Նարինե Գրիգորյան

Հայրս գերի ընկավ, բայց նրան վերադարձրին. ադրբեջանցի բժիշկը փրկեց նրան

1155
(Թարմացված է 23:09 27.01.2017)
ՀՀ նախագահ Սերժ Սարգսյանն, առաջին տիկնոջ և ԼՂՀ նախագահ Բակո Սահակյանի ուղեկցությամբ, ներկա գտնվեց Մհեր Մկրտչյանի «Կյանք ու կռիվ 2. 25 տարի անց» ֆիլմի անդրանիկ ցուցադրությանը։ Մինչ պրեմիերան ֆիլմի առանցքային դերակատարներից մեկը` Նարինե Գրիգորյանը, Sputnik Արմենիայի հետ զրույցում հիշարժան դրվագ պատմեց իր արցախյան կյանքից։

ԵՐԵՎԱՆ, 27 հունվարի-Sputnik. Առաջին անգամ Sputnik Արմենիայի հետ զրույցում ՀՀ վաստակավոր արտիստ Նարինե Գրիգորյանը բարձրաձայնեց մի պատմություն, որի մասին մինչ օրս նախընտրել է լռել։ Մինչ արցախյան պատերազմը 10-ամյա Նարինե Գրիգորյանը ծնողների հետ ապրել է Հրազդանում։ Երբ սկսվել է արցախյան շարժումը նրանց ընտանիքը տեղափոխվել է Արցախ, քանի որ ծնունդով այնտեղից էին։

Президент Армении Серж Саргсян присутствовал на премьере фильма Линия 2: 25 лет спустя
© Sputnik/ Asatur Yesayants
ՀՀ նախագահ Սերժ Սարգսյանը, Առաջին տիկին Ռիտա Սարգսյանը, Արցախի նախագահ Բակո Սահակյանը` «Կյանք ու կռիվ 2. 25 տարի անց» ֆիլմի պրեմիերային

«Արցախում տուն կառուցեցինք, հետո սկսվեց պատերազմը։ Մարդիկ երբեք չեն պատկերացրել, որ դա կհասունանա ու կվերածվի պատերազմի։ Հայրս գերի ընկավ, բայց անցավ ժամանակ ու նրան վերադարձրին. ադրբեջանցի բժիշկը փրկեց նրան»,-հուզված պատմեց Նարինե Գրիգորյանը։

Հետո շփոթվեց, խոսքը կիսատ թողեց` այն անվանելով իր համար չափազանց ծանր թեմա։

Նարինե Գրիգորյանը «Կյանք ու կռիվ 2. 25 տարի անց» ֆիլմի առանցքային դերակատարներից է։ Խաղում է համրի դերում։ Դերասանուհուն հաճախ ենք տեսնում մնջախաղային ներկայացումներում, այս անգամ էլ նա շատ չի հեռացել մշտական դերից։

«Իհարկե, թատրոնի լռությունը շատ է տարբերվում, հենց դրանում է ադրենալինը։ Այս ֆիլմում ներկայացվում է մեր ազգի ուժը, թե ինչքան միասնական ենք արհավիրքի պահին»,-ասաց նա։

Карен Казарян на премьере фильма Линия 2: 25 лет спустя
© Sputnik/ Asatur Yesayants
Կարեն Ղազարյանը` «Կյանք ու կռիվ 2. 25 տարի անց» ֆիլմի պրեմիերային

Ֆիլմի պրոդյուսեր Կարեն Ղազարյանն էլ պատմեց, որ ֆիլմի երկրորդ մասը մտածում էին նկարահանել այլ ուղղվածությամբ. պետք էր պատկերել Շուշիի ազատագրումը։ Հենց որոշեցին նկարահանումների մեկնել Արցախ, սկսվեցին ապրիլյան ռազմական գործողությունները։ Շատ արագ փոխվեց սցենարական պլանը։

«Մտահղացում ծնվեց ֆիլմի շարունակությունն անել ապրիլյան դեպքերի ներքո։ Եթե ցանկությունդ մեծ է, մեր երկրում կարող ես այն իրականացնել»,-ասաց նա։

Ֆիլմի դիտումից հետո Հայաստանի ու Արցախի նախագահներ Սերժ Սարգսյանն ու Բակո Սահակյանը զրուցեցին ստեղծագործական խմբի հետ ու կարծիքներով փոխանակվեցին։

 

1155