Ռոբերտ Հովհաննիսյան

Հայկական ավիափոխադրողը մտադիր է վերականգնել Երևան–Մոսկվա չվերթը

38
(Թարմացված է 11:27 02.11.2016)
«Armenia» ընկերությունը վերսկսում է իր աշխատանքը ռուսական ուղղությամբ. դեկտեմբերին չվերթեր կիրականացվեն դեպի Մոսկվա և Վորոնեժ։

ԵՐԵՎԱՆ, 1 նոյեմբերի — Sputnik. «Armenia» ավիաընկերությունը նախատեսում է դեկտեմբերին վերականգնել Երևան-Մոսկվա կանոնավոր չվերթը, լրագրողներին հայտնեց «Armenia» ավիաընկերության գլխավոր տնօրեն Ռոբերտ Հովհաննիսյանը։

«Երևան-Մոսկվա չվերթը կսկսի գործել դեկտեմբերի 11-ից։ Այդ դադարը մենք օգտագործել ենք Ռուսաստանի տարբեր օպերատորների հետ կապեր հաստատելու համար»,- ասաց նա։

Օգոստոսի 1-ին ընկերությունն առաջին թռիչքն է իրականացրել Երևան-Մոսկվա ուղղությամբ, բայց դրանից հետո ժամանակավորապես դադարեցրել է թռիչքները։ Հովհաննիսյանը նշեց, որ ընկերությունը դեկտեմբերին կակտիվացնի իր աշխատանքը, իսկ գարնանը մտադիր է թափ հավաքել։

Դեկտեմբերի 16-ից Երևան-Մինվոդի և Երևան-Թեհրան գործող ուղղությունների հետ մեկտեղ շաբաթական երկու թռիչք կիրականացնի դեպի Վորոնեժ։ Չվերթը կիրականացվի Բոյինգ 737-500 ինքնաթիռով` նախատեսված 116 ուղևորի համար։

«Վորոնեժում մեծ թվով հայեր են բնակվում, մեր շատ հայրենակիցներ մեկնել են այնտեղ արտագնա աշխատանքի։ Ուստի մենք որոշել ենք ուղիղ չվերթ բացել, որը կհեշտացնի Վորոնեժի հայերի կապը հայրենիքի հետ»,- ասաց Հովհաննիսյանը։

Ավիաընկերությունը դիտարկում է Ղազախստանի ավիաշուկայում աշխատելու հնարավորությունը, իսկ ամանորյա տոների նախաշեմին չարտերային չվերթեր կբացվեն դեպի Գոա, Հռոմ, Եգիպտոս և Հորդանան։

Ավիաընկերության բիզնես ծրագիրը, նախատեսված հինգ տարվա համար, ենթադրում է վեց ինքնաթիռների առկայություն և ամսական 75 չվերթերի իրականացում։ Առայժմ ավիապարկում կա երկու Բոինգ 737-500 և 737-700։ «Armenia» ավիաընկերության հիմնադիրներն են Աշոտ Թորոսյանը (բաժնետոմսերի 51 տոկոսը), Թամաս Գաիաշվիլին (24 տոկոս) և Ռոբերտ Հովհաննիսյանը (25 տոկոս)։

38