ԵՐԵՎԱՆ, 29 Օգոստոս — Sputnik. Հայաստանի պետական ազգային ակադեմիական երգչախմբին կառավարությունը լրացուցիչ ֆինանսավորում կտրամադրի։ Այս մասին որոշվեց այսօր կայացած կառավարության նիստի ժամանակ։
Ըստ այդմ` Հայաստանի պետական ազգային ակադեմիական երգչախմբին պետական բյուջեի այս տարվա պահուստային ֆոնդից կհատկացվի 57 մլն 762 000 դրամ` ստեղծագործական, վարչական և սպասարկող անձնակազմերին այս տարվա օգոստոս-դեկտեմբեր ամիսներին լրավճարներ հատկացնելու համար:
«Պետությունը չի կարող թույլ տալ, որ ակադեմիական խմբերը կախվածության մեջ լինեն մասնավոր կազմակերպություններից։ Մենք մեր կարևորագույն մշակութային օջախներին չենք դնելու այն վիճակի մեջ, որ գնան «ծուռ վզով» գումար խնդրեն բարեգործներից»,- ասաց ՀՀ վարչապետ Նիկոլ Փաշինյանը։
Կրթության, գիտության, մշակույթի և սպորտի նախարար Արայիկ Հարությունյանը նախագծի ներկայացման ժամանակ նշեց, որ խնդիրների վերհանման նպատակով ՀՀ վարչապետի հանձնարարությամբ այժմ ուսումնասիրվում են ակադեմիական ստեղծագործական խմբերի գործունեությունը:
Մինչև 2018 –ի մայիս ամիս` պետբյուջեից տրամադրված ֆինանսավորմանը զուգահեռ, «Լույս» մշակութային, գիտական, կրթական հիմնադրամի կողմից երգչախումբը ստացել է հովանավորչական գումար՝ աշխատավարձի լրավճարների համար: Նշված ֆինանսավորումը դադարեցվել է 2018–ի մայիսի 1-ից:
Հետագայում, կարևորելով երգչախմբի առանձնահատուկ դերը հայ երգչախմբային արվեստի զարգացման և միջազգային հանրահռչակման գործում և մաեստրո Հովհաննես Չեքիջյանի անգնահատելի ծառայությունները հայրենիքին՝ մշակութային այլ ծրագրերի վերաբաշխման հաշվին երգչախմբին հատկացվել է 2018–ի 6 ամսվա լրավճար:
Միաժամանակ, ինչպես նշվում է նախագծի հիմնավորման մեջ, 2019–ի հունվար-հուլիս ամիսներին «Իմ քայլը» բարեգործական հիմնադրամը ակադեմիական երգչախմբին հատկացրել է լրավճար` աշխատավարձի ֆոնդի 70%-ի չափով: Հիմնադրամի հատկացումները դադարեցվել էին այս ամսվանից:
