ԵՐԵՎԱՆ, 19 հոկտեմբերի — Sputnik. Lydian Armenia-ի հետ կապված իրավիճակը չի ազդել Հայաստանի ներդրումային գրավչության վրա։ Այդ մասին ասաց «Բիզնես Արմենիա» հիմնադրամի գործադիր տնօրեն Արմեն Ավակ Ավակյանը Sputnik Արմենիայի թղթակցի հետ զրույցում։
Ի հեճուկս տարածված լուրերի, թե Ամուլսարի հանքավայրի շահագործման շուրջ ստեղծված սկանդալը բացասաբար է անդրադառնում երկրի ներդրումային գրավչության վրա, Ավակյանը դեռ չի հանդիպել մի ներդրողի, որն այդ պատճառով կհրաժարվեր Հայաստանում նախագծեր իրականացնելու գաղափարից։
«Ինձ մոտ ոչ մի նման քեյս չի եղել, ոչ մի գործարար չի հայտարարել «Լիդիանի» հետ խնդիրների կամ ներքաղաքական կայունության պատճառով նախագիծը դադարեցնելու մասին», — նշեց նա։
Միաժամանակ, ինչպես նշեց Ավակյանը, ներդրողների մոտ ամեն դեպքում նկատվում է որոշակի դանդաղկոտություն, ինչը, նրա կարծիքով, լիովին տրամաբանական է. ցանկացած ողջամիտ գործարար նախընտրում է սպասել ընտրություններին և բիզնեսը զարգացնել ավելի կայուն իրադրությունում։
«Հայաստանի նկատմամբ հետաքրքրությունը մեծացել է, հատկապես սփյուռքահայերի շրջանում։ Բայց ժամանակ է պահանջվում, որպեսզի ներդրում անելու ցանկությունը վերածվի կոնկրետ նախագծի», — եզրափակեց նա։
«Լիդիան Արմենիան» երկրաբանահետախուզական կազմակերպություն է: Լիդիան Արմենիայի բաժնետոմսերի 100%-ը պատկանում է «Լիդիան Ինթերնեյշնլ» ԲԲԸ-ին: Հիմնադրվել է 2005 թ.-ին և լայնամասշտաբ երկրաբանահետախուզական աշխատանքների արդյունքում հայտնաբերել է ներկայում իր առաջնային ծրագիրը հանդիսացող Ամուլսարի ոսկու հանքը: Ամուլսարը նոր հայտնաբերված ոսկու հանքավայր է` առաջինը Հայաստանում վերջին 20 տարիների ընթացքում:
«Լիդիան Արմենիան» Ամուլսարի տարածքում երկրաբանահետախուզական աշխատանքներ է իրականացնում 2006թ.-ից սկսած:
Ամուլսարի ոսկու հանքը պաշարների առումով Հայաստանի երկրորդ հանքավայրն է։ Հանքավայրը շահագործելու համար արտոնագիր է ստացել Հայաստանում Lydian International դուստր ընկերություն` GeoTeam-ը, որը ավելի ուշ վերանվանվել է Lydian Armenia-ի։
Ամուլսարի լեռնագագաթը գտնվում է Վայոց Ձորի և Սյունիքի մարզերի սահմանագլխին՝ Ջերմուկ քաղաքից 10 կմ հեռավորության վրա:
Հանքավայրի շինարարության պաշտոնական մեկնարկը տրվել է 2016թ-ի օգոստոսի 19-ին: Ամուլսարը Հայաստանում այս պահին ամենախոշոր միջազգային ներդրումն է: Այն իրականացվել է Միջազգային ֆինանսական կորպորացիան (IFC) և Վերակառուցման ու զարգացման եվրոպական բանկի չափանիշներին համապատասխան, բնապահպանական և սոցիալական ազդեցությունների գնահատմամբ:
