ԵՐԵՎԱՆ, 22 մայիսի — Sputnik, Արմենուհի Մխոյան. Թուրքիայում բնակվող 26-ամյա արվեստագետ Օրհան Օնուկը, ինչպես ինքն է ասում, ծնվել է Արշիլ Գորկու (Ոստանիկ Ադոյան) ծննդավայրին շատ մոտ (Գորկին ծնվել է արևմտյան Հայաստանում՝ Վանի Հայոց ձոր նահանգի Խորգոմ գյուղում — խմբ.) և ոգեշնչվում է մեծ նկարչի գույներից ու ոճից։
«Գորկու հնչեղ գույներով ինքնատիպ կտավներն իմ ծննդավայրի գույներն են հիշեցնում»,- Sputnik Արմենիայի թղթակցին ասաց նա:
Օնուկը, որի աշխատանքներն արդեն ցուցադրվել են Թուրքիայի մի շարք քաղաքների ցուցասրահներում, չի դադարում հիանալ Գորկու աշխատանքներով։
«Հատկապես մոր նկարը՝ «Նկարիչն ու իր մայրը», որն անկարելի է չսիրել, իմ վրա շատ խորը տպավորություն է թողել: Հենց նույն պատկերը ես էլ եմ փորձել հանձնել կտավին»,- Sputnik Արմենիայի թղթակցին պատմեց երիտասարդ արվեստագետը։
Ի դեպ, Գորկին Օրհանի սիրած միակ հայ նկարիչը չէ. սփյուռքահայ նկարիչ, գորգանկարիչ, հողարվեստի ուղղության հիմնադիր Մարկոս Գրիգորյանը ևս երիտասարդի նախընտրած արվեստագետներից է, իսկ լուսանկարչության ոլորտում նրա համար անկրկնելի են աշխարհահռչակ լուսանկարիչ-լրագրող Արա Գյուլերի ինքնատիպ աշխատանքները:
Իսկ վերջերս Ստամբուլում կայացած հայ արվեստագետների աշխատանքների ցուցահանդեսի ժամանակ Օրհանին անչափ դուր եկավ իր հասակակից հայ արվեստագետ Հրաչ Վարդանյանի աշխատանքը։ Նա ցանկություն հայտնեց նկարվել հենց այդ աշխատանքի մոտ:
«Կատարման արվեստը շատ հավանեցի: Անատոլիական ինչ-որ բան կա»,- ասաց Օրհան Օնուկը:
Նշենք, որ Թուրքիայի Բուրսա, ապա նաև Ստամբուլ քաղաքներում ավելի քան մեկ ամիս շարունակ ցուցադրվել են հայ արվեստագետների աշխատանքները։ Ցուցադրությունը կազմակերպվել էր «Մարդկանց մոլորակը» շարժման շրջանակում։
