ԵՐԵՎԱՆ, 20 հուլիսի — Sputnik. Այսուհետև հայ ռեստորատորներն այլևս ստիպված չեն լինի իրենց հաստատությունների համար ապրանքներ գնել Ճապոնիայից, Թուրքիայից, Լեհաստանից, Չեխիայից։ Հոկտեմբերից Կոտայքի մարզի Արամուս գյուղում կաշխատի չժանգոտվող մետաղից ապրանքների արտադրության գործարան։
Այդ մասին լրագրողների հետ զրույցում ասաց «ԱՐԳԱ-Յուրոսթիլ» ընկերության գործադիր տնօրեն Կարեն Սալխանյանը։
«Մենք մեծ պոտենցիալ ունենք այդ նեղ մասնագիտական ոլորտում։ Հայաստանը զբոսաշրջային երկիր է, և զբոսաշրջիկների թիվը տարեցտարի աճում է», – ասաց Սալխանյանը։
Նրա խոսքով` հայկական արտադրանքի որակը ոչնչով չի զիջում այն ապրանքներին, որոնք մեր ռեստորատորները գնում են ուրիշ երկրներից։ Մեր գործարանը առաջին օրից սկսած կարող է արժանի մրցակից դառնալ աշխարհի տարբեր երկրների ապրանքանիշների շարքում։ Հայկական ապրանքները կհայտնվեն Իրանի, Վրաստանի, ԵԱՏՄ երկրների վաճառասեղաններին։
Սալխանյանը չբացահայտեց, թե քանի տեսակ ապրանք կպատրաստվի գործարանում, սակայն հավաստիացրեց, որ կարտադրվի հյուրանոցների և ռեստորանների համար անհրաժեշտ ամբողջ կահ–կարասին։ Գործարանի շինարարությունը կավարտվի այս տարվա օգոստոսին, սակայն այն կսկսի աշխատել հոկտեմբերից։
Դրա շահագործման համար արդեն ներդրվել է մոտ մեկ միլիոն դոլար։
Բայց Սալխանյանը կանգ չի առնում, նա մտադիր է առաջիկայում մոտ երկու միլիոն դոլար ներդնել արևային մարտկոցների նախագծում, ինչպես նաև մեկ միլիոն դոլար` Երևանի գիշերային լուսավորության նախագծի համար։
Հայաստանի զարգացման հիմնադրամի տնօրեն Ավագ Ավագյանը լրագրողների հետ զրույցում նշեց, որ ներքաղաքական իրադարձություններից հետո արտասահմանյան ներդրողների կողմից Հայաստանի նկատմամբ հետաքրքրությունն ավելացել է։
Նրանց հիմնադրամի տվյալներով` 2018թ–ին տարբեր ոլորտներում և նախագծերում ներդրումների գումարը կկազմի 46 միլիարդ դոլար։
