ԵՐԵՎԱՆ, 26 դեկտեմբերի — Sputnik. ՀՀ արտաքին պարտքը 2019 թվականի վերջին ավելանալու է ոչ թե 490, այլ 314 մլն դոլարով։ Sputnik Արմենիայի հարցմանն ի պատասխան հայտեց ֆինանսների նախարարության պետական պարտքի կառավարման վարչության պետ Արշալույս Մարգարյանը` մեկնաբանելով արտաքին պարտքի ցուցանիշի վերաբերյալ մամուլում առկա տարբեր եզրակացությունները։
Նրա խոսքով`2019 թվականին Հայաստանը ստանալու է 152,1 մլն դոլարի բյուջետային աջակցության վարկեր, 337,6 մլն` նպատակային վարկեր, նախատեսված է նաև մայր գումարի մարում՝ 175 մլն ԱՄՆ դոլարի չափով։
«Եթե մենք 152,1-ին գումարում ենք 337, ստացվում է 490 մլն դոլար։ Բայց որպեսզի ստանանք ճշգրիտ տվյալը, սրանից պետք է հանենք պարտքի մարումը՝ 175 մլն դոլարը։ Այս դեպքում ստացվում է, որ 2019 թվականին պարտքն ավելանալու է ոչ թե 490 մլն դոլարով, այլ ընդամենը 314 մլն ԱՄՆ դոլարով, որը մոտավորապես 150 մլրդ դրամի կարգի է»,– ասաց Մարգարյանը։
Ի դեպ, ինչպես նախապես հայտարարել էր ֆինանսների նախարարությունը, Հայաստանի ամենախոշոր վարկն այս պահի դրությամբ տրամադրել է Ռուսաստանը։ Այն 343 մլն դոլարի է համարժեք, դա հիմնականում ատոմակայանի վերազինման ծրագրի գումարն է։ Ընդ որում, վարկի մի մասը տրամադրվել է այս տարի, իսկ 2019 թվականին տրամադրվելու է մոտավորապես 200 մլն դոլարը։
Հիշեցնենք` մինչ այդ լրատվամիջոցներում հրապարակումներ էին հայտնվել այն մասին, որ 2019թ.–ին Հայաստանի արտաքին պարտքը կազմելու է շուրջ կես մլրդ` 490 մլն դոլար ։
