ԵՐԵՎԱՆ, 11 սեպտեմբերի — Sputnik. Հայաստանի ՀՆԱ–ի աճի վերաբերյալ ԵԶԲ–ի կանխատեսումները կապված են աշխատանքային միգրանտներից ստացվող դրամական փոխանցումների ավելացման հետ, Sputnik Արմենիային ասաց Եվրասիական զարգացման բանկի գլխավոր տնտեսագետ Յարոսլավ Լիսովոլիկը։
2017 թվականի արդյունքներով՝ ՀՆԱ–ի աճի ԵԶԲ–ի կանխատեսումը վերանայվել է, և ըստ բանկի, ՀՆԱ-ի աճը Հայաստանում կկազմի 5,2%։
«2017 թվականի արդյունքներով՝ տնտեսական աճի ավելի արագ տեմպերին նպաստում է սպառողական աճի ակտիվ վերականգնումը տնային տնտեսությունների վարկավորման աճի և աշխատանքային միգրանտների դրամական փոխանցումների ներհոսքի ավելացման ֆոնին», – ասել է Լիսովոլիկը։
Բացի արտահանման խթանման ուղղությամբ տարվող քաղաքականության դրական ազդեցությունից և սպառողական ակտիվությունից, նրա խոսքով, 2017 թվականի երկրորդ կիսամյակում աճի տեմպերին կնպաստի անցյալ տարվա ցածր բազան։
Հայաստանի ՀՆԱ–ից ավելի դրական սպասումների համար, տնտեսագետ Վիլեն Խաչատրյանի կարծիքով, հիմք է ծառայում նաև զբոսաշրջությունը։
«Վերջին շրջանում զբոսաշրջային հոսքի զգալի ավելացում է զգացվում։ Եվս մեկ դրական գործոն է արտահանման ծավալների աճը, խոսքը, հիմնականում, հումքի քանակային աճին է վերաբերում»,– ասել է Խաչատրյանը։
Սակայն այլ ոլորտներում, օրինակ՝ գյուղատնտեսության, շինարարության, նրա կարծիքով, ցուցանիշներն իջել են։
Որոշակի աճ է նկատվում արդյունաբերության ոլորտում, սակայն ՀՆԱ–ի աճին նպաստող հիմնական գործոնները, Խաչատրյանի կարծիքով, շարունակում են մնալ զբոսաշրջությունն ու արտահանումը։
ԵԶԲ–ի «Եվրասիական տրանսմիսիա. ինտեգրումից դեպի աճ» մակրովերլուծության մեջ նշված է, որ 2017 թվականի օգոստոսի տվյալներով՝ ԵԶԲ–ի երկրներում տնտեսական ակտիվության տեմպերի աճը 2017 թվականի առաջին կիսամյակում առիթ հանդիսացավ 2017 թվականի արդյունքներով ՀՆԱ–ի կանխատեսումների վերանայման համար։
Դրամական փոխանցումների արագ վերականգնման ֆոնին 2016 թվականի ֆիսկալային և դրամավարկային քաղաքականությունը խթանեց սպառողական պահանջարկը 2017 թվականի առաջին կիսամյակում։ Այդ ֆոնին Հայաստանի ՀՆԱ–ի աճի կանխատեսումը 2,9%–ից աճեց մինչև 5,2%։
2017 թվականի հունվար–մայիս ամիսներին դրամական փոխանցումները 2016 թվականի նույն ժամանակահատվածի համեմատ աճել են 18,5%, այդ թվում՝ Ռուսաստանից` 17,7%–ով։ Ռուսաստանի տնտեսական աճի դրական դինամիկայի ակնկալվող պահպանումը 2017 թվականի երկրորդ կեսում կնպաստի դեպի Հայաստան ֆիզիկական անձանց կողմից դրամական փոխանցումների հետագա ավելացմանը։
ԵԶԲ–ի մասնագետների կարծիքով` հիմնական առևտրային գործընկեր–երկրների տնտեսության հետագա վերականգնումը դրական ազդեցություն կունենա արտահանման ծավալների և երկիր ստացվող դրամական փոխանցումների վրա։
Կառուցվածքային քաղաքականության միջոցներն ուղղված են բիզնես–միջավայրի բարելավմանը, արտահանման խթանմանը և ֆիսկալային քաղաքականության արդյունավետության բարձրացմանը, իսկ միջին ժամկետային հեռանկարում կնպաստեն պոտենցիալ աճի տեմպերի բարձրացմանը։
Արդյունքում 2019 թվականին, փորձագետների գնահատականների համաձայն, Հայաստանի ՀՆԱ–ի ամենամյա աճը կպահպանվի 4%–ի մակարդակում։
