ԵՐԵՎԱՆ, 4 նոյեմբերի — Sputnik. Գյումրու «Սև բերդ» ամրոցում նոյեմբերի 18-ին տեղի կունենա ՀՀ ժողովրդական արտիստ, պետական մրցանակի դափնեկիր Տիգրան Մանսուրյանի ստեղծագործական երեկոն, հայտնում են ՀՀ մշակույթի նախարարությունից:
Երեկոյի ընթացքում կհնչեն հեղինակի «Ռեքվիեմ», «Տարվա եղանակներ», «Զուգահեռ երգեր» ստեղծագործությունները:
Համերգի գեղարվեստական ղեկավարը և դիրիժորն է Ռոբերտ Մլքեյանը: Համերգին մասնակցում են Հայաստանի պետական կամերային երգչախումբը` գեղարվեստական ղեկավար և գլխավոր դիրիժոր Ռոբերտ Մլքեյան, Հայաստանի պետական կամերային նվագախումբը` գեղարվեստական ղեկավար և գլխավոր դիրիժոր Վահան Մարտիրոսյան, Երևանի պետական կամերային երգչախումբը` գեղարվեստական ղեկավար և գլխավոր դիրիժոր Հարություն Թոփիկյան, Գյումրու «Տիրամայր Հայաստանի» երգչախումբը` գեղարվեստական ղեկավար և գլխավոր դիրիժոր Ռոբերտ Մլքեյան:
Մենակատարներն են երեկոյի հատուկ հյուր, ՀՀ ժողովրդական արտիստ Հասմիկ Պապյանը (սոպրանո), Հենրիետա Հարությունովան (սոպրանո), Հովհաննես Գրիգորյանը (բարիտոն), Յանա Դարյանը (ալտ), Արթուր Ավանեսովը (դաշնամուր):
Ստեղծագործական երեկոն կազմակերպել են ՀՀ մշակույթի նախարարությունը, ««Բարեկամ» մշակույթի, արվեստի և սպորտի զարգացման կենտրոն» ՀԿ-ն և «Պրոֆ» պրոդաքշնը` Շիրակի մարզպետարանի և Գյումրու քաղաքապետարանի աջակցությամբ։