ԵՐԵՎԱՆ, 6 ապրիլի — Sputnik. 2018թ-ի լատինաամերիկյան պարերի աշխարհի գավաթում, որը տեղի կունենա Կրեմլում ապրիլի 14-ին, Հայաստանը կներկայացնեն Արսեն Մելքոնյանը և Լուսինե Կարապետյանը։ Այդ մասին նշված է Աշխարհի գավաթի (World Latin Cup) կայքում։
Լավագույն պարողների կոչման համար կպայքարեն ինչպես պրոֆեսիոնալները, այնպես էլ սիրողական պարողները։
«Կազմակերպիչը Ռուսաստանի արվեստի գործիչ, Ռուսական պարային միության նախագահ, WDC պատվավոր փոխնախագահ Ստանիսլավ Պոպովն է», — նշում են մրցույթի կազմակերպիչները։
Ռուսական պարային միությունն արդեն 22-րդ նման մրցաշարն է անցկացնում Ռուսաստանում։ Աշխարհի գավաթի համար կպայքարեն զույգեր ԱՄՆ-ից, Կանադայից, Ֆրանսիայից, Մեծ Բրիտանիայից, Ֆինլանդիայից, Իտալիայից, Չինաստանից, Ռուսաստանից և Հայաստանից։
2018թ-ի աշխարհի գավաթի շրջանակում առաջին անգամ տեղի կունենա պարահանդեսային պարի թատերականացված ժանրի միջազգային մրցաշար` Exhibition։ Տեսարժան, հնարքների և մեծ արագությունների վրա հիմնված Exhibition-ը միշտ ցնցում է հանդիսատեսին։
Մոսկովյան հանդիսատեսը ծանոթ է պարահանդեսային պարի թատերականացված ժանրին։ Exhibition-ի աշխարհի գավաթը կհավաքի եզրափակիչ անցած վեց զույգի։ Մասնակիցների շարքում կլինեն լավագույն զույգերն ԱՄՆ-ից, Բելգիայից, Կուբայից, Հարավային Աֆրիկայից, Խորվաթիայից և Ռուսաստանից։
Հանդիսատեսի սիրելի արգենտինական տանգոն` հռչակավոր Վիկտոր դա Սիլվայի և փայլուն Մարինա Պալոմայի կատարմամբ, կլինի երեկոյի զարդը։
Ծրագրի վերջում հանդիսատեսը, ավանդույթի համաձայն, պարելու հնարավորություն կունենա։
