«Պատմական միջավայրի պահպանության ծառայություն» ՊՈԱԿ-ի լաբորատորիայի բաժնի աշխատակիցներ

«Զորաց քարերի» թալանված դամբարանում գտնված բեկորները նոր կյանք են ստացել. լուսանկարներ

161
(Թարմացված է 17:55 28.02.2019)
Մասնագետները կարողացել են գտնված բեկորները հավաքել ու ստանալ ամբողջական առարկայի գրեթե 70 կամ 90 տոկոսը։

ԵՐԵՎԱՆ, 28 փետրվարի – Sputnik. «Զորաց քարեր» հնավայրի թալանված դամբարանի պեղումների ժամանակ հայտնաբերված շուրջ 3000 բեկոր մաքրել ու դասակարգել են «Պատմական միջավայրի պահպանության ծառայություն» ՊՈԱԿ-ի լաբորատորիայի բաժնի աշխատակիցները: Այս մասին հայտնում է ՊՈԱԿ–ի մամուլի ծառայությունը։

«Մի քանի ամիս տևած աշխատանքի արդյունքում խեցեղենի բեկորներից վերականգնել ենք շուրջ 150 առարկաներ` սափորներ, անոթներ, կճուճներ, քրեղան, սկուտեղ և այլն: Լաբորատորիայի վարիչ Տիգրան Զաքյանի խոսքով, դրանք թալանված դամբարանի առարկաներ էին, ամբողջական (չվնասված) գտածո չկար:

Востоновленные из обломков изделия
© Photo : press office of the Service for Protection of Historical Environment and Historical-cultural Museum-reserves
Կճուճ

Լաբորատորիայի աշխատակիցները ոգևորվել են արդյունքից. անսպասելի էր, որ այդքան շատ առարկա է հավաքվել:

Նրանք կարողացել են «մասնիկներից» ստանալ հնագիտական ամբողջական առարկայի գրեթե 70 կամ 90 տոկոսը, իսկ բացակա հատվածները կլրացվեն գիպսով` ամբողջացնելով առարկայի տեսքը:

«Անշուշտ կան առարկաներ, որոնց շուրջ 30 տոկոսն է մեզ հասել բեկորային վիճակում: Վերականգնել ենք ու առաջիկայում դրանք կհամալրեն ՊՈԱԿ-ի հնագիտության ֆոնդը, քանի որ հնագիտական բացառիկ նշանակություն ունեցող առարկաներ են», -նշել է Տիգրան Զաքյանը:

Востоновленные из обломков изделия
© Photo : press office of the Service for Protection of Historical Environment and Historical-cultural Museum-reserves
Քրեղան

Նրա փոխանցմամբ` լաբորատորիայում մաքրվել ու վերականգնվել են նաև մետաղից առարկաներ` մատանի, երկաթից նիզակ, ականջօղեր, սարդիոնից, ապակուց պատրաստված ուլունքահատիկներ, սափոր, 9,5 սմ երկարությամբ մասխիլ (մաքրելուց հետո եզրերին գծանախշեր են եղել): Տարբեր ժամանակաշրջաններ ընդգրկող առարկաների թվում վարպետությամբ աչքի են ընկնում Երվանդունիների ժամանակաշրջանով թվագրվող սափորն ու ուշ բրոնզի ժամանակաշրջանով թվագրվող սկուտեղը (40 սմ երկարությամբ ու 40 սմ լայնությամբ):

«Աշխատանքն ավելի հետաքրքիր է, քանի որ գործ ունենք տարբեր ժամանակաշրջաններն ընդգրկող նյութի հետ», - ասել է լաբորատորիայի վերականգնող Աստղիկ Սիմոնյանը:

Востоновленные из обломков изделия
© Photo : press office of the Service for Protection of Historical Environment and Historical-cultural Museum-reserves
Սափոր

Ներսես Մամիկոնյանն աշխատել է մետաղի առարկաների հետ: Նրա խոսքով յուրաքանչյուր առարկայի վերականգնում հետաքրքիր է յուրովի: Չնայած բոլորն էլ առանձնահատուկ խնամք ու հոգատարություն են պահանջում:

ՊՈԱԿ-ի գիտնական քարտուղար, պատմական գիտությունների դոկտոր, պրոֆեսոր, Զորաց քարեր հնավայրի տարածքում պեղումներ իրականացրած արշավախմբի ղեկավար Աշոտ Փիլիպոսյանի համոզմամբ վերականգնման լաբորատորիայի աշխատակիցները շատ կարևոր, շնորհակալ ու մնայուն աշխատանք են կատարել:

«Առաջին անգամ վերականգնվում են Զորաց քարեր հնավայրի ավերված դամբարանից պեղված նյութերը: Սրանք առաջին հնագիտական «ծիծեռնակներն» են, որոնք հետագայում կզարդարեն այն ապագա թանգարանի ցուցադրությունը, որը նախատեսվում է կառուցել Զորաց քարերի մոտ՝ համաշխարհային հնավայրը դարձնելով միջազգային զբոսաշրջության կարևոր կենտրոն», -ասել է Աշոտ Փիլիպոսյանը:

Востоновленные из обломков изделия
© Photo : press office of the Service for Protection of Historical Environment and Historical-cultural Museum-reserves
Մասնագետները կարողացել են «մասնիկներից» ստանալ հնագիտական ամբողջական առարկայի գրեթե 70 կամ 90 տոկոսը

Առարկաներն արդեն ՊՈԱԿ-ի նախնական ֆոնդում են. հերթական համար ու մասնագիտական նկարագրություն (բնութագիր) ստանալուց հետո կհամալրեն ՊՈԱԿ-ի հնագիտության ֆոնդը:

Նշենք, որ «Զորաց քարերի» դամբարանը թալանվել է շատ տարիներ առաջ, իսկ այս առարկաների մասնիկները հայտնաբերվել են անցած տարվա պեղումների ժամանակ։

161
թեգերը:
Քարահունջ, Զորաց քարեր, Հայաստան
Ըստ թեմայի
Զորաց Քարերի գաղտնիքը բացահայտվում է
«Զորաց քարերի» տարածքում հնագիտական պեղումների արդյունքները
Ո՞վ է տեղահան արել Զորաց քարերը. նախարարության ու ակտիվիստների տեսակետները հակադիր են
National Geographic–ը Քարահունջը ներառել է 8 հնագույն աստղադիտարանների ցանկում
Քարահունջ․ Հայաստանի «խոսող» քարերն ու նրանց կապը Քեոփսի բուրգի հետ
Նոր բացահայտում. Քարահունջը միակը չէ, Հայաստանի տարածքում նման կառույցները մի քանիսն են
Ավագյան. «Զորաց քարերի աստղադիտարան լինելն ուղղակի վարկած է»