Բեռնափոխադրում

Բեռնափոխադրողներն անհանգստացած են հարկերից, իսկ Ֆիննախը հայտարարում է՝ դրանք կնվազեն

142
(Թարմացված է 18:40 31.01.2019)
Միջազգային բեռնափոխադրման ծառայություն մատուցող գործարարներն անհանգստացած են հարկային օրենսգրքում կառավարության առաջարկած փոփոխություններից։ Ֆինանսների նախարարությունը վստահեցնում է, որ դրանք հօգուտ բիզնեսի են։

ԵՐԵՎԱՆ, 31 հունվարի — Sputnik. Հայաստանցի բեռնափոխադրողներն անհանգստացած են։ Նրանց խոսքով, սահմանված հարկային բեռն իրենց մի քանի տարի հետո հասցնելու է սնանկացման։

Իրենց այս մտահոգությամբ այսօր` հունվարի 31-ին, բեռնափոխադրող ընկերությունների ներկայացուցիչները հավաքվել էին կառավարության շենքի մոտ` հանդիպում պահանջելով ֆինանսների նախարար Ատոմ Ջանջուղազյանի հետ:

«2018թ. հունվարի 1-ից գործող հարկային օրենսգրքի դրույթների հետ կապված քննարկում ենք ուզում: Մենք այս հարցը բարձրացրել ենք 2016թ-ից հետո, երբ հարկային օրենսգիրք էր մշակվում: Այդ ժամանակից տարբեր պետական մարմինների հետ նամակագրությամբ փորձում ենք հասնել ընդհանուր հայտարարի»,- լրագրողներին ասաց հավաքվածներից մեկը։

Բեռնափոխադրողները հայտնեցին, որ մինչ հարկային նոր կարգավորումներն իրենք աշխատել են հաստատագրված վճարով, հիմա` ընդհանուր հարկման դաշտում։

«Այսպես աշխատելու դեպքում մենք ծախսերի փաստաթղթային ձեւակերպումների ու դրանց ճանաչման լուրջ խնդիր ենք ունենում։ Օրինակ` վառելիքը լցնում ենք կտրոններով, որոնց ճանաչման լուրջ խնդիր կա»,– ասաց նա` հայտարարելով, որ իրենք իրականում վնասով են աշխատում։

«Եթե այսպես շարունակվի, բոլորը կփակվեն, մոտ 5000 մարդ գործազուրկ կմնա»,– հայտարարեց բեռնափոխադրողը։

Բեռնափոխադրողների բարձրացրած խնդրով Sputnik Արմենիան դիմել է Ֆինանսների նախարարություն։

«Միջազգային բեռնափոխադրման ծառայություն մատուցողների կողմից արտերկրում կատարվող ծախսերի փաստաթղթավորման նկատմամբ պահանջները սահմանում է Կառավարությունը, այսինքն՝ նշյալ սուբյեկտների մասով կիրառվելու են արտերկրում կատարվող ծախսերի փաստաթղթավորման առանձնահատուկ մոտեցումներ»,– մեր հարցմանն ի պատասխան հայտնում են Ֆիննախից։

Միաժամանակ, ըստ նախարարության` «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագծով առաջարկվում է որոշակիորեն նվազեցնել ճանապարհային հարկի դրույքաչափերը՝ դրանք մոտարկելով մինչև 2018 թվականի հունվարի 1-ը սահմանված դրույքաչափերին:

Ինչ վերաբերում է օրենքի նախագծով նախատեսված փոփոխություններին, ըստ ֆինանսների նախարարության տրամադրած տեղեկանքի` եթե գործող օրենքով 20-25 տոննա  զանգվածով ավտոմեքենաներն այժմ տարեկան վճարում են 120 000 դրամ, ապա օրենքի փոփոխության նախագծով նախատեսվում է տարեկան 86 000 դրամ։ 25-30 տոննա զանգվածով ավտոմեքենաների դրույքաչափերը տարեկան 240 000–ից նախատեսվում է նվազեցնել 185 000 դրամ, 30- 35 տոննա զանգվածով ավտոմեքենաներինը 360 000–ից` 288 000-ի, իսկ 35 տոննան գերազանցող ավտոմեքենաներինը 480 000–ից` 408 000։

Իսկ մինչև 20 տոննա զանգվածով ավտոմեքենաների տարեկան դրույքաչափը կմնա անփոփոխ։ Ըստ ֆիննախի տեղեկանքի` դրանք և՛ հիմա, և՛ հետագայում ազատված են լինելու տարեկան վճարումներից։

142
թեգերը:
Ատոմ Ջանջուղազյան, Հայաստան