ԵՐԵՎԱՆ, 22 մայիսի — Sputnik. Մայիսի 22-ին աշխարհահռչակ շանսոնյե Շառլ Ազնավուրը դարձավ 93 տարեկան: Երգչի ծննդյան օրը կնշվի նաև Երևանում։
Ազնավուրի ծննդյան տարեդարձի կապակցությամբ մայիսի 22-ին, ժամը 19:30-ին, Շառլ Ազնավուրի անվան հրապարակում բացօթյա համերգ կկազմակերպվի: Համերգի մուտքն ազատ է։
Համերգի ընթացքում Ազնավուրի լավագույն ստեղծագործությունները կհնչեն Հայկ Պետրոսյանի, Արամոյի, «Միքայել Ոսկանյան և ընկերներ» խմբի, Սոնա Ռուբենյանի, Բորյա Եգանյանի, Էդգար Խաչատրյանի, Տիգրան Սուչյանի, «Kami friends project»-ի, DJ Beatman-ի կատարմամբ:
Ազնավուրը ծնվել է 1927 թվականին Փարիզում, հայ գաղթականներ Միշա և Քնար Ազնավուրյանների ընտանիքում։
Հարցազրույցների ժամանակ նա բազմաթիվ անգամ է խոսել այն մասին, որ ինքը տաղանդավոր ազգից է սերում։
«Երբ 1915թ-ի Հայոց ցեղասպանությունից հետո հայերը ստիպված են եղել լքել իրենց տները, նրանց ապաստան են տվել աշխարհի ամենատարբեր երկրներում։ Մենք անդադար աշխատել ենք և ինտեգրվել մեզ օթևան տված հասարակություններում, քանի որ մենք շատ տաղանդավոր ազգ ենք»,– ասել է շանսոնյեն։
Լեգենդար արտիստը 93 տարեկանում էլ չի կորցնում եռանդը, նա ամեն օր երգեր է գրում և չի թաքցնում իր երկարակեցության գաղտնիքը։
«Իմ գաղտնիքն էնտուզիազմն է ու աշխատանքը»,- ասել է նա։
Հայտնի երգիչն ավելի քան 1400 երգի հեղինակ է և այսօր էլ կարիերային հրաժեշտ տալու մտադրություն չունի։
«Իմ կարիերայի սկզբում ինձ ամեն ինչ ասել են, որ ես արտաքին չունեմ, ձայն չունեմ, բայց ես հասել եմ նրան, ինչ ունեմ այսօր։ Կարիերան ավարտելու հարց երբեք չի եղել։ Մի անգամ խոսում էինք կնոջս հետ, ասաց` քո տարիքում երևի պետք է դադար տալ։ Ես ասացի` եթե չերգեմ, կմեռնեմ»,- ասել է Ազնավուրը։
Նշենք, որ մայիսի 29-ին, հունիսի 4-ին և 17-ին, Ա. Սպենդիարյանի անվան օպերայի և բալետի ազգային ակադեմիական թատրոնում ՀՀ մշակույթի նախարարության աջակցությամբ տեղի կունենա «Լա Բոհեմ» մեկ գործողությամբ բալետային ներկայացման առաջնախաղը՝նվիրված Ազնավուրի ծննդյան 93-ամյակին:
Ներկայացման սցենարի հեղինակն ու բեմադրող խորեոգրաֆն է Ռուդոլֆ Խառատյանը, երաժշտությունը՝ Շառլ Ազնավուրի:
Մայիսի 29-ին աշխարհահռչակ երգիչը ներկա կլինի «Լա Բոհեմ» բալետային ներկայացման առաջնախաղին:
