ԵՐԵՎԱՆ, 25 մայիսի — Sputnik. Տարիներ առաջ եվրոպական տարածքի ամենակոռումպացված ու ստվերային տնտեսությունն ունեցող Բուլղարիան այսօր Հայաստանին է ներկայացնում ստվերի դեմ պայքարելու իր հաջողված փորձը:
«Տնտեսություն և գործարարություն ակումբի» և 15 երկրի գործատուների միությունների համատեղ նիստում այսօր Բուլղարիայի գործատուների միության նախագահ Վասիլ Վելևը հայտնեց, որ 7 տարի առաջ Բուլղարիայում կատարված ուսումնասիրության համաձայն`տնտեսության ստվերը 35% Էր: 7 տարվա պայքարից հետո այն հաջողվել է կրճատել 6%-ով և շուրջ 3 մլրդ եվրո լրացուցիչ եկամուտ բերել բյուջե:
Հայաստանում, միջազգային կառույցների գնահատմամբ, ստվերը կազմում է ՀՆԱ-ի 35-50%-ը: Կառավարությունն էլ հայտարարում է, որ վճռական է այն կրճատելու հարցում:
Հայաստանի գործատուների միության նախագահ Գագիկ Մակարյանը հավատում է կառավարությանը: Ավելին, համոզված է, որ այս տարվա առաջին եռամսյակում գրանցված տնտեսական աճը ոչ այնքան տնեսության զարգացման, որքան հենց ստվերի որոշ հատվածի կրճատման արդյունք է:
«Շատերն արդեն, որ չեն կարողանում հին մեթոդով՝ կաշառքով, ապրանքը ներկրելով ու չձևակերպելով կամ հարկային ստուգումներից խուսափելով աշխատել, ինչպես նախկինում էր, հիմա կառավարության, ՊԵԿ-ի աշխատանքի շնորհիվ ստվերից դուրս գալով ու շրջանառություն ցույց տալով` նաև տնտեսական աճ են արձանագրում»,- ասաց Մակարյանը:
Նրա համոզմամբ` ստվերը երբեք միակողմանի չի լինում: Դրա մի կողմում բիզնեսն է, որը կամ չի կարող գոյատևել, կամ պարզապես անկուշտ է և ուզում է ավելի շատ եկամուտներ ստանալ այդ պատճառով էլ շրջանառությունը տանում է դեպի ստվեր: Իսկ մյուս կողմում պետական մարմիններն են, որոնք պետության լծակները ծառայեցնում են հօգուտ սեփական բիզնես շահերի և եկամուտների:
Այս պարագայում ստվերից կարելի է ազատվել միայն, եթե նույն այդ իշխանությունը քաղաքական կամք դրսևորի. համոզված է տնտեսագետ Վահագն Խաչատրյանը:
Այս տարեսկզբին գրանցված ստվերի կրճատումը, Խաչատրյանի համոզմամբ, ոչ այնքան իշխանության քաղաքական կամքի հետևանք է, որքան այն բանի, որ իշխանությունը որոշել է պատժել իր կողմից հովանավորվող որոշ գործարարների:
Բացի այդ, կառավարության անդամներն իրենց ոլորտներում որոշակի աճ ապահովելով` փորձում են հաճոյանալ կառավարության ղեկավարին, ինչը նույնպես Հայաստանյան տնտեսությանը խորթ պրակտիկա չէ:
