ԵՐԵՎԱՆ, 9 սեպտեմբերի — Sputnik, Արմենուհի Մխոյան. Թեև ողջ կյանքում ապրում է Հայաստանից հեռու, անկեղծանում է՝ «կարող եք հարցերը հայերեն տալ, կփորձեմ պատասխանել հայերենով. եթե չկարողանամ՝ ապա կպատասխանեմ ռուսերեն: Հիմա իմ գյումրեցի ընկերն է հյուր մեր մոտ ու այդ այցն ինձ հաճելիորեն ստիպում է չորս օր անընդմեջ հայերեն խոսել»:
Ազգությամբ հայ երգիչը հպարտությամբ է խոսում իր արմատների մասին. ծնողները, թեև ծնվել են Վլադիկավկազում, բայց հորական կողմից նախնիները կարսեցիներ են, մայրական կողմն ապրել է Երևանի մոտ: «Նախպապս կոշկակար է եղել, ստեղծել է գեղեցիկ կոշիկներ: Ցեղասպանությունից հետո տեղափոխվել են Հունաստան, որտեղ սեփական կոշիկի գործարան են ունեցել: Պապս հենց այդտեղ է ծնվել: Հետո նրանց ընտանիքը տեղափոխվել է Հայաստան, իսկ իմ պապը՝ Հյուսիսային Օսեթիա, որտեղ էլ ընտանք է կազմել»,-պատմում է երգիչը՝ նշելով, որ երաժշտասեր ընտանիքից է, բայց պրոֆեսիոնալ երաժշտությամբ ոչ մեկը չի զբաղվել:
Չնայած մասնագիտությամբ պատմաբան է, բայց վստահեցնում է՝ իր համար երաժշտությունն ավելի հարազատ է:
Ներկայացնելով առաջիկա ծրագրերը Կարենը փաստեց՝ առաջիկայում նոր տեսահոլովակով ու երգերով կուրախացնի իր երկրպագուներին: «Ծրագրերը միշտ էլ նույնն են ՝ «աշխարհը գրավել երաժշտությամբ»: Սպասեք նոր տեսահոլովակների ու երգերի՝ ի դեպ ամբողջովին տարբեր երաժշտության սպասեք: Մենք փորձարկում ենք երաժշտական տարբեր ժանրեր, խառնում այդ ժանրերը: Այստեղ շատ մեծ բազմազգ խումբ ունենք ու բոլորով միասին աշխատում ենք»,-նշեց երաժիշտն առանձնացվելով իր ամենավաղեմի երազանքը՝ համերգով հանդես գալ Հայաստանում:
«Իսկ մինչ համերգն ուզում եմ առաջիկայում, քանի դեռ եղանակը լավն է, գալ Հայաստան, իսկ առաջին հերթին Գյումրի, որտեղ շատ ընկերներ ունեմ: Մեծ հաճույքով համերգներ կտամ, բայց դեռ լուրջ առաջարկներ դրան առնչվող չեն եղել: Շատ երիտասարդներ, հատկապես Երևանից, գրում են ինձ, թե երբ եմ համերգ տալու Հայաստանում: Հուսամ, դա շուտով կլինի»:
Մեր այն հարցին, թե ինչպես ծնվեց Ջահ-Ֆար բեմական անունը, երգիչն անկեղծացավ՝ պատահական է դա ստացվել ու լավ է հնչում. խորը իմաստ չկա դրանում: Իր նախընտրած երաժշտական ժանրը Ջահ-Ֆարը չառանձնացրեց, պարզապես նշեց՝ իր երաժշտությունը հոգուց բխած երաժշտություն է:
«Թող ունկնդիրներն իրենք որոշեն՝ որ ժանրին կվերագրեն իմ երաժշտությունը, բայց ընդհանուր առմամբ, այո՛ դա խառնուրդ է տարբեր ոճերի: Քանի որ մեր խումբը բազմազգ է, մենք ամեն մեկս ինչ որ բան մեզանից դնում ենք այդ երաժշտության մեջ»,-նշում է Ջահ-Ֆարն ու ավելացնում՝ «Վլադիկավկազը բազմազգ է, այստեղ կողք կողքի շատ հաշտ ու համերաշխ ապրում են տարբեր ազգերի ու հավատի մարդիկ և դա ստիպում է սիրել ու ընդունել միմյանց և միասին ստեղծել շատ գեղեցիկ երաժշտություն»:
Այս պահին Ջահ-Ֆարը պատրաստվում է մենահամերգի և իր խմբի հետ նոր տեսահոլովակի սցենարի վրա է աշխատում: Ի դեպ, երաժիշտը միանգամից 3 նախագծերի վրա է աշխատում առաջինը՝ V7 Club նախագիծն է, որտեղ բոլորը, բացի իրենից, օսեր են, երկորդը որպես մենակատար՝ Ջահ-Ֆար նախագիծն է, իսկ վերջինը՝ համեմատաբար նոր դուետ՝ JAH-FAR & ManTana: «Այս պահին այսքանն է, բայց հուսամ, որ կլինի նախագիծ նաև հայ երաժիշտների հետ համատեղ: Ես դրան շատ եմ սպասում»:
Ջահ-Ֆարը ծնվել է Վլադիկավկազում՝ նախկին Օրջոնիկիձե 1987 թվականին: Վարսահարդարի ու կոշկագործի ընտանիքում ծնված տղան ավարտել է Հյուսիսային Օսեթիայի պետական համալսարանը: Մասնագիտությամբ պատմաբան-լեզվաբան է:
