Լաուրա Սարգսյան, Sputnik.
Հյուրախաղերով Երևանում է գտնվում հայտնի վրացական ֆոլկ-խումբ «Trio Mandili»-ին: Աղջիկները Հայաստան են ժամանել երեկ, սակայն հասցրել են սիրել Երևանը, որն իրենց ընդունել է ջերմորեն:
«Հայաստանում մենք առաջին անգամ ենք, սակայն արդեն հասցրել ենք նկատել, որ մեզ այստեղ սիրում են: Մենք նույնպես սիրեցինք Երևանը: Անակնկալ ենք պատրաստել երևանյան հանդիսատեսի համար, որը ցույց կտանք համերգի ընթացքում»,- Sputnik Արմենիայի թղթակցի հետ զրույցում ասաց «Trio Mandili» խմբի երգչուհիներից մեկը` Տատուլի Մգելաձեն:
«Trio Mandili»-ի կազմում հանդես են գալիս Տատուլի Մգելաձեն, Տամարի Ցիկլաուրին և Իրինա Միդելաուրին: Խումբը հայտնի դարձավ, երբ նա անդամները համացանցում սելֆի-տեսանյութ տեղադրեցին: «Ապարեկա» վրացական երգով տեսահոլովակը` ազգային փանդուրի երաժշտական գործիքի ուղեկցությամբ, ցնցեց համացանցը:
Տեսասելֆիի նախաձեռնողը Տատուլի Մգելաձեն էր: Աղջկա խոսքով` պատկերացնել անգամ չէր կարող, որ երեք օրվա ընթացքում այդպիսի հաջողություն կունենան և հայտնի կդառնան:
«Այն, որ տեսահոլովակը ճանաչված դարձավ, ես հայտնաբերեցի երրորդ օրը, երբ դիտումների քանակը հասավ 800 հազարի: Դեպքերի նման զարգացում ոչ ոք չէր սպասում»,- ասաց Մգելաձեն:
Սոցցանցերում գլխապտույտ հաջողություն ունենալուց հետո, աղջիկներին գտավ պրոդյուսեր Ռոստիսլավ Մասլովիչը: Նա խոստովանում է, որ ցանկացավ պատահական հաջողությունը պրոֆեսիոնալ դաշտ բերել:
Տրիոյի անվանումը գիտակցաբար էր ընտրված: «Մանդիլին» վրացերենից թարգմանաբար կանացի գլխարկ է նշանակում: Ավանդազրույցի համաձայն` մանդիլին վիճող տղամարդկանց մեջ գցելու դեպքում, անմիջապես խաղաղություն կհաստատվի: Աղջիկները սերտ կապված են ազգային մշակույթին և ստեղծագործում են ֆոլկ ժանրում:
«Ֆոլկը մեր անցյալն է: Մենք ինքնուրույն ենք սովորել երգել այդ ժանրում, սակայն այսօր ավելի պրոֆեսիոնալ ենք մոտենում այդ հարցին», — ասաց Մգելաձեն:
Ինչ վերաբերում է քննադատությանը, երբ Վրաստանի շոու-բիզնեսի որոշ ներկայացուցիչներ և սոցցանցի օգտատերեր հարձակվեցին աղջիկների վրա Մոսկվայում տեղի ունեցած համերգից հետո, Մգելաձեն ասում է. «Տրիոն հետագայում ելույթ կունենա այն երկրներում, որտեղ կցանկանա»: Այս դիրքորոշումն ընդունում է նաև տրիոյի պրոդյուսերը:
«Բավականին զարմանալի էր կարդալ Ռուսաստանում ելույթի վերաբերյալ մեկնաբանությունը: Վրացի շատ երաժիշտներ են համերգներ տալիս Մոսկվայում, իսկ մեզ քաղաքականություն են վերագրում միայն այն բանի համար, որ Կարմիր Հրապարակում սելֆի-տեսագրություն ենք նկարահանել», — Sputnik Արմենիայի թղթակցի հետ զրույցում ասաց Մասլովիչը:
Նա կոչ արեց «ագրեսիան անպաշտպան աղջիկների վրա չթափել», նրանք այդ միջադեպի պատճառով մտադիր չեն չեղարկելու Ռուսաստանի հյուրախաղերը:
Այսօր «Մանդիլի» տրիոն ավելի քան 1,5 մլն բաժանորդ ունի Facebook-ում, իսկ youtube ալիքի վրա տեղադրված նրանց յուրաքանչյուր տեսահոլովակը բազմամիլիոնանոց դիտումներ է հավաքում: Խմբի հյուրախաղերի ժամանակացուցակն էլ արդեն կազմված է մինչև 2019 թվականը:
