ԵՐԵՎԱՆ, 16 հուլիսի — Sputnik. Մշակույթի նախարարությունը համապատասխան օրենքի բացակայությունն օգտագործում է իր օգտին՝ բաժանելով դաշտը յուրայինների և ոչ յուրայինների: Այս կարծիքը հայտնեց երգիչ, երգահան Վահան Արծրունին «Մշակույթ-արվեստ-պետություն. պահանջարկ-առաջարկ» խորագրով հանդիպում-քննարկամը «Բարեփոխումների աջակցության հանրային նախաձեռնության» սրահում:

© Sputnik / Aram Nersesyan

Մշակույթի նախարարը խոստացավ բացահայտել չարաշահումները

«Հիմա մշակույթի նախարարության քաղաքականությունն այս է. մենք տեսնում ենք դաշտը՝ դիտարկում այն, ինչ կա՝ մայր թատրոն, պետական թատրոններ, և այլն, մենք ստանում ենք բյուջե և բյուջեն բաշխում ենք այդ վեկտորներով: Եվ սա գործում է օրենքի բացակայության պայմաններում: Մշակույթի նախարարությունն էլ օրենքի բացակայությունն օգտագործում է իր օգտին՝ տալով գնահատականներ՝ դու ավելի մշակութային ես, դու՝ ոչ, կամ ես քեզ սիրում եմ, քեզ տալիս եմ»,-ասաց Արծրունին:

Հանդիպման մյուս մասնակիցը՝ Տիկնիկային թատրոնի գեղարվեստական ղեկավար, ռեժիսոր Ռուբեն Բաբայանն ընդգծեց, որ մեր մշակույթի հանդեպ պետության վերաբերմունքը սահմանափակվում է առևտրային հարաբերություններով. այն ձևակերպվում է որպես վաճառք: «Հեռախոսի երաժշտության և Վահան Արծրունու երաժշտության միջև տարբերություն չկա: Ես կարծում եմ, որ այս վերաբերմունքը պիտի փոխվի. և բացարձակ կարևոր չի, որ լինի մշակույթի նախարարություն: Երկրում կարող է մշակույթի նախարարություն չլինի, բայց լինի մշակույթ: Հիմա իրականում մշակույթ կա, տաղանդավոր մարդիկ կան: Մշակույթի նախարարությունն էլ նրանց հետ հարաբերվելու երեք ձև ունի՝ խանգարել, չխանգարել, օժանդակել: Ինձ համար լավագույնը չխանգարելն է»,-նշեց Բաբայանը:

Վահան Արծրունին պատմում է իր մանկության բակի մասին

Գրող, գրականագետ Հովիկ Չարխչյանի դիտարկմամբ՝ անկախ պետության դերից, պետականություն ունենալ-չունենալուց՝ մշակույթ եղել է և կա. «Մշակույթ կա պետության ցանկությունից և գիտակցությունից անկախ»,- ասաց նա: Պետություն-մշակույթ հարաբե¬րութ¬յուններում, ըստ նրա, միշտ ակնհայտ է փոխադարձ շահագործման ձգտումը: «Պետությունն ուզում է մշակույթին ծառայեցնել իր նպատակներին, մշակույթը չի ուզում ծառայեցվել, այլ ուզում է պետությանն օգտագործել իր համար առավել բարենպաստ միջավայր ստեղծելու համար: Եվ այս տեսանկյունից մոտենալով խնդրին՝ պետք է նշենք, որ պետք է այս մշակույթ-պետություն հարաբերությունները հասցնել նվազագույնի. երկուսն էլ շահած դուրս կգան»,-կարծում է Չարխչյանը:
Բարեփոխումների աջակցության հանրային նախաձեռնության» հիմնադիր-անդամ Գևորգ Թադևոսյանը հակառակը՝  կարևորում է գերատեսչության աջակցությունը մշակութային գործիչներին: Նրա համոզմամբ՝ մշակույթի նախարարությունը պիտի լինի այն օգնականը, ով արվեստագետին մենակ չպիտի թողնի ստեղծագործական կյանքի սկզբում, քանի որ դա նույնն է, որ երեխային թողնենք ինքնուրույն քայլել սովորի: «Ինչքան արվեստագետներ կան, որ խեղդվում են իրենց կենցաղում, որ սոված են մնում, ու չես կարող իրենց մեղադրել, որ ինքը զբաղվում է իր կենցաղային հարցերով»,- նշեց նա:

Հանդիպման մասնակիցները համամիտ էին, որ հարկ է նախևառաջ օրենք ընդունել մշակույթի մասին՝ կարգավորելով արվեստագետ-պետություն-հանրություն հարաբերությունները:

Ու այդ օրենքը պիտի ընդունվի մշակութաբանների, երաժշտագետների, գրականագետների մասնագի¬տա¬կան գնահատականները հաշվի առնելով, որակյալ նախագծերին աջակցություն տրամադրելով:

ԵՐԵՎԱՆ, 5 մարտի - Sputnik.Հայաստանի Հանրապետության նախագահ Արմեն Սարգսյանի անունից հարգանքի տուրք է մատուցվել Հայաստանի Ազգային հերոս, Արցախի հերոս, Հայաստանի պաշտպանության առաջին նախարար Վազգեն Սարգսյանի հիշատակին։ Տեղեկությունը հայտնում են ՀՀ նախագահի մամուլի ծառայությունից։

Նշենք, որ այսօր` մարտի 5–ին Վազգեն Սարգսյանի ծննդյան օրն է։ Սպարապետը կդառնար 62 տարեկան։

«Վազգեն Սարգսյանի  ծննդյան օրվա առթիվ հանրապետության նախագահ Արմեն Սարգսյանի անունից այսօր ծաղիկներ են դրվել «Եռաբլուր» զինվորական պանթեոնում Վազգեն Սարգսյանի շիրիմին, ինչպես նաև նրա ծննդավայրում գտնվող՝ Վազգեն Սարգսյանի հիշատակը հավերժացնող հուշարձանին»,–ասված է հաղորդագրության մեջ:

Վազգեն Սարգսյանի տուն-թանգարանն ու հուշարձանը գտնվում են Արարատի մարզի Արարատ գյուղում։

Վազգեն Սարգսյանը ծնվել է 1959 թվականի մարտի 5-ին Խորհրդային Հայաստանի Արարատ գյուղում, Գրետա և Զավեն Սարգսյանների ընտանիքում: Իր գյուղի միջնակարգ դպրոցը ավարտելուց հետո՝ 1976-1979 թվականներին սովորել է Ֆիզիկական կուլտուրայի հայկական պետական ինստիտուտում: 1979-1983 թվականներին աշխատել է գյուղի միջնակարգ դպրոցում՝ որպես ֆիզկուլտուրայի ուսուցիչ:

Վազգեն Սարգսյանը կանգնած է Հայոց բանակի ստեղծման ակունքներում։

Նա 1991-1992 թվականներին եղել է Հայաստանի  Հանրապետության առաջին պաշտպանության նախարարը  և այնուհետև՝ 1995-1999 թվականներին: 1999 թվականի հունիսի 11-ից մինչև իր սպանությունը՝ նույն թվականի հոկտեմբերի 27-ը, Վազգեն Սարգսյանը եղել է ՀՀ վարչապետը։ Նա իր ակտիվ գործունեությունը սկսել է 1988 թվականին Ղարաբաղյան շարժման ժամանակ:

Վազգեն Սարգսյանը եղել է Արցախյան ազատամարտի ամենաակտիվ զինվորական հրամանատարներից մեկը: Տարբեր պաշտոններում նա մասնակցել է ռազմական գործողությունների մինչև 1994 թվականը, երբ կնքվեց զինադադար, և դե ֆակտո Արցախը ձեռք բերեց անկախություն: