Իգնատի Առաքելյան

Նախարարն ուզում է լուծել կարտոֆիլագործների խնդիրը

10
(Թարմացված է 15:45 20.10.2016)
Կառավարության նիստից հետո լրագրողների հետ զրույցում գյուղատնտեսության նախարար Իգնատի Առաքելյանը նշել է, որ հանդիպել է կարտոֆիլագործների հետ և քննարկել խնդրահարույց թեմաները։

ԵՐԵՎԱՆ, 20 հոկտեմբերի — Sputnik. Օրեր առաջ Ազգային ժողովում պատգամավոր Նիկոլ Փաշինյանն ահազանգել էր, որ պաշտպանության նախարարության մատակարարները գերշահույթ են ստանում` կարտոֆիլը վաճառելով 1 կգ-ի համար 80-104 դրամով, այնինչ գյուղացիներից այն ձեռք էին բերում զգալիորեն ցածր գնով` 40-45 դրամով։

Գյուղատնտեսության նախարար Իգնատի Առաքելյանն ասաց, որ եղել է Վարդենիսում, հանդիպել գյուղացիների հետ ու քննարկել հարցը։

«Խնդիրն այնքան էլ այնպես չէ, ինչպես ներկայացվում է։ Կան միջնորդներ, որոնք գնում են ցածր գնով, և առաջարկ է արվել, որ ֆերմերները միանան, ստեղծեն իրենց միավորումը և մատակարարեն պաշտպանության նախարարությանն ավելի բարձր գնով։ Որոշ ֆերմերներ ասացին` այդպես որ լինի, մեզ ձեռք չի տա, որովհետև մենք չենք տեղավորվի այդ գների մեջ։ Բոլոր դեպքերում մարզպետը, գյուղապետը ֆերմերներին կօգնեն, որ լուծեն իրենց խնդիրները»,-ասաց նախարարը։

Հիշեցնենք` օրեր առաջ գյուղացիները փակել էին Վարդենիս-Երևան ավտոմայրուղին` խնդիր բարձրացնելով, որ պաշտպանության նախարարության մատակարարները գերշահույթ ունեն։

 

10