Արայիկ Հարությունյան. արխիվային լուսանկար

Կառավարությունը չի կարողանում հաշվառել` ինչ կա Հայաստանի թանգարանային ֆոնդերում

31
(Թարմացված է 17:24 02.10.2019)
Հայաստանի թանգարաններում արժեքները փչանում են, երբեմն էլ՝ կորչում։ Նախարարը ներկայացրել է խնդիրն ու դրա լուծման հնարավոր ուղին։

ԵՐԵՎԱՆ, 2 հոկտեմբերի - Sputnik. Հայաստանյան թանգարաններում պահվող արժեքները փչանում են։ Այսօր ԱԺ-այս մասին ասաց ԿԳՄՍ նախարար Արայիկ Հարությունյանը` պատասխանելով պատգամավորի հարցին, թե ինչ վիճակում են հիմա թանգարանների ու պատկերասրահի պահոցները։

ՀՀ կառավարությունը վերջնական տեղեկություն չունի նույնիսկ երկրում պահվող արժեքների մասին։

«Սա կապված է թվայնացման համալիր համակարգ ունենալու հետ։ Դա այն առաջիկա խնդիրներից է, որ պետք է լուծենք»,– ասաց նախարարը։

Նա նշեց, որ թանգարանների պահոցներում խոնավության, ջերմաստիճանի հետ կապված խնդիրները լուծելը տարիների աշխատանք ու լուրջ միջոցներ կպահանջի։

Հիշեցնենք՝ 2018թ.–ի հունիսին մշակույթի նախարարի պաշտոնը ստանձնելուց հետո Մակունցը հավաքել էր նախարարությունում եղած բոլոր գեղարվեստական կտավներն ու վերադարձրել Ազգային պատկերասրահ, քանի որ պատկերասրահի տնօրենից գրություն էր ստացել այն մասին, որ պայմանագրով ժամանակավորապես վերցրած նկարները պետական մարմինները պայմանագրի ժամկետի ավարտից հետո չեն վերադարձնում։

Մակունցը ոչ միայն առաջինն էր քայլ արել, այլև նախարար գործընկերներին էր կոչ արել հետևել իր օրինակին, ինչը շատերն արել էին։

6 ամիս անց, սակայն, մշակույթի նախարարի պաշտոնակատարը փոշմանել էր, որ նման գործ է ձեռնարկել։

«Երբ ուսումնասիրեցինք այն պայմանները` կիսախոնավ, որտեղ դրանք պահվում են, տեսանք, որ նկարներ կան, որոնք նույնիսկ սնկերով են պատված։ Այդ պայմաններում ֆոնդերում պահելու փոխարեն, իհարկե ցանկալի է, որ դրանք լինեն ավելի բաց միջավայրում»,– ասել էր Մակունցը Sputnik Արմենիային։

Ուստի որոշվել էր, որ նկարներն ավելի ապահով կլինեն գերատեսչություններում, քան պատկերասրահի ֆոնդերում։

Դրանից հետո կառավարությունը միջոցներ էր հատկացրել պատկերասրահում օդափոխման նոր համակարգի ներդրման համար։

31
թեգերը:
ՀՀ Ազգային ժողով, ՀՀ կառավարություն, Կրթության և գիտության նախարարություն (ԿԳՆ), Արայիկ Հարությունյան, Թանգարան, Հայաստան
Ըստ թեմայի
Իտալացի գիտնականները կբացահայտեն Հայաստանի թանգարաններն ամբողջ աշխարհի համար
Էջմիածնում սրտի ձայների թանգարան է բացվել. հայերը գտել են հավերժական կյանքի բանալին
Թանգարանային ոլորտում պետք է շատ խիստ քաղաքականություն վարել. Փաշինյան
Թուրքիայում գտնվող հայկական եկեղեցիներից մեկը թանգարանի կվերածվի