ԵՐԵՎԱՆ, 11 մայիսի — Sputnik. «Նեպտուն» գիտական արշավախումբը` Ռոման Դունաևի գլխավորությամբ, Սև ծովի հատակին` Ղրիմի թերակղզու արևմտյան մասում, հայտնաբերել է ավելի քան 10 նկարներ, որոնք, ամենայն հավանականությամբ, պատկանում են Հովհաննես Այվազովսկու վրձնին:
1895 թվականին Սև ծովի այդ հատվածում կործանված «Գեներալ Կոցեբու» շոգենավը, որի վրա եղել են կտավները, հայտնաբերվել էր մեկ տարի առաջ` 2018 թվականի հունիսին, ծովի մակերևույթից 45 մետր խորության վրա:
«Խոսում է Մոսկվան» ռադիոկայանը հրապարակել է հանրահայտ ծովանկարիչ Հովհաննես Այվազովսկու կտավների որոնման տեսանյութը:
Կտավների մնացորդները հայտնաբերվել են նավի մեծ սրահի պատին։ Փորձագետները չեն բացառում, որ տիղմի հաստ շերտի տակ կարող են պահպանված լինել Այվազովսկու վրձնին պատկանող եզակի նկարները։
Գտածոները ջրից առայժմ դուրս չեն բերվել` դրանք չվնասելու համար։ Հայտնի գեղանկարիչ Նիկոս Սաֆրոնովը հայտնել է, որ պատրաստ է զբաղվել նկարների վերամշակմամբ, երբ դրանք դուրս կբերվեն ծովի հատակից։
