Գրավատուն. արխիվային լուսանկար

«Գրավատներն անսահմանափակ տոկոսներ են վերցնում, բայց բողոքում հարկերից». Դավիթ Անանյան

32
(Թարմացված է 21:43 03.04.2019)
Գրավատները և փոխանակման կետերը բողոքում են ապագա բարձր հարկերից, բայց միաժամանակ շրջանցում են մի շարք կարևոր փաստարկներ, նշեց Դավիթ Անանյանը։

ԵՐԵՎԱՆ, 3 ապրիլի — Sputnik. Հայաստանում գրավատներն անսահմանափակ տոկոսներ են գանձում, բայց բողոքում են բարձր հարկերից։ Այդ մասին մամուլի ասուլիսում հայտարարեց Հայաստանի Պետական եկամուտների կոմիտեի ղեկավար Դավիթ Անանյանը։

«Պետական տուրքի մասին» ՀՀ օրենքում փոփոխություններ և լրացումներ կատարելու մասին» նախագծով առաջարկվում է գրավատների ու արժույթի փոխանակման կետերի համար 60 անգամ ավելացնել պետտուրքերը։  Նախագծով առաջարկվում է վարկային կազմակերպությունների համար գործող 500 հազար դրամի փոխարեն սահմանել տարեկան 1 միլիոն դրամ տուրք, վճարահաշվարկային համակարգերի համար` 250 հազարի փոխարեն 1 միլիոն դրամ, վարկային բյուրոների համար` 500 հազարի փոխարեն 1 միլիոն դրամ, բանկերի համար` 3 միլիոնի փոխարեն 7 մլն դրամ, գրավատների համար` 100 հազարի փոխարեն 1 միլիոն դրամ, արժույթի փոխանակման կետերի համար` 50 հազարի փոխարեն 3 միլիոն դրամ, արժույթային դիլերների համար` 100 հազարի փոխարեն 3 միլիոն դրամ։

Այդ բիզնեսի ներկայացուցիչները մի քանի անգամ բողոքի ակցիա են անցկացրել կառավարության շենքի դիմաց։

Բայց թե՛ փոխանակման կետերը, թե՛ գրավատները պետք է հաշվի առնեն երկու կարևոր պահ, նշեց Անանյանը։

«Պետտուրքի գումարը հանդիսանում է շահութահարկի հարկման բազան նվազեցնող ծախս: Հիմա պետք է նայենք, որ այդ պետտուրքի 18 տոկոսի չափով իրենք հնարավորություն են ունենալու նվազեցնել իրենց հարկման օբյեկտը: Եթե իրենք հայտարարում են, որ ամբողջությամբ գործել են թափանցիկ և իրենց եկամուտները հայտարարագրել են ամբողջությամբ ու հարկերը վճարել են ամբողջ ծավալով, ապա իրենք որևէ խնդիր չպետք է տեսնեին տուրքը 100 հազարից 6 մլն դրամ դարձնելու առումով: 6 մլնի 18 տոկոսը կազմում է մոտ 1 մլն 100 հազար դրամ, այսքանով պակաս շահութահարկ պետք է վճարեին», - նշեց Դավիթ Անանյանը:

Բացի այդ, գրավատները հիմա աշխատում են անսահմանափակ տոկոսով։ Բանկերը և վարկային կազմակերպություններն իրավունք չունեն 24 տոկոսից բարձր տոկոսադրույքով վարկեր տրամադրել։ Իսկ գրավատները ցանկացած տոկոս կարող են դնել։

«Միաժամանակ, անցած տարի 129 գրավատներ վճարել են ընդամենը 140 միլիոն դրամ հարկ», – ասաց Անանյանը։

Նշենք, որ փոփոխությունների նախագծի համաձայն, գրավատների և փոխանակման կետերի համար պետտուրքերը պետք է ուժի մեջ մտնեն 2020թ–ի հունվարի 1–ից։

32
թեգերը:
Հայաստան, Կենտրոնական բանկ (ԿԲ)
Ըստ թեմայի
Հետդարձի ճանապարհ չի լինելու. ՊԵԿ–ը բավականին շատ հարկ է հավաքել 1–ին եռամսյակում
ՊԵԿ–ն ամեն ամիս պարգևատրումներ է տալու. Դավիթ Անանյանը խոստացավ
Նիկոլ Փաշինյանի և ՊԵԿ-ի տվյալները չեն համընկնում. ո՞րն է «ստվերի» գաղտնիքը
Փաշինյանն ամփոփել է ՊԵԿ–ի աշխատանքի արդյունքները. գերակատարումներ ու գերազանցումներ
ՊԵԿ-ը զրկվեց ՀԴՄ-ներ ներկրելու ու վաճառելու մենաշնորհից