ԵՐԵՎԱՆ, 29 ապրիլի – Sputnik. Ռուսաստանն ու Հայաստանը պատրաստվում են համաձայնեցնել մինչև 2030 թվականը Հայաստանի գազամատակարարման և գազիֆիկացման գլխավոր սխեմաները։ Ինչպես տեղեկացնում է ՌԻԱ Նովոստին, լրագրողներին այս մասին հայտնել է ՌԴ կառավարության աշխատակազմի ղեկավարի առաջին տեղակալ Սերգեյ Պրիխոդկոն։
«Մեր երկրները շատ մեծ ուշադրություն են դարձնում գազային ոլորտի համագործակցությանը: Մշակման ընթացքում են ինչպես ընթացիկ, այնպես էլ հեռանկարային թեմաները: Օրինակ՝ պայմանավորվածություն կա համաձայնեցնելու մինչև 2030 թվականը Հայաստանի գազամատակարարման և գազիֆիկացման գլխավոր սխեմաները»,- ասել է Պրիխոդկոն:
Նա նաև նշել է, որ մինչև 2019 թվականի հուլիսի 1-ը կողմերը կանցկացնեն անհրաժեշտ ներպետական խորհրդակցություններ՝ ՌԴ-ից Հայաստան բնական գազի մատակարարման գների ձևավորման մասին Ռուսաստանի ու Հայաստանի միջև նոր համաձայնագիր կնքելու համար:
Ապրիլի 4–ին Մոսկվայում միջկառավարական հանձնաժողովի նիստի ժամանակ հայկական կողմը գազի գնի հնգամյա պլանավորում էր առաջարկել։ Մինչև հուլիսի 1–ը կներկայացվի համաձայնագրի նախագիծ, որտեղ ներկայացված կլինեն սահմանին գազի գնագոյացման մեխանիզմները։
Հիշեցնեք` 2019 թվականի հունվարի 1–ից սահմանին Հայաստանը Ռուսաստանից գազը ստանում է հազար խորանարդ մետրի դիմաց 165 դոլար գնով՝ նախկին 150-ի փոխարեն։ Իսկ բնակչության համար սակագինը նույնն է մնացել ընկերության ծախսերի կրճատման հաշվին։ Այս կապակցությամբ «Գազպրոմ Արմենիան» հիմա անձնակազմի կրճատման ու ծախսերի օպտիմալացման հարցեր է քննարկում։ Հակառակ դեպքում սպառողների համար սակագնի պահպանումը կարող է հսկայական պարտքերի հասցնել ընկերությանը։
«Գազպրոմ Արմենիան», որը 100%–ով պատկանում է «Գազպրոմին», գազ է մատակարարում Հայաստանի ներքին շուկային։