Ավետ Բարսեղյանն ու Սերգեյ Սմբատյանը

Դասական երաժշտությունը նոր «մանկական» ձևաչափով կհնչի Երևանում

120
(Թարմացված է 15:21 29.05.2017)
Երեխաների պաշտպանության օրվա կապակցությամբ Երևանում «7» առեղծվածային անվանումով համերգ կանցկացվի, որին կմասնակցի Հայաստանի պետական երիտասարդական նվագախումբը։

ԵՐԵՎԱՆ, 29 մայիսի — Sputnik. Երեխաների համար նախատեսված հսկայական ինտերակտիվ շոուն կանցկացվի հունիսի 1-ին Արամ Խաչատուրյանի անվան համերգասրահում ։ «7» անվանումը կրող համերգը կազմակերպվել է Հայաստանի պետական երիտասարդական նվագախմբի գլխավոր դիրիժոր, գեղարվեստական ղեկավար Սերգեյ Սմբատյանի և հայտնի հեռուստահաղորդավար Ավետ Բարսեղյանի նախաձեռնությամբ։

Բարսեղյանի խոսքով` համերգի անվանումը պայմանավորված է նրանով, որ Աստված երկիրը ստեղծել է 7 օրվա ընթացքում, գոյություն ունի ծիածանի 7 գույն, «յոթ մեղք» հասկացություն ու յոթ նոտա։

«Ցանկալի կլիներ, որ համերգի ընթացքում մենք կարողանայինք երեխաներին հասցնել մի քանի կարևոր բան` պահպանել էթիկետի կանոնները սեղանի շուրջ, անջատել բջջային հեռախոսները հասարակական միջոցառումների ժամանակ։ Ի սկզբանե ձևաչափն այլ պետք է լիներ` ենթադրվում էր դասական երաժշտության սովորական համերգ կազմակերպել, սակայն հետագայում մենք որոշեցինք կապ հաստատել մաեստրո Սմբատյանի հետ և օգտվել նրա «հեքիաթային» հնարավորություններից, քանի դեռ նա չի մեկնել Տորոնտո», — ասաց Բարսեղյանն` ավելացնելով, որ կազմակերպիչները որոշել են համերգը նվիրել փոքրիկ հանդիսատեսին մեծ տոնի` Երեխաների պաշտպանության օրվա մոտենալու կապակցությամբ։

Телеведущий Авет Барсегян и главный дирижер Государственного молодежного оркестра Армении Сергей Смбатян
© Sputnik / Ani Liparityan
Ավետ Բարսեղյանն ու Սերգեյ Սմբատյանը

Բարսեղյանը նշեց, որ համերգի ինտերակտիվ ձևաչափը ենթադրում է նաև ակտիվ շփում երեխաների հետ. նրանց հարցեր են տալու` ներգրավելով բանավեճի մեջ, և ոչ միայն։

«Սա փորձնական նախագիծ է։ Մենք ուզում ենք յուրօրինակ միքս առաջարկել, համատեղել շոուն և դասական երաժշտության համերգը և տեսնել, թե դրանից ինչ դուրս կգա։ Եթե հետագայում միջոցառումն ավանդական դառնա, մենք կկարողանանք մանկատների սաների և տարբեր հիվանդություններ ունեցող երեխաների ներգրավել»,- ասաց նա։

Հայաստանի պետական երիտասարդական նվագախմբի գլխավոր դիրիժոր և գեղարվեստական ղեկավար Սերգեյ Սմբատյանն իր հերթին նշեց, որ միջոցառման հետ կապված բոլոր գաղտնիքները չեն բացահայտելու։ Նա հորդորեց բոլորին ներկա լինել համերգին և ամեն ինչ տեսնել սեփական աչքերով։

Воспитанники детского сада поют для гостей пресс-конференции
© Sputnik / Ani Liparityan
№12 մանկապարտեզի սաները

«Մենք փորձում ենք այնպիսի ձևաչափ ստեղծել, որը կհետաքրքրի երեխաներին։ Պետք է իմանալ, թե ինչպես ներկայացնել դասական երաժշտությունը, որպեսզի այն արժեքազրկված չերևա… Ընդհանուր առմամբ մենք կփորձենք այնպես անել, որ համերգը հետաքրքրի ոչ միայն երեխաներին, այլև մեզ», — ասաց Սմբատյանը։

Նա ավելացրեց, որ «մանկական» ձևաչափով դասական երաժշտությունը նոր և արտասովոր երևույթ է։

Մամուլի ասուլիսի ավարտին №12 մանկապարտեզի սաները երգեցին հյուրերի համար։ «7» համերգը կանցկացվի ՀՀ առաջին տիկին Ռիտա Սարգսյանի հովանու ներքո։

Воспитанники детского сада поют для гостей пресс-конференции
© Sputnik / Ani Liparityan
№12 մանկապարտեզի սաները երգեցին հյուրերի համար։

Русская версия

120