ԵՐԵՎԱՆ, 22 հուլիսի–Sputnik. Հայաստանի վարչապետ Հովիկ Աբրահամյանը չորեքշաբթի Հայաստանում Իտալիայի արտակարգ և լիազոր դեսպան Ջովաննի Ռիչուլլիի հետ հանդիպման ընթացքում նշել է, որ նախորդ տարվա համեմատ` 2015 թվականի առաջին կիսամյակում Հայաստանի և Իտալիայի միջև արձանագրվել է առևտրաշրջանառության ծավալների կրկնակի աճ, հաղորդում է ՀՀ կառավարության մամուլի ծառայությունը։
Ըստ հաղորդագրության` Հովիկ Աբրահամյանը գոհունակություն է հայտնել երկու երկրների միջև քաղաքական, տնտեսական և հումանիտար բնագավառներում առկա համագործակցությունից և կարևորել դրանց հետագա խորացումն ու ամրապնդումը։
«Վարչապետը կարևորել է գործարար շրջանակների շփումների ակտիվացումը և շեշտել, որ ՀՀ կառավարությունը պատրաստ է քննարկել փոխշահավետ յուրաքանաչյուր առաջարկություն», – նշվում է հաղորդագրության մեջ։
Հովիկ Աբրահամյանը նշել է, որ որպես ՀՀ վարչապետ՝ անելու է ամեն ինչ՝ Հայաստանի և Իտալիայի միջև տնտեսական հյարաբերությունների զարգացման և ամրապնդման համար:
Ջովաննի Ռիչուլլին իր հերթին ընդգծել է, որ Իտալիան մեծապես կարևորում է բարեկամ Հայաստանի հետ տարբեր ոլորտներում փոխգործակցության զարգացումն ու ընդլայնումը:
Ըստ հաղորդագրության` Իտալիայի դեսպանն ընդգծել է, որ իտալացի գործարարների շրջանում առկա է մեծ հետաքրքրություն հայաստանյան շուկայի նկատմամբ:
«Պարոն Ռիչուլլին նշել է, որ քայլեր կիրականացնի իտալացի գործարարներին ներկայացնելու ներդրումների համար Հայաստանի բարենպաստ բիզնես միջավայրը», – նշվում է հաղորդագրության մեջ։
Իտալիայի դեսպանն ընդգծել է, որ Հայաստանի անդամակցումը Եվրասիական տնտեսական միությանը նոր հնարավորություններ է ստեղծում նաև իտալացի ներդրողների համար:
Հանդիպման ընթացքում զրուցակիցները քննարկել են երկուստեք հետաքրքրություն ներկայացնող մի շարք այլ հարցեր:
Վարչապետ. Հայաստանի և Իտալիայի միջև առևտրաշրջանառությունն աճել է
© Photo : press office of the Government of RA
Բաժանորդագրվել
Վարչապետն ընդգծել է, որ նախորդ տարվա համեմատ` 2015 թվականի առաջին կիսամյակում Հայաստանի և Իտալիայի միջև արձանագրվել է առևտրաշրջանառության ծավալների կրկնակի աճ։
