Ռոբերտ Գետիկյանի ֆիլմը Վենետիկի կինոփառատոնի մրցութային ծրագրում է

ԵՐԵՎԱՆ, 27 հուլիսի — Կարեն Ավետիսյան, Sputnik. Հաշված օրեր անց Վենետիկի Լիդո կղզին կրկին կդառնա համաշխարհային կինոյի կիզակետը:

Արդեն հայտնի են այն 21 ֆիլմերը, որոնք կկազմեն կինոփառատոնի հիմնական մրցույթային ծրագիրը, որտեղ Ջորջ Քլունիի, Գիլիերմո դել Տորոյի, Դարեն Արանոֆսկու, Աբդուլաթիվ Քեշիշի և այլոց ֆիլմերի կողքին հայտնվել է Ռոբեր Գետիկյանի «Լա վիլլա» ֆիլմը:

Գետիկյանի նոր աշխատանքում գործողությունները ծավալվում են ձմռանը, Մարսելի մոտակայքում, որտեղ ֆիլմի հերոսները՝  Արմանդան և իր եղբայր Ջոզեֆը, այցելում են իրենց ծեր հորը։ Այցելությունն առիթ է դառնում զավակներին` արժևորելու և գիտակցելու, թե որքանով է նրանց հաջողվել ապրել հայրական իդեալներով:

Գալիք փառատոնում առանձնանում է նաև հայտնի ռեժիսորների կողքին ժամանակակից արվեստի ամենաառանցքային արվեստագետներից մեկի՝ Այ Վեյվեյի մասնակցությունը` «Մարդկային հոսք» ֆիլմով:

Մայքլ Ջեքսոնի սիրահարներին փառատոնը մատուցում է հատուկ նվեր՝ ցուցադրելով ռեստավրացված  «Թրիլլերը»`  3D ձևաչափով, մեծ էկրանին:

Ժյուրիի կազմը գլխավորում է ամերիկյան դերասանուհի Աննետ Բենինգը: Ժյուրիի կազմում է նաև հունգարացի ռեժիսոր Իլդիկո Էնյենդին, ով օրեր «Ոսկե Ծիրան» երևանյան կինոփառատոնի ժյուրիի կազմում էր, ինչպես նաև` նույն «Ոսկե Ծիրանի» վերջին տարիների հյուրերից դերասանուհի Աննա Մուգլալիսը:

Վենետիկյան կարմիր գորգն այս տարի իրենց ներկայությամբ կզարդարեն Մեթ Դեյմոնը, Ջուլիաննա Մուրը, Ջենիֆեր Լուրենսը, Ջուդի Դենչը, Շարլոտտա Ռեմփլինգը և ուրիշները:

Վենետիկի կինոփառատոնը կընթանա օգոստոսի 30-ից սեպտեմբերի 9-ը։