ԵՐԵՎԱՆ, 4 ապրիլի — Sputnik, Անի Լիպարիտյան. Լոռու մարզի Թեղուտ գյուղում ելույթի պահին քանոնահար Մարիաննա Գևորգյանին մի փոքրիկ է մոտեցել և բեմ բարձրացել։
Աղջիկը շատ է զարմացել, հետո վախեցել է, որ տղան կխանգարի և կշեղի նրան, բայց փոքրիկը սկզբից մինչև վերջ լսել քանոնահարուհուն ու զարմացած հետևել նրա մատների շարժումներին։ Այս մասին Մարիաննան պատմեց Sputnik Արմենիային։
«Անկախ քեզնից սկսում ես ուրախանալ, երբ նման բան ես տեսնում։ Տղան հինգ տարեկան էր, և կարծում եմ, որ հենց այդ տարիքում է պետք երեխաների մոտ արվեստի նկատմամբ սեր սերմանել», — ասաց Մարիաննան։
Կարևորը` քանոն նվագելիս ամեն ինչ անել հանդիսատեսին, հատկապես օտարերկրյա հանդիսատեսին փոխանցելու համար բոլոր հույզերդ` ուրախությունից մինչև տառապանք։
«Անգնահատելի զգացողություն է, երբ ֆրանսիացին մոտենում է քեզ և ձեռքերդ համբուրում նրա համար, որ դու հոգեցունց երաժշտություն ես նվագել։ Կամ երբ քո երաժշտությունը հնչում է իտալացի նկարչի արհեստանոցում նրա աշխատանքի ժամանակ», — խոստովանեց Sputnik Արմենիայի զրուցակիցը։
Տարբեր ազգերի ներկայացուցիչների առաջ ելույթ ունենալն աղջկա համար սովորական է բան է. նա համերգներ է տալիս փոքր տարիքից։
Երաժշտական կարիերա
Քանոնահար Մարիաննա Գևորգյանը երկար ճանապարհ է անցել բարձունքների հասնելու համար։ Աղջիկը երաժշտական դպրոց է հաճախել, նվագել Բախշյանի անվան մանկական ֆիլհարմոնիայում, ուր ընդունվում էին ու շարունակում են ընդունվել տաղանդավոր երեխաներ և պրոֆեսիոնալ դառնում հիանալի ուսուցիչների շնորհիվ։
«Այնուհետև ես կոնսերվատորիա ընդունվեցի և ավարտեցի կարմիր դիպլոմով։ Այսօր աշխատում եմ Կոմիտասի անվան կամերային երաժշտության տանը։ 2012 թվականից նվագում եմ «Տաղարան» համույթում», — պատմեց Մարիաննան։
Նա կարծում է, որ քանոն պետք է նվագի հենց հայուհին. միայն հայը կարող է փոխանցել ժողովրդական գործիքի ողջ հմայքն ու գեղեցկությունը։
Քանոնն արևելյան ծագում ունի։ Օրինակ` իրանցիները նման գործիք ունեն, սլավոնացիները` գուսլի։ Բայց Մարիաննայի խոսքով, յուրաքանչյուր ազգի մոտ այն տարբերվում է։
«Այս իրավիճակում ամենակարևորն այն է, որ յուրաքանչյուր ժողովուրդ կարողանա իր խոսքն ասել` ազգային գործիքները ցուցադրելով։ Մենք հիանալի մշակույթ ունենք, հիանալի ստեղծագործություններ, անգին դասախոսներ։ Կարծում եմ, որ ուրիշի մշակույթից որևէ բան վերցնել ու քոնի տեղ ներկայացնել չի կարելի։ Երբ որևէ մեկին քո մշակույթն ես ներկայացնում, օտարերկրացին չի կարող չնկատել դա», — համոզված է աղջիկը։
Խոսելով հայկական ժողովրդական գործիքի առանձնահատկությունների մասին` Մարիաննան պատմեց, որ այս տարի հետաքրքիր պրեմիերա է եղել. հայ կոմպոզիտորների ստեղծագործությունները հնչել են քանոնի և երգեհոնի համակցությամբ։ Գաղափարի հեղինակը հայ կոմպոզիտոր Երվանդ Երկանյանն էր։
Այժմ Մարիաննան շրջագայում է տարբեր երկրներում, նրա արվեստը գնահատում են ինչպես եվրոպացիները, այնպես էլ թուրքերը` հրավիրելով համերգների։ Աղջիկը համոզված է` կարևոր է պահպանել ու չկորցնել այն, ինչ ունենք, քանի որ հաջորդ սերունդները պետք է իմանան` ինչ ենք մենք ստեղծել, զարգացրել, ինչ հաջողությունների հասել։
