ԵՐԵՎԱՆ, 9 դեկտեմբերի — Sputnik. Հայկական ֆիլմերից 3-ը հավակնում են մրցանակի արժանանալ հեղինակավոր «Ոսկե գլոբուս» 74-րդ կինոմրցանակաբաշխության շրջանակում «Լավագույն օտարերկրյա ֆիլմ» անվանակարգում: Այս մասին հայտնում է «Ոսկե Գլոբուս»-ի պաշտոնական կայքը։
Ջիվան Ավետիսյանի «Վերջին բնակիչը» ֆիլմի նկարահանումներն անցկացվել են Արցախի Խաչմաչ գյուղում։ Ֆիլմը պատմում է 70-ամյա քարտաշ Աբգարի մասին, որն ազգամիջյան հակամարտության արդյունքում գյուղում միայնակ է մնացել և որոնում է իր աղջկան, որը, ինչպես պարզվում է հետագայում, հոգեկան խնդիրներ ունի, քանի որ տեսել է, թե ինչպես է վայրենացած ամբոխը կրակների մեջ այրել իր ամուսնուն:
Սարիկ Անդրեասյանի «Երկրաշարժ» ֆիլմն էլ հիմնված է 1988 թվականին Հայաստանում տեղի ունեցած աղետի իրական փաստերի վրա։
Դավիթ Սաֆարյանի «Տաք երկիր, սառը ձմեռ» (Hot Country, Cold Winter) ֆիլմն էլ պատմում է, թե Խորհրդային Միության փլուզումն ինչ ազդեցություն է ունեցել շարքային քաղաքացիների կյանքի վրա ։
«Ոսկե գլոբուս» մրցանակաբաշխությունը կկայանա 2017 թվականի հունվարի 8-ին, Լոս Անջելեսում։
