ՀՀ վարչապետ Հովիկ Աբրահամյան

ՀՀ վարչապետ. Նախարարություններում շարունակվելու է հաստիքների կրճատումը

51
(Թարմացված է 14:14 15.06.2016)
Նախարարություններում օպտիմալացումը շարունակվելու է, սակայն անարդար մոտեցում չի լինելու, Գյումրիում ասաց ՀՀ վարչապետ Հովիկ Աբրահամյանը

ԵՐԵՎԱՆ, 15 հունիսի — Sputnik. Նախարարություններում շարունակվելու է հաստիքների կրճատումը: Այս մասին հունիսի 14-ին Գյումրիում աշխատանքային այցի շրջանակներում ճեպազրույցի ժամանակ նշեց ՀՀ վարչապետ Հովիկ Աբրահամյանը:

«Մեր օպտիմալացումը շարունակական է լինելու՝ հաստիքները կրճատել ենք, և այդ պրոցեսը շարունակական է լինելու, մենք նաև իջնելու ենք ներքև և կրճատելու ենք այն մարդկանց, ովքեր մեծ արդյունավետություն չեն ցուցաբերում տվյալ նախարարությունում կամ գերատեսչությունում: Այնուամենայնիվ, անարդար մոտեցում չի լինելու»,- ասաց Աբրահամյանը:

Անդրադառնալով լրագրողների՝ ՀՀ նախագահի և կառավարության աշխատակազմի ծառայողական մեքենաների կրճատման հետ կապված հարցին` Հովիկ Աբրահամյանը փաստեց, որ դրանք կրճատվել են: Նրա խոսքով` կառավարության նախորդ նիստին կառավարության աշխատակազմի 16 մեքենա կրճատվեց, իսկ դրանից առաջ 9-ը:

«Բոլոր կառույցներում կրճատումներ են գնում՝ նույն կառավարությունում, նախարարություններում: Ես համոզված եմ, որ այն գործընթացը, որը մենք սկսել ենք, հիմնավորված է և արդար: Ես համամիտ չեմ այն խոսակցություններին, որ ասում են, թե կրճատվում են այն մեքենաները, որոնք պիտանի չեն: Այդ կրճատվող մեքենաների մեջ այդպիսիները շատ քիչ են, նույնիսկ 5 տոկոս չեն կազմում, մնացած բոլորը գործող մեքենաներ են եղել, և հիմա դրանք մենք օտարելու ենք ՀՀ պետական գույքի կառավարման վարչության միջոցով՝ մրցույթ հայտարարելով»,-նշեց Աբրահամյանը:

ՀՀ վարչապետ Հովիկ Աբրահամյանի գլխավորած պատվիրակությունը հունիսի 14-ին աշխատանքային այցով Շիրակի մարզում էր: Վարչապետը եղավ Գյումրիում և Ախուրյանում:

51