ՀՀ նախագահը՝ Շառլ Ազնավուրի կենտրոնի բացմանը

Նախագահն «Ազնավուր» կենտրոնի բացմանը շանսոնյեի հետ կապված մի քանի պատմություն է պատմել

263
(Թարմացված է 18:05 11.10.2018)
ՀՀ նախագահ Արմեն Սարգսյանը «Ազնավուր» կենտրոնի այցելուներին ու բարձրաստիճան հյուրերին պատմել է Ազնավուրի հետ առնչություն ունեցող ու իր հետ պատահած մի քանի դեպքեր:

ԵՐԵՎԱՆ, 11 հոկտեմբերի — Sputnik. ՀՀ նախագահ Արմեն Սարգսյանն ու Ֆրանսիայի նախագահ Էմանուել Մակրոնը՝ տիկնանց հետ այցել ու շրջել են Երեւանի «Ազնավուր» կենտրոնում: Նրանց այստեղ դիմավորել ու առաջնորդել է Շառլ Ազնավուրի որդին՝ Նիկոլա Ազնավուրը:

Ազնավուրի կյանքին ու ստեղծագործական ուղուն վերաբերող թանգարանային ցուցադրությունը դիտելուց հետո կենտրոնի բացման առիթով իր ելույթում ՀՀ նախագահ Արմեն Սարգսյանն ասաց. «Ազնավուրը 100 տոկոսով ֆրանսիացի էր, 100 տոկոսով հայ էր, բայց ավելի շատ նա 100 տոկոսով աշխարհի քաղաքացի էր»:

Դիմելով Ազնավուրի որդուն Արմեն Սարգսյանն ասաց. «Ձեր հայրը մեծ պոետ էր, նա մի անգամ շատ փիլիսոփայորեն ասել է. «Կյանքը շատ պարզ է` կա ծնունդ ու կա մահ, դրանց միջև դու ապրում ես»: Ազնավուրը, նրա խոսքով, «շարունակում է ապրել ու երկրորդ կյանք է ստանում` շնորհիվ հայ-ֆրանսիական բարեկամության ու այն մեծ երախտիքի, որ երկու ժողովուրդները տածում են աշխարհահռչակ շանսոնյեի նկատմամբ:

Արմեն Սարգսյանը մի դեպք պատմեց, որ տեղի է ունեցել շատ տարիներ առաջ Ուզբեկստանում:

«Ես ուզբեկական գորգերի խանութ մտա, որտեղ տարբեր լուսանկարներ կային կախված: Դրանցից մեկը Շառլի լուսանկարն էր: Ես հարցրեցի` սա ո՞ւմ լուսանկարն է, ես ձևացրեցի, թե չգիտեմ ու չասացի, որ ես հայ եմ: Նա ինձ ասաց` ինչպե՞ս դու չես լսել «Լա բոհեմը»»- պատմեց Արմեն Սարգսյանը:

ՀՀ նախագահը հիշեց նաև, որ 2011թ-ին Էլթոն Ջոնն ու ՇառլԱզնավուրը միասին ներկայացնում էին նոր սկավառակը, իսկ երբ ամիսներ առաջ Էլթոն Ջոնը Երևանում էր նախագահը նրան ցույց է տվել Ազնավուրի տունը, ինչին վերջինը պատասխանել է. «Ափսոս, ես հայ չեմ»:

Նախագհի խոսքով՝ Էլթոն Ջոնը խոստացել էր, որ, եթե Ազնավուրը համաձայնի, իրենք միասին համերգ կունենան Երևանում:

«Ազնավուրը հավերժ երիտասարդ էր: Գուցե նա 90 տարեկանից անց էր, գուցե նա ծեր էր, բայց նա միշտ երիտասարդ էր մնում»,- ասաց Արմեն Սարգսյանը:

Հիշեցնենք, որ օրեր առաջ Ազնավուրի որդին` Նիկոլ Ազնավուրը իր հարցազրույցում հայտնել էր, որ «Ազնավուր» կենտրոնի ստեղծման գաղափարը եղել է Շառլ Ազնավուրինը`ցավ հայտնելով, որ ստիպված է լինելու կենտրոնը բացել առանց նրա:

Կենտրոնի շենքը կառուցվել էր 2011թ-ին, Կասկադում: Հեղինակը ճարտարապետ Նարեկ Սարգսյանն է: Այն ի սկզբանե նախատեսված էր որպես մեծ երգչի համար հայրենիքում կեցավայր: Բայց Ազնավուրը Հայաստան այցելելիս այդպես էլ երբևէ չբնակվեց այդտեղ:

Ավելի ուշ այն վերածվեց թանգարանի, որտեղ ներկայացված են Ազնավուրի ձայնասկավառակները, գրքերը, պարգևներն ու համերգային պաստառները:

263
թեգերը:
Շառլ Ազնավուր, Արմեն Սարգսյան, Հայաստան
թեմա:
Շառլ Ազնավուր (112)
Ըստ թեմայի
Ֆրանկոֆոնիայի նախագահությունը երկու տարով անցավ Հայաստանին
Մակրոնը Ազնավուրից մեջբերումներ է արել Պատվավոր հյուրերի հուշամատյանում
Դա շատ կարևոր է. ֆրանսիացի գործիչը կշարունակի աջակցել Տավուշի սահմանամերձ գյուղերին
«Հայերն ամրապնդել են և պաշտպանել Ֆրանսիան իրենց երկրի նման». Էմանուել Մակրոն