ԵՐԵՎԱՆ, 14 սեպտեմբերի — Sputnik. Թումանյանի թանգարանում «Խավարում» խորագրով ցուցահանդեսի թեմայի առնչությամբ մշակույթի նախարարությունը որևէ առարկություն չունի։ Այսօր լրագրողների հետ զրույցում, անդրադառնալով արգելված ցուցահանդեսի մասին մամուլում հնչող տեսակետին, ասաց մշակույթի նախարար Արմեն Ամիրյանը` հավելելով, որ տարվա ընթացքում նախարարությունը ևս ծրագրում է նույն թեմայով այլ ցուցադրություններ կազմակերպել ու նույնիսկ առանձին թանգարան բացել` նվիրված ստալինյան բռնությունների զոհերին։
Մեկնաբանելով ցուցահանդեսը փակելու որոշումը` Արմեն Ամիրյանը նշեց, որ թանգարանն այն չէր համաձայնեցրել նախարարության հետ։
«Ես վստահորեն ասում եմ, որ սուբսիդիայի պայմանագրով որևէ համաձայնեցում չի եղել նախարարության հետ»,– ասաց Ամիրյանը։
Նշենք, որ Հովհաննես Թումանյանի թանգարանի տնօրեն Նարինե Թուխիկյանը Sputnik Արմենիայի հետ զրույցում ասել էր, որ ցուցահանդեսի բացման մասին նախարարությունում տեղյակ եղել են։
«Մենք տեղյակ չենք եղել այդ ցուցահանդեսի մասին և իմացել ենք այն ժամանակ, երբ ցուցադրությունն արդեն կայացել է»,– հակառակը պնդեց նախարարը` ասելով, որ ցուցահանդեսի մասին տեղեկացել են բացումից շուրջ 1 շաբաթ անց։
Նշենք, որ Նարինե Թուխիկյանն իր խոսքում պնդել էր, որ ցուցահանդեսի առաջին իսկ օրվանից թանգարանի տնօրինությունը հեռախոսով սպառնալիքներ է ստացել, որից հետ էլ նախարարությունից կարգադրվել է հավաքել ցուցադրությունը։
Հիշեցնենք, շուրջ 22 օր տևած «Խավարում» բացօթյա ցուցահանդեսը Հովհաննես Թումանյանի թանգարանի մուտքի մոտ սեպտեմբերի 9-ին փակվեց` նախարարության հրահանգով, թեև նախատեսված էր, որ այն կտևի մինչև աշնան վերջ:
