանիշներով

110
թեգերը:
Վրաստանի Հանրապետություն, Ադրբեջան, ՀՆԱ (համախառը ներքին արդյունք), տնտեսություն, Հրանտ Բագրատյան, Հայաստան
Ըստ թեմայի
17․2% տնտեսական անկում․ ինչ վիճակում է ՀՀ տնտեսությունը, և արդյոք կավելանա արտաքին պարտքը
Կորոնավիրուսի համավարակն ու Հայաստանի տնտեսությունը. կկարողանա՞նք ոտքի վրա մնալ
Հայաստանը պետք է լինի պատրաստի արտադրանքի երկիր. կորոնավիրուսը կանցնի, տնտեսությունը կմնա
«Մեր տնտեսությունը և բնակչությունը պետք է պատրաստվեն տնտեսական մեծ անկման». Պարսյան
«Արմատա» Տ-14

«Արմատան» կարտահանվի․ ով առաջինը կստանա Տ-14 նորագույն ռուսական հզոր տանկը

54
(Թարմացված է 23:52 07.07.2020)
Ռուսաստանը շարունակում է զենքի միջազգային շուկայում «նեղել» մրցակիցներին և աշխարհում նմանը չունեցող նմուշ է առաջարկում՝ 2-րդ սերնդի «Արմատա» Տ-14 տանկը։ Դա վկայում է ռուսական պաշտպանաարդյունաբերական համալիրի հաջող զարգացման մասին։

Ալեքսանդր Խրոլենկո, ռազմական վերլուծաբան

Ռազմատեխնիկական համագործակցության գծով դաշնային ծառայության ղեկավար Դմիտրի Շուգաևը հուլիսի 6-ին ասել է, որ Մոսկվան մտադիր է արտահանել «Արմատա» Տ-14 նորագույն տանկերը։ Ռուսաստանը բացառապես վստահելի ու արդյունավետ զենք է վաճառում, որը պահանջարկ է ունենալու և առաջ է անցնելու մրցակիցների արտադրությունից։  

Танки Т-14 Армата
© Sputnik / Евгений Одиноков
«Արմատա» Տ-14

Հետաքրքրական է, որ սա հետպատերազմյան երրորդ սերնդի ստեղծած միակ տանկն է աշխարհում։ Նույնիսկ ՌԴ պաշտպանության նախարարությունն այս եզակի զրահատեխնիկայի դեռևս 132 միավոր ստանալու պայմանավորվածություն ունի։ Ակնկալվում է, որ դրանք կմատակարարվեն մինչև 2021 թվականի ավարտը։ Արտասահմանյան վաճառքը կսկսվի այն բանից հետո, երբ կկատարվի ՌԴ պաշտպանության նախարարության պատվերն ու կհաստատվի մեքենայի արտահանման տեսքը (մասնագետները որոշում են՝ ինչը կարող է արտասահման գնալ, իսկ որ տեսակներն են օգտագործելու բացառապես ռուսաստանյան զորքերը)։

Բարձր տեխնոլոգիական տանկը էժան չէ՝ մինչև 7 միլիոն դոլար մեկ միավորի դիմաց, ընդ որում՝ «Արմատայի» հանդեպ արդեն հետաքրքրություն են ցուցաբերել Եգիպտոսը, Հնդկաստանը, Չինաստանը։ Ի դեպ, հայտնի արտասահմանյան տանկերը ՝ Ամերիկյան «Աբրամսը», ֆրանսիական «Լեկլերկը», գերմանական «Լեոպարդը», Իսրայելական «Մերկավան», վաճառվում են 6 – 12 միլիոն դոլար գնային դիապազոնում։

Հավանական պատվիրատուները

Ավելի վաղ Եգիպտոսը որոշել էր 400 – 500 հատ նորագույն ռուսական Տ-90ՄՍ տանկ պատվիրել ու հավանաբար հետագայում Տ-14 կպատվիրի։ Հնդկաստանը պատրաստվում է մինչև 1770 ժամանակակից տանկ ձեռքբերել ու դիտարկում է նաև «Արմատան»․ նախնական գործարքի գումարը 442 մլրդ ռուբլի է գնահատվում։ Հաստատ անտարբեր չի մնա նաև Չինաստանը։

Ռուսական նորագույն տանկի արտահանման ծավալները դեռ որոշված չեն։ Անկասկած Տ-14-ը կծառայի նաև ԱՊՀ երկրների ամրապնդմանը։ Ավելի վաղ ակտիվորեն ռուսական արտադրության զրահատեխնիկա էին գնում Հայաստանը, Ադրբեջանը, Բելառուսը, Ղազաստանը, Ուզբեկստանը։

Ռուսաստանը խաղաղ քայլերով գրավել է զենքի համաշխարհային շուկայի մոտ մեկ երրորդը։ «Ռոսոբորոնէքսպորտը» 55 միլիարդ դոլարի պատվեր ունի (ԱՄՆ-ից հերո աշխարհում երկրորդ տեղն է)։ Ռուսական զենքի արտահանման մոտ 15%-ը ցամաքային տեխնիկա է։ ՌԴ-ն կարողացել է նոր տանկերի շուկայում չճանաչված առաջատար դառնալ։ Պատահական չէ, որ Արւմուտքում Տ-90 տանկն անվանել են «ռուսական պաշտպանական մահաբեր հիթ»։ Առաջիկա տարիներին «Ուրալվագոնզավոդը» մոտ 2500 Տ-90ՄՍ տանկ կուղարկի պատվիրատուներին։ Նորագույն Տ-14-ը խոստանում է արտահանման հաղթարշավի արժանի շարունակողը դառնալ։

Տեխնոլոգիական գերազանցությունը

Տ-14-ը նախատեսված է հակառակորդի հետ անմիջական շփմամբ մարտի, մոտոհրաձգային ստորաբաժանումների հարձակմանն աջակցելու, հակառակորդի ամրաշինական կառույցների, թաքստոցներում ու բաց տարածքում կենդանի ուժի վերացման համար։ «Արմատա» տանկը հաջողությամբ փորձարկվել է Սիրիայի Արաբական Հանրապետության տարածքում մարտական պայմաններում։

Միայն Ռուսաստանը նման զենք ունի, բայց առանց լուրջ պատճառի երբեք չի գործարկի

 «Արմատան» աշխարհում  նորագույն կառուցվածք ունեցող առաջին տանկն է, որ ստացել է ամբողջ էլեկտրամագնիսական սպեկտրում նկատելիության նվազեցման «սթելս-տեխնոլոգիաները»։ Մեքենան ունի հատուկ համակարգ, որի շնորհիվ մարտի դաշտում Տ -14-ի յուրաքանչյուր անձնակազմ գործում է ոչ թե առանձին, այլ մարտավարական օղակի կառավարման միասնական համակարգում։

Առաջատար երկրների մասնագետները երկու տասնամյակ է մտածում են կառուցվածքով Տ-14-ին նման տանկ ստեղծելու գաղափարի շուրջ։ Առաջխաղացում կա, սակայն միայն Ռուսաստանը կարող է սերիական արտադրություն սկսել։

Танки Т-14 Армата
© Sputnik / Михаил Воскресенский
«Արմատա» Տ-14

«Արմատան» աշխարհում ուղիղ մրցակիցներ կամ անալոգներ չունի։ Նախորդ տարի Տ-14-ն ամենազարգացած երկների 12 մեքենաների շարքում լավագույնն է ճանաչվել։ Ռուսաստանը միայնակ է ստեղծել այն։ Առանց չափազանցության սա կարելի է համարել տանկաշինության ոլորտի տեխնոլոգիական հեղափոխություն, այն իրավամբ կարող է զգալի տնտեսական ու ռազմաքաղաքական դիվիդենտներ բերել։

54
թեգերը:
ԱՄՆ, արտադրություն, Զենք, արտահանում, Ռուսաստան, տանկ
Ըստ թեմայի
Տեղում դոփելով․ ամերիկյան Patriot ՀՕՊ համալիրների հերթական ձախողումը
Մարտական համակարգերի «մարդասպանը». ՌԴ-ում 10 կմ հեռահարության թնդանոթներ են ստեղծել
«Մոնթե» ջերմատեսիլներ և ՀՀ–ում արտադրվող «Կալաշնիկով». Փաշինյանն այցելեց գործարան