ՀՀ վարչապետ Նիկոլ Փաշինյանն ու ՌԴ նախագահ Վլադիմիր Պուտինը

ԵԱՏՄ միասնական էներգաշուկա․ արդյո՞ք գործընկերները ականջալուր կլինեն Փաշինյանի կոչերին

376
Մոսկվայում ելույթի ժամանակ Փաշինյանը էլեկտրաէներգիայի ընդհանուր շուկայի ստեղծումն անվանեց Հայաստանի գերակա ուղղություններից մեկը։

ԵՐԵՎԱՆ, 27 հունվարի — Sputnik, Աշոտ Սաֆարյան․ Եվրասիական տնտեսական միության անդամները առանձնապես հույսեր  չեն կապում էլեկտրաէներգիայի ընդհանուր շուկայի ստեղծման նախագծի վերաբերյալ: Դրա մասին է վկայում թեկուզ միայն այն, որ ի սկզբանե ենթադրվում էր էլեկտրաէներգիայի միասնական շուկա ձևավորել, իսկ հետո «միասնական» բառը փոխարինվեց «ընդհանուրով»։

Դա նշանակում է, որ միության անդամները մտադիր են գնալ իրենց էներգահամակարգերի ինտեգրացիայի ճանապարհով, սակայն պահպանելով ազգային շուկաների առանձնահատկությունները։ Sputnik Արմենիայի հետ զրույցում նման կարծիք հայտնեց էներգետիկ անվտանգության ոլորտի փորձագետ  Վահե Դավթյանը։

Ավելի վաղ Մոսկվայում ԵԱՏՄ նախագահությանը Հայաստանին անցնելու կապակցությամբ ելույթ ունենալիս ՀՀ վարչապետ Նիկոլ Փաշինյանն ասել էր, որ էլեկտրաէներգիայի ընդհանուր շուկայի ստեղծումը Երևանի գերակա ուղղություններից է։ Նրա խոսքով՝ պետք է ակտիվացնել ջանքերը կապված ԵԱՏՄ շուկայի շրջանակում համաձայնեցված էներգետիկ քաղաքականութան  մշակման հետ, նաև էներգառեսուրսների ոլորտում գնագոյացման հետ կապված խտրականության վերաբերյալ։

Ինչպես հայտնի է, ԵԱՏՄ երկրների նախագահներն արդեն հաստատել են էլեկտրաէներգիայի, նավթի/նավթամթերքի ու գազի ընդհանուր շուկաների հայեցակարգերը։ Նախատեսվում է միասնական էներգետիկ շուկաներ ստեղծել մինչ 2025 թվականը։

Դավթյանի կարծիքով՝ հիմնարար խնդիրն այն է, որ ԵԱՏՄ անդամ երկրներում էլեկտրաէներգիայի ներմուծման պահանջարկը շատ ցածր է։

Այսօր միայն Բելառուսում որոշ պակասուրդ կա, այն էլ շուտով կվերանա Բելառուսական Ատոմակայանի մեկնարկի հետ կապված։ Ղազախստանում էլեկտրաէներգետիկ ոլորտը արագ տեմպերով զարգանում է, առաջիկա տարիներին Աստանայում նախատեսվում է ինքնաապահովման նոր մակարդակի դուրս գալ։ Ինչ վերաբերում է Ռուսաստանին՝ ապա այստեղ գեներացիան տասնյակ անգամներ ավելի շատ է, քան Միության այլ երկրներում։ Միաժամանակ Հայաստանում ու Ղրղզըստանում հզորությունների ավելցուկ կա։ Այդ խնդիրը հատկապես ակնհայտ է Հայաստանում, որը արտահանման հնարավորությունների սահմանափակության պատճառով ավելցուկի պայմաններում ի վիճակի չէ ապահովել իր էներգահամակարգի արդյունավետությունը։

«Միաժամանակ ընդհանուր շուկայի ձևավորման խնդիրը հանգում է գազի ընդհանուր շուկայի խնդրին։ Առանց դրա էլեկտրաէներգիայի ընդհանուր շուկան պարզապես չի կարող կայանալ, քանի որ էլեկտրաէներգիայի գեներացիան ԵԱՏՄ-ում իրականացվում է մեծ մասամբ բնական գազով աշխատող ջերմաէլեկտրակայանների վրա», - ավելացրեց նա։

Միության անդամ երկրներից միայն Ռուսաստանն ու Ղազախստանն են գազ արդյունահանում, հետևաբար դրանից ստացված էլեկտրաէներգիայի ինքնարժեքը զգալիորեն ավելի ցածր է, քան Բելառուսում, որտեղ գեներացիայի ավելի քան 90%-ն իրականացվում է Ռուսաստանից ներկրված գազի հաշվին։

Նույնը վերաբերում է Հայաստանին, որտեղ ՋԷԿ-երն արտադրում են էլեկտրաէներգիայի ավելի քան  40%-ը։ Դրանից ելնելով՝  և՛ բելառուսական, և՛ հայկական գեներացիան անմրցունակ կլինեն։

Հենց այդ պատճառով Մինսկը կոչ է անում սկզբում գազի միասնական շուկա մեկնարկել, հետո նոր անցնել էլեկտրաէներգիայի ընդհանուր շուկային։ Դրա հետ համամիտ են նաև էլեկտրաէներգիայի արտադրությունով զբաղվող ուսական ընկերությունները։ Դրանցից շատերը հայտարարում են, որ չեն ցանկանում աշխատել նոր մոդելի շրջանակում։ Միաժամանակ ԵԱՏՄ-ում ազգային շուկաները վերազգային կանոններին ներդաշնակեցնելու վերաբերյալ կոնսենսուս չկա։

«Ռուսաստանում բարեփոխումներն արդեն իրականացվել են, թեև բիզնեսի ներկայացուցիչներն ու պրոֆեսիոնալ էներգետիկները անդադար խոսում են դրա հետևանքով ռուսական էլեկտրաէներգետիակայում ստեղծված ճգնաժամի մասին․ հաճախակի են դարձել վթարներն ու խափանումները, սակագնային քաղաքականության մեջ խնդիրներ կան և այլն։ Ղազախստանում ընտրողական, մեծ մասամբ ձևական լիբերալիզացիայի գործընթաց է սկսվել։ Հայաստանում նույնպես լիբերալիզացիայի գործընթաց է սկսվել, սակայն այն առնչվում է մեծ մասամբ էներգահամակարգում առկա հսկայական վարկային բեռի հետ կապված խնդիրներին», - ասում է մեր զրուցակիցը։

Չլուծելով այդ խնդիրն ու նման ժառանգությամբ անցնելով լիբերալ մոդելին՝ Հայաստանը կարող է հայտնվել պերմանենտ էներգետիկ ճգնաժամի վիճակում։ Ղրղըզստանում էլ է լիբերալիզացիան ձևական բնույթ կրում․ ակտիվները բաժանել են, սակայն դրանք շարունակում են պետության ձեռքերում մնալ։ Ինչ վերաբերում է Բելառուսին՝ այստեղ իշխանությունը չի շտապում բարեփոխումներ անել։ Կարելի է ենթադրել, որ նման դանդաղաշարժությունը կապված է Բելառուսական ատոմակայանի մեկնարկի հետ, որը պետք է զգալիորեն փոխի բելառուսական էլեկտրաէներգետիկայի կառուցվածք։

Փորձագետը կոչ է անում չանտեսել ԵԱՏՄ էներգետիկ ինտեգրման այլ սեկտրոներում առկա խնդիրները՝ Ռուսաստանի «հարկային մանևրը», ռուսական գազի տարհանման՝ Մինսկի սակագնի բարձրացումը, երկաթուղային ճանապարհով ռուսական գազը Ղազախստան տեղափոխելու արգելքը։

Այս ամենն այս կամ այն ձևով ազդելու են էլեկտրաէներգետիկ ոլորտում երկրների երկխոսության վրա։

376
թեգերը:
Հայաստան, Եվրասիական Տնտեսական Միություն (ԵԱՏՄ), Նիկոլ Փաշինյան
Ըստ թեմայի
Հայաստանը ջանք չի խնայի ԵԱՏՄ–ն զարգացնելու համար. Փաշինյան
Տեսակամուրջ՝ նվիրված ԵԱՏՄ 5-ամյակին
Ծխախոտային ճգնաժամ. ո՞ւմ է շահավետ գնային խառնաշփոթը ակցիզային հարկի բարձրացման պատճառով
Հայաստանին տնտեսական բեկում է պետք. Փաշինյանը հարցազրույց է տվել Euronews–ին
 Beeline

Ովքե՞ր են կանգնած Beeline-ը գնել ցանկացող Novatel–ի ընկերության հետևում. մանրամասներ

23
(Թարմացված է 16:09 12.08.2020)
Ինչ ֆինանսական միջոցներով է ընդամենը երկու ամսում ստեղծված ընկերությունը «ՎԵՈՆ Արմենիայի» 100% բաժնեմասն ուզում գնել։ Novatel ՍՊԸ–ի գործադիր տնօրեն Մինաս Երզնկյանը մանրամասներ է հայտնել։

ԵՐԵՎԱՆ, 12 օգոստոսի - Sputnik. Երկու ամիս առաջ բացված Novatel ընկերությունը բանակցություններ է վարում «ՎԵՈՆ Արմենիայի» գլխավոր գրասենյակի հետ ընկերությունը գնելու համար։ Sputnik Արմենիայի հետ զրույցում տեղեկությունը հայտնեց Novatel ՍՊԸ–ի գործադիր տնօրեն Մինաս Երզնկյանը։

«Արդեն իսկ լուրջ քայլեր ենք արել, բանակցությունները վերջին փուլում են։ Դրանք ընթանում են «Վեոնի»` Ամստերդամում գտնվող գլխամասային գրասենյակի հետ։ Ընկերության հետ գաղտնիության պայմանագիր է կնքվել, ուստի մեր կողմից ներկայացված գնառաջարկի մասին չենք կարող հայտնել»,–ասաց Երզնկյանը։

Նա հայտնեց, որ Novatel ընկերությունը ստեղծվել է երկու ամիս առաջ։ Ընկերության ղեկավարները ընկերներ են, որոնք ծնվել և մեծացել են Երևանում, գործարարությամբ են զբաղվում։  Երզնկյանի խոսքով` իրենք աշխատել են միջազգային համբավ ունեցող հեռահաղորդակցման ընկերություններում, այսինքն` մեծ փորձ ունեն։

Ի դեպ, Novatel-ը, ի տարբերություն Ucom ընկերության նախկին տնօրեն Հայկ Եսայանի նորաստեղծ Team ընկերության, «ՎԵՈՆ»-ի գնման համար չի դիմել Տնտեսական մրցակցության պաշտպանության պետական հանձնաժողով։ Պատճառը, ըստ Երզնկյանի, այն է, որ Եսայանների ընկերությունն ուզում է գնել «ՎԵՈՆ»–ը` իրենց ընկերության հետ միավորելու համար, իսկ Երզնկյանն ուզում է գնել այն` պահպանելով «ՎԵՈՆ»–ի ողջ անձնակազմը։

«Հենց այս պատճառով էլ կարծում ենք, որ ՏՄՊՊՀ–ի հետ որևէ խնդիր չենք ունենալու։  Այն, որ Եսայաններն արդեն իսկ հանձնաժողովի թույլտվությունը ստացել են «ՎԵՈՆ»–ի գնման համար,  դա որևէ առավելություն չի տալիս նրանց։ Եթե կարիք լինի, մենք նույնպես կդիմենք ՏՄՊՊՀ, սակայն գլխամասային գրասենյակի հետ բանակցություններից հետո»,–ասաց Երզնկյանը։

Beeline-ի վաճառքը հայաստանյան աշխատաշուկայի համար նպաստավոր չէ. Սանդուխչյան

Այս պահին, ըստ նրա, «ՎԵՈՆ»–ը պետք է ընտրություն կատարի երկու ընկերությունների միջև։ Երզնկյանը հերքեց շրջանառվող լուրերը, որ իրենք Ucom–ի սեփականատերերի հետ առնչություն ունեն։ Նա նշեց, որ Ucom–ի ղեկավարների` Խաչատրյանների հետ կապ չունեն, անգամ անձնապես ծանոթ չէ նրանց հետ։ 

Երզկյանը հայտնեց, որ «ՎԵՈՆ Արմենիան» ուզում են գնել ամբողջությամբ, և եթե հնարավորություն լինի մասնակի բաժնետեր լինելու, ապա չեն համաձայնի։ Ինչ վերաբերվում է ֆինանսական միջոցներին, ապա նա վստահեցնում է, որ համաշխարհային համբավ ունեցող ֆինանսական կազմակերպություններն են մասնակից լինելու այդ գործում, որոնց նախնական համաձայնությունն արդեն իսկ ունեն։ Երզնկյանը ասաց, որ այլ մանրամասներ հայտնել չի կարող, քանի որ գոյություն ունի «գաղտնիության պայմանագիր»։

Նրա խոսքով` ընկերությունը ստեղծվել է հատուկ «ՎԵՈՆ Արմենիայի»  գնման գործարքին մասնակցելու համար։

Հիշեցնենք` մի քանի ամիս առաջ Հայկ Եսայանը հայտարարեց Ucom–ը լքելու մասին։ Կարճ ժամանակ անց հայտնի դարձավ, որ Եսայան եղբայրները հիմնադրել են «Թիմ» ընկերությունն ու հայտ ներկայացրել Տնտեսական մրցակցության պաշտպանության պետական հանձնաժողով՝ «ՎԵՈՆ Արմենիան» (ապրանքանիշը` Beeline) գնելու հարցով:

Ucom-ը չի գնի Beeline–ը. քննարկումները դադարեցվել են

Հուլիսի 10-ին ՏՄՊՊՀ–ն թույլ տվեց, որ Եսայան եղբայրների ընկերությունը գնի Beeline-ը: Ինչ վերաբերում է Ucom–ին, ապա ընկերության տնօրենն այժմ Արա Խաչատրյանն է։ Նա եղել է «Գալաքսի ընկերությունների խմբի» գլխավոր ֆինանսական տնօրենը։ Մայիսին Խաչատրյանը ԱԱԾ էր հրավիրվել` ՊԵԿ նախկին նախագահ Գագիկ Խաչատրյանի ու նրա որդիների վերաբերյալ քննվող քրեական գործի շրջանակներում: Գագիկ Խաչատրյանն այս պահին կալանավորված է, իսկ տղաները հետախուզման մեջ են։

23
թեգերը:
Հայկ Եսայան, Տնտեսական մրցակցության պաշտպանության պետական հանձնաժողով (ՏՄՊՊՀ), Beeline Armenia, Անդրեյ Պյատախին («ՎԵՈՆ Արմենիա» ընկերության գլխավոր տնօրեն)
Ըստ թեմայի
ՀԾԿՀ-ն ևս դեմ չէ Beeline-ի վաճառքին, բայց ժամանակ է տվել գործարքն իրականացնելու համար
Եսայան եղբայրների «Թիմը» 500 գիգաբիթ/վայրկյանում թողունակությամբ ցանց է կառուցում
ՏՄՊՊՀ-ն կարճել է «ՎԵՈՆ Արմենիա» և «Յուքոմ» ՓԲԸ-ների համակենտրոնացման մասին վարույթը
Արմավիր

Եթե ձեզ պետք չէ, կվերցնենք. կամ ինչպես են փորձում լուծել անմշակ հողերի չլուծվող հարցը

225
(Թարմացված է 23:29 11.08.2020)
Հայաստանում մոտ 170 հազար հեկտար հող չի մշակվում։ Կան հողամասեր, որոնք տասնամյակներով անհերկ են մնում։ Հարցի լուծման համար քննարկվել է երեք տարբերակ։

ԵՐԵՎԱՆ, 11 օգոստոսի – Sputnik. Տարիներ շարունակ չլուծվող անմշակ հողերի հարցը նորից քննարկել են ՀՀ Ազգային ժողովում։ Տեղեկությունը Sputnik Արմենիայի հետ զրույցում հայտնեց Գինու ազգային կենտրոնի նախագահ Ավագ Հարությունյանը։

Նա և ոլորտի ևս մի քանի ներկայացուցիչ հանդիպել են խորհրդարանի ղեկավարության հետ ու մի շարք խնդիրներ են քննարկել։

Չօգտագործվող հողերը խանգարում են գյուղատնտեսական բիզնեսին։ Շատ դեպքերում տասնյակ, հարյուրավոր իսկ երբեմն հազարավոր հեկտար հողամասեր չեն օգտագործվում, ընդ որում՝ ոչ թե մեկ-երկու տարի, այլ 90-ականներին սկզբից։

Այդ խնդրի լուծման համար էկոնոմիկայի նախարարությունը (հիմա այդ նախարարությունն է զբաղվում գյուղատնտեսության հարցերով) հողային օրենսդրության բարեփոխում է պատրաստում, սակայն դեռ չեն ուզում բացել փակագծերը  ու խոստանում են ապագայում մանրամասն ներկայացնել նախագիծը։

Քաղաքացիական օրենսգրքի համաձայն՝ եթե դու չես օգտագործում հողը, այն ազգայնացվում է։ Հարությունյանը նշեց, որ քննարկումների ժամանակ երկու մոտեցում է արտահայտվել։

Մի դեպքում, եթե սեփականատերը երկար ժամանակ չի օգտագործում հողը, այն հարկադիր կերպով վարձակալության են վերցնում։ Այսինքն՝ հողը նրանից չեն խլում, այլ նույնիսկ վարձ  են վճարում, բայց եթե նա չի ուզում աշխատել այդ հողամասում, պետք է համաձայնի, որ մեկ ուրիշն աշխատի այնտեղ։ Պետությունը (կամ մասնավորն ընկերությունը պետության անունից) ցանկացողների համար վարձակալության պայմանագիր է կնքելու նրանց հետ։

Համայնքապետներն ուզում են Մանվել Գրիգորյանից հետ ստանալ իրենց հողերը. 40 գործարք է եղել

Երկրորդ մոտեցման համաձայն՝ պետք է աստիճանաբար բարձրացնել չօգտագործված հողերի հարկը։ Մեկ տարի հողը չես օգտագործում, հարկը բարձրանում է, օրինակ` 10%-ով, ևս մեկ տարի՝ ևս 10% ու այդպես շարունակ։

Երկու դեպքում էլ հողն ուզում են վերցնել չմշակողից, բայց հնարավորություն ստեղծելով, որ գոնե որևէ մեկը հերկի այն։ Եթե հողը չի մշակվում, պետությունը հանրային բարիքներ է կորցնում, և դա պետք է փոխհատուցվի։

Կան նաև կտրուկ մոտեցման կողմնակիցներ.  դատարանի որոշմամբ խոշոր սեփականատերերից բռնագրավում են հողը, այսինքն՝ վերցնում են պետության կարիքների համար։

Եթե վեց հարյուր քմ տարածքով փոքր հողամաս է, ապա կարելի է ենթադրել, որ այն մշակելու համար գումար չունեն։ Սակայն այդ արդարացումն այդքան էլ համոզիչ չի հնչում, երբ մարդն ունի 10 կամ 50 հեկտար հող։ Հարությունյանի խոսքով` կան դեպքեր, երբ հազարավոր հեկտար հողերի տեր մարդիկ ավելի քան 20 տարի դրանց վրա ոչինչ չեն արել։

Նշենք՝ Հայաստանում 513 հազար հեկտար գյուղատնտեսական հող կա։ Դրանցից միայն 389 հազար են մշակմանը ենթակա տարածքներ։ Սակայն այդ 389 հազարից մոտ 220 հազարն է մշակվում, իսկ ոռոգվում է լավագույն դեպքում կեսը։ Գրեթե բոլոր դատարկ հողերը վարելի և արոտային են։ Այգիներ մշակելը շատ ավելի ձեռնտու է, այդ պատճառով դրանք գրեթե անմշակ չեն մնում։ Հարությունյանի գնահատականով՝ հանրապետությունում մոտ 3 հազար հեկտար դատարկ այգի կա։ Սակայն այդ կորուստն էլ պետության համար քիչ չէ։

Ամենաֆանտաստիկ երազում չէի տեսնի, որ նախագահը հյուր կգա, կամ հարավամերիկյան այգի Տավուշում

«Տարեկան մեկ հեկտար խաղողի այգուց կարելի է հինգ տոննա բերք ստանալ։ Հաշվեք՝ որքան նույնիսկ ոչ թե գումարից, այլ բերքից է զրկվում պետությունը», - ավելացրեց Հարությունյանը։

Որոշվել է այդ երեք մոտեցումների մասով շարունակել քննարկումը տնտեսական հարցերով պրոֆիլային հանձնաժողովի պատգամավորների հետ։

225
թեգերը:
գյուղացի, Գյուղ, ԱԺ, Այգի, Հող, Հայաստան
Ըստ թեմայի
«Կեղտ չէ, հող է». նախկին պատգամավորը կյանքը «քաղցրացնելու» հետաքրքիր ձև է գտել
Քաղաքապետարանի աշխատակիցը Ռուբեն Հայրապետյանի ծանոթներին «ջրի գնով» հող է վաճառել
Պետությանը և համայնքներին պատճառված վնասից վերականգնվել է 25 մլրդ դրամը
Ապօրինի պատշգամբ

Երևանում կինը սպառնացել է պատշգամբից նետել երեխային. տեսանյութ

0
(Թարմացված է 16:29 12.08.2020)
Բնակիչը պատմաճարտարապետական հուշարձան հանդիսացող շենքի 2-րդ հարկում պատշգամբ էր «հարմարեցրել» ու թույլ չէր տալիս, որ այն ապամոնտաժեին։ Դեպքի վայրում նրա հետ աշխատել է ԱԻՆ հոգեբանը։

ԵՐԵՎԱՆ, 12 օգոստոսի- Sputnik. Երևանի Կիևյան փողոցի թիվ 1 շենքի 2-րդ հարկի բնակարաններից մեկի բնակիչը խոչընդոտել է ապօրինի պատշգամբի ապամոնտաժման աշխատանքները և սպառնացել է երեխային նետել պատշգամբից։ ԱԻՆ մամուլի ծառայության հաղորդմամբ՝ Ճգնաժամային կառավարման ազգային կենտրոնն այս ահազանգը ստացել է ժամը 15։35-ին։

«Դեպքի վայր են մեկնել ԱԻՆ ՓԾ Հոգեբանական աջակցության բաժնի հերթապահ հոգեբանը և Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ․ վերջինս անհրաժեշտությունը վերանալու պատճառով վերադարձել է»,- նշված է ԱԻՆ հաղորդագրության մեջ։

Դեպքի վայրում բնակչի հետ աշխատել է ԱԻՆ հոգեբանը, զրուցել նրա հետ։ Ձեռնարկված միջոցառումների արդյունքում պատշգամբն ապամոնտաժվել է։

Նշենք, որ այսօր Երևանի քաղաքապետի մամուլի խոսնակ Հակոբ Կարապետյանը Facebook-ի իր էջում տեղեկացրել էր, որ Կիևյան փողոցում պատասխանատուներն ապամոնտաժում են ապօրինի ավելացված պատշգամբը։

«Արաբկիրում, Կիևյան 1 հասցեի պատմաճարտարապետական հուշարձան շենքի բնակիչը մեկ գիշերվա մեջ պատշգամբ է «հարմարեցրել»»,- գրել էր Կարապետյանը։

Հրապարակմանը կից Կարապետյանը տեղադրել էր լուսանկարներ և տեսանյութ։ Կադրերում երևում է, թե ինչպես են վերամբարձ կռունկով պատշգամբին մոտենում ոստիկանները, իսկ պատշգամբում կանգնած կինը՝ «դույլով զինված», բղավում է ոստիկանների վրա, արգելում մոտենալ պատշգամբին՝ սպառնալով դույլով ջուր լցնել նրանց վրա։ Կադրերում երևում է, որ կնոջ կողքին նաև փոքրիկ տղա է կանգնած։

0
թեգերը:
Կին, ՀՀ արտակարգ իրավիճակների նախարարություն (ԱԻՆ), Երևան, Հայաստան