ԵՐԵՎԱՆ, 17 հոկտեմբերի — Sputnik. «Անտոնովկա։ 40+» մրցանակն աջակցում է ոչ միայն ռուսաստանցի գրողներին, այլ նաև Ռուսաստանի սահմաններից դուրս, այդ թվում Երևանում ապրող ռուսալեզու գրողներին։ Այդ մասին գրող, լրագրող Ելենա Շուվաևա–Պետրոսյանն ասաց Sputnik Արմենիա մուլտիմեդիոն մամուլի կենտրոնում Մոսկվա–Մինսկ–Երևան–Քիշնև–Թբիլիսի տեսակամրջի ժամանակ։
Տեսակամուրջը նվիրված է «Անտոնովկա։ 40+» գրական մրցանակի շնորհանդեսին, որի նպատակն է աջակցել 40 տարեկանից բարձր ռուսալեզու հեղինակներին։ Մրցանակը ստեղծվել է ռուս արձակագիր, բանաստեղծ և դրամատուրգ, Գրականության ինստիտուտի գրական քննադատության ամբիոնի դոցենտ, բանասիրական գիտությունների թեկնածու Ալեքսեյ Անտոնովի պատվին։
«Ալեքսեյ Կոնստանտինովիչը գրական ինստիտուտի հոգին է։ Մտնելով ինստիտուտի շենքի բակ` անսովոր է նրան չհանդիպելը», – ասաց Շուվաևա–Պետրոսյանը։
Նրա խոսքով` Հայաստանում ռուսալեզու գրողները հիմնականում 40–ն անց մարդիկ են։ Տարիքի պատճառով նրանք չեն կարողանում մասնակցել մրցույթների` նախատեսված մինչև 40 տարեկան գրողների համար, հետևաբար, ինտեգրված չեն ո՛չ Հայաստանում, ո՛չ Ռուսաստանում։
Այսօր Հայաստանում կան մոտ 30 ռուսալեզու գրողներ։ «Լիտերատուրնայա Արմենիա» ամսագիրը միակ հարթակն է Երևանում ինքնարտահայտվելու համար, ուստի «Անտոնովկա։ 40+» մրցանակը ևս մի հնարավորություն է, նշեց Շուվաևա–Պետրոսյանը։
Իր հերթին գրող, լրագրող Աշոտ Գազազյանը ողջունեց նախաձեռնությունը` ընդգծելով, որ 40 տարեկանից բարձր գրողների սերունդն իսկապես անուշադրության է մատնված։
«Գրողներին երիտասարդների և տարեցների կիսելու սովորություն չկա, կա լավ կամ վատ գրող, լավ կամ վատ գրականություն», – ասաց Գազազյանը։
«Անտոնովկա։ 40+» մրցանակի կազմկոմիտեի նախագահ Ալեքսանդր Եվսյուկովը նշեց, որ մրցանակն աջակցում է 40 տարեկանից բարձր հեղինակների սերնդին, որոնց երիտասարդությունն անցել է այն ժամանակաշրջանում, երբ նրանք ստիպված էին շեղվել գրականությունից` գումար վաստակելու համար։
Գրական մրցույթում մասնակցության հայտերի ընդունումը բաց է մինչև 2019թ–ի հունվարի 10–ը։ Մրցանակի արդյունքները կամփոփվեն հունիսի 17–ին` գրող Անտոնովի ծննդյան օրը։ Տվյալ պահին ստացվել է մոտ 500 հայտ աշխարհի 20 երկրներից։
